ភ្នំពេញ ៖ ឯកឧត្តម ប៉ាន សូស័ក្តិ ក្នុងអំឡុងពេលសន្និសីទអង្គការសហប្រជាជាតិលើកទី៥ ស្ដីពីក្រុម​ប្រទេស​អភិវឌ្ឍន៍​តិចតួច (LDC5) កាលពីថ្ងៃទី៨ ខែមីនាកន្លងទៅ បានដឹកនាំកិច្ចប្រជុំតុមូលជាន់ខ្ពស់ ស្ដីពីការចល័តធនធាន និង​ការពង្រឹងភាពជាដៃគូសកល ដើម្បីការអភិវឌ្ឍន៍ប្រកបដោយចីរភាពក្នុងប្រទេសអភិវឌ្ឍន៍តិចតួច ដែល​ប្រព្រឹត្តទៅ​នៅទីក្រុងដូហា ប្រទេសកាតា។

​ប្រភពពីក្រសួងពាណិជ្ជកម្ម នៅព្រឹកថ្ងៃទី១០ មីនា ឆ្នាំ២០២៣នេះ បានឲ្យដឹងក្នុងបណ្តាញសង្គមថា កិច្ចប្រ​ជុំតុមូល​ជាន់ខ្ពស់​នេះ ដឹកនាំដោយសហប្រធានពីររូប គឺឯកឧត្តមរដ្ឋមន្ដ្រីក្រសួងពាណិជ្ជកម្មកម្ពុជា និងលោកជំទាវ Fitsum Assefa រដ្ឋមន្ដ្រីក្រសួងផែនការនិងអភិវឌ្ឍន៍នៃប្រទេស Ethiopia ព្រមទាំងមានការ​ចូលរួមជាវាគ្មិន​ពីបណ្ដា​រដ្ឋសមាជិក​​​ និងស្ថាប័នអន្ដរជាតិនានា។

នៅក្នុងអង្គប្រជុំនេះ ឯកឧត្តមរដ្ឋមន្រ្តី ប៉ាន សូរស័ក្តិ បានថ្លែងស្វាគមន៍វាគ្មិន និងរដ្ឋសមាជិកដែល​បានចូលរួមកិច្ច​ប្រជុំតុមូលជាន់ខ្ពស់នេះ ព្រមទាំងបានកត់សម្គាល់អំពីការពឹងផ្អែកយ៉ាងខ្លាំងលើធនធានសាធារណៈ ដើម្បី​ធ្វើ​ហិរញ្ញប្បទានក្នុងការឆ្លើយតបនឹងតម្រូវការអភិវឌ្ឍន៍ប្រកបដោយចីរភាព និងឆ្លើយតបនឹងវិបត្តិ ដែលប្រទេស​អភិវឌ្ឍន៍តិចតួច និងពិភពលោកកំពុងជួបប្រទះ។ ជាកិច្ចបន្ទាប់ ឯកឧត្តម និងលោកជំទាវសហប្រធាន បាន​ប្រគល់វេទិកាជូនវាគ្មិន ដើម្បីលើកជាមតិយោបល់ និងពិភាក្សាពាក់ព័ន្ធនឹងការចល័តធនធាន និងការពង្រឹង​ភាពជាដៃគូសកលដើម្បីការអភិវឌ្ឍន៍ប្រកបដោយចីរភាពក្នុងប្រទេសអភិវឌ្ឍន៍តិចតួច។

វាគ្មិនបានពិភាក្សាយ៉ាងផុសផុល ដោយផ្ដោតលើបញ្ហាប្រឈមមួយចំនួនរបស់ប្រទេសប្រទេសអភិវឌ្ឍន៍តិចតួច រួមមាន ធនធានក្នុងប្រទេសមានកំណត់, បន្ទុកបំណុលកាន់តែខ្លាំង និងលទ្ធភាពក្នុងការទាញ​យកប្រយោជន៍​ពីទីផ្សារហិរញ្ញវត្ថុ។ ដំណោះស្រាយឆ្លើយតបនឹងបញ្ហានេះ គឺត្រូវពង្រឹងសមត្ថភាពប្រទេស LDCs ក្នុងវិស័យ​រដ្ឋបាលពន្ធដារ, ការប្រើប្រាស់ធនធានក្នុងស្រុកប្រកបដោយប្រសិទ្ធភាព និងប្រសិទ្ធផល, ការទប់ទល់​នឹងលំហូរ​ហិរញ្ញវត្ថុខុសច្បាប់, ការចល័តការសន្សំ និងស្ថាប័នហិរញ្ញវត្ថុក្នុងស្រុក។

ក្រសួងពាណិជ្ជកម្ម បានបញ្ជាក់ថា កិច្ចប្រជុំខាងលើនេះ បានប្រព្រឹត្តទៅដោយមានភាពជោគជ័យ និងទទួល​បាន​នូវធាតុចូលសំខាន់ៗសម្រាប់ប្រទេសប្រទេសអភិវឌ្ឍន៍តិចតួច និងដៃគូអភិវឌ្ឍន៍​ក្នុងការជួយគាំទ្រលើការចល័ត និងប្រើប្រាស់ធនធានឱ្យមានប្រសិទ្ធភាព សម្រាប់បម្រើដល់ការអភិវឌ្ឍប្រកបដោយនិរន្ដរភាព។

នៅកិច្ចបញ្ចប់ លោកជំទាវសហប្រធានអង្គប្រជុំ បានវាយតម្លៃខ្ពស់លើលទ្ធផលនៃកិច្ចពិភាក្សា​ប្រកបដោយផ្លែផ្កា​របស់វាគ្មិន និងរដ្ឋសមាជិកផងដែរ៕ អត្ថបទ​ ៖ ឈិត បូរ៉ាវី ​