​​ម៉ាឡេស៊ី៖ អតីត​នាយករដ្ឋមន្ត្រី​ម៉ាឡេស៊ី​លោក Muhyiddin Yassin បាន​មកដល់​តុលាការ​ទីក្រុង Kuala Lumpur នៅ​ថ្ងៃ​សុក្រ​នេះ ដើម្បី​ប្រឈមមុខ​ការចោទប្រកាន់​ពាក់ព័ន្ធ ​នឹង​ការប្រើប្រាស់​មូលនិធិ​រដ្ឋាភិបាល​មិន​ត្រឹមត្រូវ​។ ​

​គណៈកម្មាធិការ​ប្រឆាំង​អំពើពុករលួយ​ប្រទេស​ម៉ាឡេស៊ី (MACC) បាន​និយាយ​ថា លោក Muhyiddin Yassin នឹង​ត្រូវបាន​ចោទប្រកាន់​ក្រោម​ច្បាប់​ទាក់ទង​នឹង​ការរំលោភ​អំណាច និង​ការ​លាង​លុយ​ ជុំវិញ​គម្រោង​ស្តារ​សេដ្ឋកិច្ច​ឡើងវិញ​ដែល​ចាប់ផ្តើម​ដោយ​រដ្ឋាភិបាល​របស់​លោក​។ លោក Muhyiddin បាន​ចាត់​ទុក​ទង្វើ​នេះ​ថា​ ជា​ការ​ធ្វើទុក្ខបុកម្នេញ​ផ្នែក​នយោបាយ​។ ការចោទប្រកាន់​នេះ​ធ្វើឡើង​រយៈ​បី​ខែ បន្ទាប់ពី​លោក Muhyiddin បាន​បរាជ័យ​ក្នុង​ការ​បោះឆ្នោត​សកល​ ដែល​ប្រជែង​យ៉ាង​ស្វិតស្វាញ​ជាមួយ​នាយករដ្ឋមន្ត្រី​បច្ចុប្បន្ន​លោក Anwar Ibrahim ហើយ​ទំនងជា​បង្កើន​ភាព​តានតឹង​ផ្នែក​នយោបាយ​នៅ​ក្នុង​ប្រទេស​ម៉ាឡេស៊ី ដែល​បាន​ឃើញ​នាយករដ្ឋមន្ត្រី​ចំនួន ៤​រូប​ចាប់​តាំងពី​ឆ្នាំ​២០១៨​ មក។​

​ជា​នាយករដ្ឋមន្ត្រី​រយៈ​ពេល ​១៧​ខែ​ចន្លោះ​ឆ្នាំ​២០២០ និង​២០២១ លោក Muhyuddin គឺជា​មេដឹកនាំ​ម៉ាឡេស៊ី​ទី២ ដែល​ត្រូវ​បាន​ចោទប្រកាន់​ពី​បទ​ព្រហ្មទណ្ឌបន្ទាប់ពី​បាត់បង់​អំណាច​។ ក្នុង​ឆ្នាំ២០១៨ លោក Najib Razak បាន​ប្រឈមមុខ​នឹង​បទចោទប្រកាន់​ជាច្រើន​ជុំវិញ​រឿងអាស្រូវ​ពុករលួយ​ មាន​ទឹក​ប្រាក់​រាប់ពាន់​លាន​ដុល្លារ​ក្នុង​មូលនិធិ​រដ្ឋ 1MDB ហើយ​ចាប់​តាំងពី​ពេល​នោះ​មក​បាន​ជាប់​ពន្ធនាគារ​៕

អត្ថបទ៖ ប៊ុនថន