​បាល់ទាត់៖ ​កាលពី​ខែ​ធ្នូ​មាន​អ្នកគាំទ្រ​មិន​ច្រើន​នាក់​ទេ​ដែល​គិត​ថា Barcelona នឹង​អាច​ប្រជែង​តំណែង​ឡើង​មក​កំពូល​តារាង La Liga​ វិញ​បាន​បន្ទាប់ពី​ការ​ចាប់ផ្តើម​រដូវ​កាល​ដ៏​អាក្រក់​បំផុត​។ ​នៅ​សល់ ៦ប្រកួត​ទៀត​នឹង​ចប់​រដូវ​កាល ២០២០-២០២១ នេះ ​តែ​សំរាប់ Barcelona នៅ​សល់ ៧ប្រកួត​ ខណៈ​ក្រុម​របស់​លោក Ronald Koeman ​នឹង​ប្រកួត​បង្គ្រប់​សប្តាហ៍​ទី​៣២ រាត្រី​ថ្ងៃ​ព្រហស្បតិ៍​នេះ​ ហើយ​ជ័យ​ជំនះ​នឹង​ធ្វើ​ឲ្យ​ពួកគេ​វិល​មក​ឈរ​កំពូល​តារាង​វិញ​។​

​​ជ័យជំនះ ២-១ នៅ​ទឹកដី Villarreal កាលពី​ថ្ងៃ​សៅរ៍​​ ស្របពេល Real Madrid ស្មើ Betis ផ្ទះ​ខ្លួនឯង​ ហើយ Atletico Madrid ចាញ់​នៅផ្ទះ Athletic Bilbao ទៀត​នោះ​ធ្វើអោយ Barcelona ស្មើ​ពិន្ទុ​គ្នា​ជាមួយ Real Madrid និង​ដេញ​ពីក្រោយ Atletico Madrid ២ពិន្ទុ ដូច្នេះ​ជ័យជំនះ​យប់​នេះ Barcelona នឹង​ឡើង​កំពូល​តារាង​វិញ​ពីលើ​ក្រុម​របស់លោក Diego Simeone ១ពិន្ទុ​។ ​នេះ​ជាការ​ងើប​ពី​ការចាប់ផ្តើម​រដូវ​កាល​អាក្រក់​បំផុត​របស់ Barcelona បែរជា​មកដល់​កំរិត​នេះ​ក្រោយ ២១ប្រកួត ចាញ់​តែ ១ប្រកួត​គត់​គឺ​ចាញ់ Real Madrid​។

​​កីឡាករ​សំខាន់ៗ​របស់ Barcelona សុទ្ធតែ​គ្មាន​បញ្ហា​របួស​ទាំងអស់ ​ស្របពេល​ខ្សែប្រយុទ្ធ​ជួរមុខ​ទាំង​ពីរ Antoine Griezmann ​និង Lionel Messi សុទ្ធតែ​ស្ថិតក្នុង​ទំរង់​លេង​ល្អ​។​ បន្ទាប់ពី​ជួប Grenada ហើយ Barcelona នឹងត្រូវ​ជួប​ជាមួយ Atletico Madrid ដប់​ថ្ងៃ​បន្ទាប់​ដែល​អាច​និយាយបានថា​ ជា​ប្រកួត​កាត់​សេចក្តី​រវាង​ក្រុម​ទាំងពីរ​៕

​អត្ថបទ​៖​នាង សុភា​វុ​ធ