ភ្នំពេញ៖ គណបក្សប្រជាជនកម្ពុជា បណ្តុះបណ្តាលដល់យុវជន ដើម្បីពង្រីកសមត្ថភាព, បំពាក់​បំប៉ន​ការ​យល់ដឹងផ្នែកច្បាប់ និងនីតិវិធីបោះឆ្នោត, ពង្រឹងស្មារតីទទួលខុសត្រូវ និងសាមគ្គីភាព​របស់​មន្ត្រី​បក្ស, ជាពិសេសយុវជនបក្ស, ក្នុងក្របខណ្ឌ​នៃ​យុទ្ធនាការ​ត្រៀម​លក្ខណៈ​ឱ្យ​បាន​ពេញ​លេញ សំដៅដណ្តើមជ័យជម្នះក្នុងការបោះឆ្នោតសកលថ្នាក់ជាតិនាពេលដ៏ខ្លីខាងមុខ។

ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន សមាជិក​គណៈអចិន្ត្រៃយ៍​គណៈកម្មាធិការ​កណ្តាល គណបក្សប្រជាជនកម្ពុជា និង ជាប្រធានគណៈកម្មាធិការគណបក្សប្រជាជនកម្ពុជា លើក​ឡើង​នៅក្នុងពិធីបើក «កម្មវិធីបណ្តុះបណ្តាល ស្តីពីយុវជនឆ្ពោះទៅកាន់ការបោះឆ្នោត» នៃ​ក្រសួង​សេដ្ឋកិច្ច និងហិរញ្ញវត្ថុ នៅ (គ៨៥) ថ្ងៃទី ១១ ខែ មីនា ឆ្នាំ ២០២៣ នេះថា ការ​ពង្រឹង​សមត្ថភាព និងការពង្រីកចំណេះដឹង គឺជាកិច្ចការដែលគប្បីត្រូវធ្វើឡើងជាបន្តបន្ទាប់ ស្រប​តាម​ពាក្យ​ស្លោក «រៀនឥតឈប់» ឬ «រៀនពេញមួយជីវិត» ។ គោលការណ៍នេះគួរត្រូវបានប្រកាន់ខ្ជាប់, ទាំងក្នុងក្របខណ្ឌគណបក្ស និងក្នុងក្របខណ្ឌរដ្ឋ, ដែល​មានន័យថា យើងទាំងអស់គ្នាមិនត្រូវស្កប់ស្កល់ ឬលង់លក់នឹងសមិទ្ធផល ក៏​ដូច​ជា​ជ័យ​ជម្នះ​របស់​យើងឡើយ ។ ក្នុងន័យនេះ, សម្ដេចតេជោ ហ៊ុន សែន នាយករដ្ឋមន្ត្រី និងជា​ប្រធាន​គណបក្ស​ប្រជាជន​កម្ពុជា តែងតែដាស់តឿនគ្រប់គ្នាថា គណបក្សប្រជាជនកម្ពុជា ត្រូវ​តែ​ខិតខំ​ប្រឹង​ប្រែង​បម្រើប្រជាពលរដ្ឋ ឱ្យបានកាន់តែប្រសើរឡើងជាលំដាប់ ដើម្បីឱ្យ​សក្ដិ​សម​ទៅ​នឹង​ការ​ផ្ដល់​សេចក្ដីទុកចិត្តដ៏ធំធេង ពីសំណាក់ប្រជាពលរដ្ឋនៅក្នុងការបោះឆ្នោត ។ បើក្រឡេក​មើល​ទៅ​ក្រោយ ក្នុងរយៈពេល ៥ ឆ្នាំ នៃអាណត្តិទី ៦, គណបក្ស​ពិត​ជា​បាន​សម្រេច​នូវ​សមិទ្ធ​ផល​ជា​ច្រើន​ជូន​ប្រជាជន និងប្រទេសជាតិ ។

ជុំវិញបញ្ហានេះ ឯកឧត្តមអគ្គបណ្ឌិតសភាចារ្យ បានចែករំលែកជាទស្សនាទាន ដល់​យុវជន​គណបក្ស នៃក្រសួងសេដ្ឋកិច្ច និងហិរញ្ញវត្ថុ សម្រាប់ការបំពេញការងារ, ទាំងក្នុងការងារគណបក្ស និង​ការងាររដ្ឋ, ជាពិសេសក្នុងយុទ្ធនាការឃោសនាបោះឆ្នោតជ្រើសតាំងតំណាងរាស្ត្រនីតិកាលទី ៧ នៃរដ្ឋសភា នាពេលដ៏ខ្លីខាងមុខរួមមាន៖ ត្រូវរួមគ្នាថែរក្សា និងការពារនូវ «សុខសន្ដិភាព, ស្ថិរភាព​សង្គម និងស្ថិរភាព នយោបាយ» ដែលជាបុព្វហេតុ និងជាគុណ​តម្លៃ​ខ្ពស់​បំផុត​របស់​ប្រទេស​ជាតិ និងរបស់គណបក្សប្រជាជនកម្ពុជា ពីព្រោះសុខសន្ដិភាព និងស្ថិរភាព​ដែល​យើង​រក​មក​វិញ​បាន​ដោយលំបាក គឺជាមូលដ្ឋានគ្រឹះ និងជាបុរេលក្ខណៈមិនអាចខ្វះបាន ដើម្បីធានា​នូវ​កិច្ច​ដំណើរ​ការ ជាប្រក្រតីនៃជីវភាពរស់នៅ, ការអភិវឌ្ឍ និងភាពជឿនលឿនរបស់សង្គមកម្ពុជា។ ត្រូវ​តម្កល់ និងលើកកម្ពស់មនសិការស្នេហាជាតិ ក្នុងសា្មរតីថែរក្សា និង​ការពារ​ឧត្តម​ប្រយោជន៍​ជាតិ និងឧត្តមប្រយោជន៍ប្រជាជន ។ ឧត្តមប្រយោជន៍រួមទាំងនេះ ត្រូវ​តែមា​ន​តម្លៃ​ខ្ពស់​ជាង​ផល​ប្រយោជន៍​បុគ្គល ឬផលប្រយោជន៍ក្រុមខ្លួន, ទាំងក្នុងក្របខណ្ឌនៃការបំពេញការងារគណបក្ស និងទាំងក្នុងក្របខណ្ឌនៃការបំពេញមុខងារ និងភារកិច្ចនៅក្នុងស្ថាប័នរដ្ឋ ។ ត្រូវពង្រឹង និង​ពង្រីក​គ្រប់​វេលា, គ្រប់ទីកន្លែង, ក្នុងគ្រប់យន្តការ នូវស្មារតីសាមគ្គីភាព,ជាធ្លុងមួយ ក្នុងន័យនេះ, យុវជន​ម្នាក់ៗ​ត្រូវ​តែហ៊ានបញ្ចេញមតិការពារបុព្វហេតុ, មាគ៌ា, និងគោលនយោបាយរបស់គណបក្ស ក្នុង​ស្មារតីសមូហភាព ។

ត្រូវផ្តល់អាទិភាពខ្ពស់ ដល់ការពង្រឹងសមត្ថភាព និងចំណេះដឹង, ដើម្បីប្រសិទ្ធភាពការងារ ។ លើ​មូល​ដ្ឋាន​នេះ, យុវជនម្នាក់ៗគប្បីត្រូវប្រកាន់ខ្ជាប់នូវមនសិការខ្ពស់៖ «កសាង និងដឹកនាំ​ខ្លួន​ជា​ប្រយោជន៍​ដល់​ស្ថាប័ន; ដឹកនាំស្ថាប័ន ជាប្រយោជន៍ដល់សង្គមជាតិ» ។ ត្រូវពង្រឹង, និ​ង​ផ្សព្វ​ផ្សាយ​នូវ «គុណធម៌, សីលធម៌, វិន័យ និងសេចក្ដីថ្លៃថ្នូរ» របស់មន្ត្រីគណបក្ស, ជាពិ​សេស​យុវជន​ដែល​ជា​ទំពាំង​ស្នងឬស្សី, ឱ្យស័ក្ដិសមជាសមាជិក និងជាអ្នកបន្តវេនរបស់ជាតិ ។ ត្រូវបែរមុខឆ្ពោះទៅកាន់សហគមន៍នៅមូលដ្ឋាន, ទាំងលើការងារគណបក្ស, ការងារអភិវឌ្ឍ និង​គ្រប់​វិស័យរួមបញ្ចូលនូវ៖ ការងារយុវជន, ការពង្រឹងវិស័យអប់រំ, សុខាភិបាល ការងារអនាម័យ និង​បរិស្ថានបៃតងជាដើម និងត្រូវផ្ដោតលើសមិទ្ធកម្ម, ពង្រឹងការទទួលខុសត្រូវ, ធ្វើការងារ​ជា​ប្រព័ន្ធ និងពង្រីកយន្តការត្រួតពិនិត្យ, តាមដាន និងវាយតម្លៃ ដែល​ប្រការ​នេះ​នឹង​ធានា​បាន​នូវ​ការ​វាយ​តម្លៃ​នូវចំណុចខ្លាំង, ចំណុចខ្សោយ និងបញ្ហាប្រឈម ដើម្បីសម្រេច​គោល​នយោបាយ​របស់​គណបក្ស​៕ អត្ថបទ៖ សុន រ៉ាឌី