ភ្នំពេញ៖ បច្ចុប្បន្នមនី្ទរពេទ្យកុមារជាតិ នៃក្រសួងសុខាភិបាល ព្រះរាជាណាចក្រកម្ពុជា កំពុងអនុវត្តន៍តាមកម្មវិធីជាតិផ្តល់ថ្នាំបង្ការជំងឺ ជាប្រចាំដល់កុមារ ចំណុចអាយុក្រោម០១ឆ្នាំ ដើម្បីជួយដល់កុមារតូចៗឲ្យមានសុខភាពល្អ និងលូតលាស់ល្អ ព្រមទាំងកាត់បន្ថយអត្រាឈឺ និងស្លាប់ និងការរីករាលដាលជំងឺផ្សេងៗ។

បើតាមលោកវេជ្ជបណ្ឌិត លាន គីមស្រេង ប្រធានផ្នែកពិគ្រោះជំងឺក្រៅ និងសង្រ្គោះបន្ទាន់ តំណាង​ឯកឧត្តម សាស្រ្តាចារ្យ ញឹប អង្គាបុស្ស នាយកមនី្ទរពេទ្យកុមារជាតិ ថ្លែងប្រាប់BTV ព័ត៌មាន នាព្រឹកថ្ងៃទី១០ ខែមីនា ឆ្នាំ២០២៣នេះថា មនី្ទរពេទ្យកុមារជាតិ បានផ្តល់ទំនុកចិត្តជូនប្រជាពលរដ្ឋ ប្រកប​ដោយគុណភាព ប្រសិទ្ធភាព និងសុវតិ្ថភាព ទន្ទឹមនឹងនោះអាណាព្យាបាលទាំងអស់ ដែលមាន​កូនតូចៗ មានបញ្ហាសុខភាពប្រញាប់យកកូនៗ​ មកពិគ្រោះ ពិនិត្យ ព្យាបាលជំងឺឲ្យ​ទាន់ពេលវេលា និងជាពិសេសមកទទួលថ្នាំបង្ការឲ្យបានគ្រប់មុខ។

ក្នុងនោះ មុន និងក្រោយ ទទួលយកថ្នាំបង្ការ គឺក្រុមការងារគ្រូពេទ្យ ធ្វើការពិនិត្យលើកុមារ តើកុមារនោះអាចទទួលយកថ្នាំបង្ការ បានដែរ ឬក៏អត់ ជាពិសេសកុមារមានជំងឺ ដូចជាក្តៅខ្លួន ឬក៏មានជំងឺពីកំណើតផ្សេងទៀត ដែលមិនអាចផ្តល់វ៉ាក់សាំងជូនកុមារបាន។ ដូច្នេះសូមស្តាប់ការលើកឡើងរបស់វេជ្ជបណ្ឌិត សេង សុគន្ធា គ្រូពេទ្យព្យាបាលជំងឺទូទៅ ផ្នែកពិគ្រោះជំងឺក្រៅ និងសង្រ្គោះបន្ទាន់ និងផ្តល់ប្រឹក្សាដល់កុមា មុននិងចាក់វ៉ាក់សាំង និងអ្នគ្រូ ឃិន ឡៃហេង តំណាងប្រធានក្រុមចាក់វ៉ាក់សាំងកុមារ ចាប់ពីកុមារទើបនឹងកើត រហូតដល់១៨ខែ ។

ជាមួយគ្នានោះអាណាព្យាបាល មកពីបណ្តារាជធានី-ខេត្ត បាននាំយកកូនៗ មកចាក់វ៉ាក់សាំង​បង្ការជំងឺ ពីក្រុមការងារគ្រូពេទ្យ នៃមនី្ទរពេទ្យកុមារជាតិ បានលើកឡើងស្រដៀងគ្នាថា ក្មេងអាចប្រឈម​នឹងជំងឺច្រើន ទន្ទឹមនឹងនេះក្នុងនាមអាណាព្យាបាលគ្រប់រូប ដែលមានកូនតូច ត្រូវតែយកទារក និងកូនៗ ទើបនឹងកើត មកចាក់វ៉ាក់សាំងបង្ការជំងឺ ឲ្យបានទៀងទាត់ តាម​ពេលវេលា​កំណត់របស់មនី្ទរពេទ្យ ដើម្បីឲ្យសុខភាពរបស់កូនបានល្អប្រសើរ កុំដល់ពេលកូនៗ​ធំឡើង​មានបញ្ហាកើតនូវជំងឺរលាកស្រោម ស្វិតដៃជើង និងជំងឺផ្សេងៗនោះ។ ដូច្នេះត្រូវតែនាំកូនៗមកចាក់វ៉ាក់សាំងបង្ការ ដើម្បីទប់ស្កាត់កុំឲ្យវាកើតឡើងចំពោះកូន នាពេលអនាគត។

សូមបញ្ជាក់ផងដែរថា បើយោងតាមទិន្នន័យ នៃរបាយការណ៍សមិទ្ធផលសុខាភិបាល ឆ្នាំ២០១៨-២០២២ និងទិសដៅការងារឆ្នាំ២០២៣ ​និងឆ្នាំបន្ត បានបញ្ជាក់ថា ការផ្តល់វ៉ាក់សាំង/ផ្តល់ថ្នាំបង្ការជំងឺ នៃអត្រាគ្របដណ្តប់នៃវ៉ាក់សាំង៖ បច្ចុប្បន្នកម្មវិធីជាតិផ្តល់ថ្នាំបង្ការបាននិងកំពុងផ្តល់វ៉ាក់សាំង​បង្ការ​ចំនួន ១២ មុខ ជាប្រចាំ ដល់កុមារចំណុចអាយុក្រោមមួយឆ្នាំ រួមមាន៖ វ៉ាក់សាំងបង្ការជំងឺរបេង ខាន់ស្លាក់ ក្អកមាន់ តេតាណូស គ្រុនស្វិតដៃជើង កញ្រ្ជឹល រលាកថ្លើម ប្រភេទបេ (បញ្ចូលនៅឆ្នាំ២០០១) និងរលាកស្រោមខួរក្បាល (បញ្ចូលនៅ ឆ្នាំ២០១០) រលាកសួត-ស្ទូច (បញ្ចូលនៅឆ្នាំ២០១០និង២០១៣) ​និងវ៉ាក់សាំងបង្ការជំងឺមហារីកមាត់ស្បូនលើកុមារី អាយុក្រោម១២ឆ្នាំ នៅឆ្នាំ២០១៧។

អត្រាគ្របដណ្តប់នៃវ៉ាក់សាំងបង្ការជំងឺខាន់ស្លាក់-ក្អកមាន់-តេតាណូស-រលាកថ្លើមប្រភេទបេ-រលាកសួត-រលាកស្រោមខួរ ៣លើក លើកុមារអាយុក្រោម១ឆ្នាំ ត្រូវបានរក្សា អត្រាខ្ពស់ លើសពី៩៥% ក្នុងរយៈពេល១០ឆ្នាំចុងក្រោយ៕អត្ថបទ រដ្ឋា