ភ្នំពេញ៖ ក្រសួងវប្បធម៌ និងវិចិត្រសិល្បៈ ជំរុញសិប្បកម្មចំលាក់រូប ពុទ្ធបដិមា និងចម្លាក់រូប​នានាទៀត ត្រូវអនុវត្តតាមក្បួនខ្នាតដែលជារបស់ខ្មែរ ហើយក្បួនខ្នាតចម្លាក់រូប​ទាំងអស់​គឺអាចទៅ​ធ្វើពុម្ព​ចម្លង​តាមរូបសំណាកនានាដែលមាននៅក្នុងតម្កល់នៅក្នុងសារមន្ទីរជាតិ។

បើតាមឯកឧត្តម ឡុង ប៉ុណ្ណាសិរីវត្ថ អ្នកនាំពាក្យក្រសួងក្រសួងវប្បធម៌ ​និងវិចិត្រសិល្បៈ បានថ្លែង​ប្រាប់BTV នៅថ្ងៃទី១០ ខែមីនានេះ បានថ្លែងថា ពាក់ព័ន្ធនឹងចម្លាក់ពុទ្ធបដិមា , រូបព្រះបាទជ័យវរ្ម័នទី៧ និងសំណាក់សម្តេចសង្ឃ ជួន ណាត និងរូបសំណាក់ព្រះសិវៈជាដើម កន្លងមក​ក្រសួងវប្បធម៌ និងវិចិត្រសិល្បៈ គឺបានរៀបចំសិក្ខាសាលាវគ្គបណ្តុះបណ្តាលចម្លាក់រូបជូន​ដល់បណ្តាអ្នកចម្លាក់រូបជាច្រើននៅតាមបណ្តាសិប្បកម្មចម្លាក់រូបនានា ហើយក្រសួងក៏សូមក្រើន​រំលឹកហាមប្រាមមិនឲ្យអ្នកចម្លាក់រូប យកតាមក្បួនខា្នតបរទេស ដែលធ្វើឲ្យខុសពីក្បាច់​ក្បួនទំរង់របស់ខ្មែរ។

បើតាមអ្នកចម្លាក់រូបនៅតាមបណ្តាសិប្បកម្មចម្លាក់រូបនៅក្នុងនៅរាជធានីភ្នំពេញ ថ្លែងថា ពាក់ព័ន្ធ​នឹងការចម្លាក់រូបព្រះពុទ្ធភាគច្រើនគឺគេយកទម្រង់តាមសម័យបាយ័ន​ និងសម័យអង្គរ ដែលមាន​ការណែនាំក្រសួងវប្បធម៌និងវិចិត្រសិល្បៈ ​ទៅតាមទម្រង់ពុម្ពដែលមានស្រាប់ ប៉ុន្តែសម្រាប់ការ​ដាប់ថ្មចម្លាក់រូបភាគច្រើនគឺគេធ្វើតាមក្បួនខ្នាត ​និងមិនអាចចេញរូបដូចបាន១០០%នោះទេ។

សូមបញ្ជាក់ថា រូបចម្លាក់ពុទ្ធបដិមា រូបព្រះបាទជ័យវរ្ម័នទី៧ និងសំណាក់សម្តេចសង្ឈជួន ណាត និងរូបសំណាក់​ព្រះសិវៈជាដើម ពលរដ្ឋខ្មែរភាគច្រើន មានតម្រូវការខ្លាំងក្នុងការជាវទិញដាក់​នៅតាម​ទីវត្តអារ៉ាម តាមទីទួលបុរាណ ​តាមមូលដ្ឋានអាជីវកម្ម តាមគេហដ្ឋាន និង​ទីសាធារណៈនានា​ទៀតជាច្រើន​ ដែលការជាវទិញដាក់តាំងនោះ ក្រសួងវប្បធម៌ ស្នើសុំទាំងអ្នក​ចម្លាក់រូប និងអ្នកជាវទិញ សូមជាវទិញដាក់តាំងរូបសំណាក ​ដែលរក្សាតាមទម្រង់បែបបទជាខ្មែរ ចៀសវាងចម្លងក្បួនខ្នាតពីបរទេស​ ដែលធ្វើឲ្យមានភ័ណ្ឌច្រឡំ និងចម្លងវប្បធម៌បរទេស៕អត្ថបទ ស៊ុមសុខជា