ភ្នំពេញ៖ ទិវាជាតិអំណានតែងរៀបចំឡើងរៀងរាល់ឆ្នាំ ក្រោមប្រធានបទផ្សេងៗគ្នា ពីមួយឆ្នាំទៅមួយឆ្នាំ។ សម្រាប់ទិវាជាតិអំណានលើកទី៨ ក្នុងឆ្នាំ ២០២៣នេះ រៀបចំឡើងក្រោមប្រធានបទ “ អំណានជាមាគ៌ាឆ្ពោះទៅបរិវត្តកម្មវិស័យអប់រំ”។

ក្រសួងអប់រំ យុវជន និងកីឡា បានរៀបចំទិវាជាតិអំណានលើកទី ៨ ដោយការចាប់ផ្ដើមជាផ្លូវការ​រៀបចំឡើងនៅថ្ងៃទី ១១ ខែមីនា ឆ្នាំ ២០២៣នៅទីតាំងវិទ្យាស្ថានបច្ចេកវិទ្យាកម្ពុជា។ ទិវាជាតិអំណាន​ គឺមានរៀបចំឡើងដោយភ្ជាប់ជាមួយសកម្មភាពសំខាន់ៗជាច្រើន ជាពិសេស​គឺការ​ពិព័រណ៍ដែលមានការចូលរួមពី បណ្ដាអ្នកនិពន្ធ ក៏ដូចជា បណ្ដាគ្រឹះស្ថានបោះពុម្ពផ្សាយ។ សម្រាប់ការចាប់ផ្ដើមទិវាជាតិអំណានលើកទី ៨នេះ ឯកឧត្តម ហង់ ជួនណារ៉ុន រដ្ឋមន្រ្តីក្រសួងអប់រំ យុវជន និងកីឡា លើកឡើងថា ប្រធានបទសម្រាប់ឆ្នាំនេះគឺ “ អំណានជាមាគ៌ាឆ្ពោះទៅបរិវត្តកម្មវិស័យអប់រំ” ។

ឯកឧត្តម ពន្យល់បន្ថែមថា ប្រធានបទនេះមានគោលដៅឆ្លុះបញ្ចាំងពីអំណាន ជាមាគ៌ាជំរុញឱ្យ​មានការ​ផ្លាស់ប្ដូរទស្សនវិស័យ ​ការគិតនិងការប្រតិបត្តិនៃបរិស្ថានជុំវិញ ដើម្បីឆ្លើយតបទៅនឹង​ការវិវដ្តរបស់សង្គមសេដ្ឋកិច្ច រួមទាំងវិស័យមនុស្ស។

ឯកឧត្តមបន្តថា ខណៈអំណានមានការផ្លាស់ប្ដូរឥរិយាបថ តម្រូវការ ការផ្គត់ផ្គង់ ​វិស័យអប់រំ ក៏ត្រូវមានការឆ្លើយតបពិសេសក្នុងបរិបទ ឌីជីថលវូបនីយកម្ម។

នាឱកាសបើកទិវាជាតិអំណាននេះ លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្តី រដ្ឋមន្រ្តីក្រសួងទំនាក់ទំនង​ជាមួយរដ្ឋសភា ព្រឹទ្ធសភា​ បានមានប្រសាសន៍គាំទ្រដល់ប្រធានបទ​នៃទិវាជាតិអំណានលលើកទី៨ នេះ។

លោកជំទាវបញ្ជាក់ថា ​វាពិតជាឆ្លុះបញ្ចាំងពីសារៈសំខាន់របស់អំណាន ក្នុងការអភិវឌ្ឍធនធាន​មនុស្ស ប្រកបដោយសមត្ថភាព និងគុណសម្បត្តិគ្រប់ផ្នែក ព្រមទាំងមានតុល្យភាពរវាងវិជ្ជាសម្បទា បំណិនសម្បទា ចរិយាសម្បទា កាយសម្បទា និងមនសិការស្នេហាជាតិ។ ម៉្យាងទៀត ប្រធានបទនេះ ពិតជាត្រឹមត្រូវស្របតាមកាលៈទេសៈបច្ចុប្បន្ន ​នៅចំពេលដែលសង្គមជាតិយើង ក៏ដូចជាពិភពលោកទាំងមូលកំពុងមានការប្រែប្រួលយ៉ាងឆាប់រហ័សក្នុងវិស័យអប់រំ ។

ក្នុងទិវាជាតិអំណាននេះ ក៏មានសកម្មភាពពីការពិព័រណ៍សៀវភៅផងដែរ។​ ពិព័រណ៍សៀវភៅនេះ ជាសកម្មភាពដែលមានគាំទ្រច្រើន ពីយុវជន ជាសិស្សនិស្សិត ​ក៏ដូចជាអាណាព្យាបាលជាច្រើន។ ជាក់ស្ដែង ​ទាំងអាណាព្យាបាល និងសិស្សនិស្សិតពិតជាគាំទ្រ និងលើកឡើងថា ការអានពិតជា​មានសារៈសំខាន់បំផុតក្នុងការអភិវឌ្ឍខ្លួនឯង ពង្រីកចំនេះដឹងឱ្យកាន់តែប្រសើរ។

គួរបញ្ជាក់ដែរថា ទិវាជាតិអំណាន ក៏រៀបចំឡើងដើម្បី រំឭកដល់វីរភាព​ និងគុណូបការៈរបស់ សម្តេចព្រះសង្ឃរាជ ជួន ណាត ដែលបានខិតខំតស៊ូ ពុះពារការពារមរតកវប្បធម៌, អក្សរសាស្រ្តខ្មែរ, និងក្នុងគោលបំណងបណ្តុះទម្លាប់អាន, ជំរុញវប្បធម៌អាន,​ លើកកម្ពស់សមត្ថភាពអាន, ការតែង​និពន្ធ, និងការស្រាវជ្រាវ សំដៅរួមចំណែកការពារ និងលើកកម្ពស់វប្បធម៌, អរិយធម៌ខ្មែរ ព្រមទាំងពង្រីកចំណេះដឹងដល់ពលរដ្ឋកម្ពុជាគ្រប់រូប៕អត្ថបទ៖ គឹមហុក