កំពង់ឆ្នាំង ៖ នៅក្នុងទិវាសិទ្ធិនារី ០៨ មីនា ក្នុងសាលាស្រុករលាប្អៀរ ក្រោមប្រធានបទ «ស្ត្រីរួមគ្នា រក្សាសុខសន្តិភាព ដើម្បីកិច្ចអភិវឌ្ឍ ក្នុងយុគសម័យឌីជីថល» នាថ្ងៃទី១០ ខែមីនា ឆ្នាំ២០២៣នេះ ឯកឧត្តម ស៊ុន សុវណ្ណារិទ្ធិ អភិបាល​ខេត្តកំពង់ឆ្នាំង បានជំរុញអោយយុវជនជំនាន់ក្រោយខិតខំថែរក្សាយ៉ាងម៉ត់ចត់ នូវសុខសន្តិភាព ស្ថេរភាពនយោបាយ និងការអភិវឌ្ឍឥតឈប់ឈរជាមួយរាជរដ្ឋាភិបាលស្របច្បាប់ ចំណែកស្រ្តីក៏ជាតួអង្គយ៉ាង​សំខាន់ក្នុងការ​ថែរក្សា​សុខសន្តិភាព ការអភិវឌ្ឍន៍ដូចបុរសផងដែរ។

ឯកឧត្តមបានបន្តថា ៖ យើងត្រូវរួមគ្នាបន្តលើកកម្ពស់ និងជំរុញការអនុវត្តគោលនយោបាយពង្រឹង សមភាពយេនឌ័រ​របស់រាជរដ្ឋាភិបាល ដែលចាត់ទុកស្រ្តីជាឆ្អឹងខ្នងនៃការអភិវឌ្ឍសេដ្ឋកិច្ច និងសង្គមជាតិ និងការងារបញ្ជ្រាបយេនឌ័រ ដែលជាកិច្ចការអន្តរវិស័យ ក្នុងការធានាបាននូវចីរភាពនៃសុខសន្តិភាព និងពន្លឿន ល្បឿននៃកិច្ចអភិវឌ្ឍជាតិ ជាពិសេសក្នុងយុគសម័យឌីជីថល។ ការយកចិត្តទុកដាក់ និងការពង្រឹងសមភាពយេនឌ័រ នៅតែបន្តជាកិច្ចការអាទិភាព ដើម្បីធានាថា ស្រ្តី និងក្មេងស្រីគ្រប់រួបទទួលបានសមភាពនៅក្នុងគ្រប់ទិដ្ឋភាព ទៅនៅក្នុងវិស័យនយោបាយ សេដ្ឋកិច្ច និងសង្គមកិច្ច ព្រមទាំងអនុវត្តសិទ្ធិ ចូលរួមដោយស្មើភាព ជាធនធានដ៏មានតម្លៃ និងជាដៃគូមិនអាចខ្វះបាន ជាមួយបុរស ក្នុងការអភិវឌ្ឍប្រទេសជាតិ និងរស់នៅក្នុងសង្គម ដោយភាពថ្លៃថ្នូរ ជីវភាពល្អប្រសើរ និងប្រកប ដោយសុខុមាលភាព។

 ការលើកកម្ពស់សេដ្ឋកិច្ចដែលគិតគូរសុខុមាលភាព ដោយផ្តោតការទទួលស្គាល់ និងឆ្លើយតបនឹងការ ថែទាំមិនមាន​ប្រាក់កម្រៃ រួមទាំងការងារដែលផ្តោតលើការថែរក្សាសុខុមាលភាពសង្គម និងការបង្កើនការ​វិនិយោគ​សាធារណៈ​លើវិស័យនេះ គឺជាសក្តានុពលថ្មីដ៏សំខាន់មួយ សម្រាប់ការឈានទៅសម្រេចសមភាពយេនឌ័រផង និងដើម្បីពង្រីក​វិសាលភាពនៃសេដ្ឋកិច្ចដែលគិតគូរទៅលើសុខុមាលភាពសង្គមផង៕ ដោយ ៖ ហុង វាស្នា