ភ្នំពេញ៖ មូលនិធិអភិវឌ្ឍន៍សហគ្រិនភាពបង្កើនកម្មវិធីគាំទ្រដល់សហគ្រាសធុនតូច និងមធ្យម និងធុរកិច្ចក្រៅប្រព័ន្ធ ដើម្បីកសាងសមត្ថភាព និងលើកកម្ពស់ទីផ្សារនាំចេញ ជាពិសេសបង្កើនការផ្គត់ផ្គង់វត្ថុធាតុដើម សម្រាប់ផលិតកម្មក្នុងស្រុក ដើម្បីកាត់បន្ថយការនាំចូល។
ឯកឧត្ដម វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី, រដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាបរធនបាលមូលនិធិអភិវឌ្ឍន៍សហគ្រិនភាព នៅក្នុងកិច្ចប្រជុំលើកទី ១៤ នៅថ្ងៃទី៩ ខែ មីនា ឆ្នាំ ២០២៣ នេះ បានដឹកនាំប្រជុំ ដើម្បីដោះស្រាយបញ្ហានានា នៅក្នុងប្រព័ន្ធអេកូឡូស៊ីសហគ្រិនភាពកម្ពុជា ខណៈដែលសេដ្ឋកិច្ចពិភពលោកកំពុងមានការផ្លាស់ប្តូរ ដោយក្នុងនោះទាមទារឱ្យកម្ពុជា បន្តផ្តល់ការយកចិត្តទុកដាក់លើវិស័យសំខាន់ៗ ជាពិសេសពាក់ព័ន្ធនឹងការអភិវឌ្ឍសហគ្រិនភាព ដែលដើរតួនាទីជាកាតាលីករ សម្រាប់កំណើនសេដ្ឋកិច្ច និងការអភិវឌ្ឍន៍។ សហគ្រិនភាព មានសមត្ថភាពបង្កើនភាពប្រកួតប្រជែងរបស់ប្រទេសកម្ពុជា នៅក្នុងទីផ្សារពិភពលោក តាមរយៈការបង្កើតអាជីវកម្មថ្មី ឱកាសការងារប្រកបដោយកាលានុវត្តភាព និងនវានុវត្តន៍ ដោយក្នុងនោះ ក្រុមប្រឹក្សាបរធនបាលមូលនិធិអភិវឌ្ឍន៍សហគ្រិនភាព គឺមានគោលបំណងរៀបចំផែនការបន្ត របស់សហគ្រិនខ្មែរ និងកំណត់ទិសដៅយុទ្ធសាស្រ្តបន្ថែម ដើម្បីបន្តបេសកកម្មចូលរួមកសាងប្រព័ន្ធអេកូឡូស៊ីសហគ្រិនភាពកម្ពុជា ឱ្យមានភាពរស់រវើក។
ជាលទ្ធផល, អង្គប្រជុំបានសម្រេចអនុម័តផែនការសកម្មភាពឆ្នាំ ២០២៣ របស់សហគ្រិនខ្មែរ ដោយបានធ្វើការវាយតម្លៃខ្ពស់ចំពោះការខិតខំអនុវត្តកម្មវិធីគោលសំខាន់ៗចំនួន ៤រួមមាន៖ កម្មវិធីកសាងសមត្ថភាពសហគ្រិន, កម្មវិធីផ្សព្វផ្សាយវប្បធម៌សហគ្រិនភាព, កម្មវិធីបង្កើតបណ្តាញទំនាក់ទំនងធុរកិច្ច កម្មវិធីទីផ្សារ, និងវិនិយោគ ដែលទទួលបានវឌ្ឍនភាពការងារល្អប្រសើរ និងសមិទ្ធផលជាផ្លែផ្កា។
ទន្ទឹមនេះ ក្រុមប្រឹក្សាបរធនបាល ក៏បានផ្ដល់គោលការណ៍ណែនាំបន្ថែម ដល់ក្រុមការងារក្នុងការអនុវត្តកម្មវិធី និងសកម្មភាពរបស់ខ្លួន តាមរយៈអភិក្រម ២ បន្ថែម, ទី១ អភិក្រមទូទៅ៖ ដោយអភិក្រមនេះ អនុវត្តកម្មវិធីដែលមានស្រាប់ និងមានតម្រូវការខ្ពស់ ដើម្បីបន្តគាំទ្រដល់ការអភិវឌ្ឍប្រព័ន្ធអេកូឡូស៊ីសហគ្រិនភាព និង២ អភិក្រមយុទ្ធសាស្រ្ត៖ គឺអនុវត្តកម្មវិធីបន្ថែម ដែលមានចរិតលក្ខណៈយុទ្ធសាស្រ្តអាទិភាព និងមានគោលដៅធានាបាននូវសមិទ្ធផលគួរឱ្យកត់សម្គាល់ ដោយផ្តោតលើការបង្កើតគុណតម្លៃបន្ថែមលើ ផលិតផល, សហគ្រាស និងទីតាំងភូមិសាស្រ្ត ជាក់លាក់ណាមួយ នៅក្នុងវិស័យអាទិភាព។ ទន្ទឹមនឹងនេះ សហគ្រិនខ្មែរ នឹងសិក្សាលទ្ធភាពក្នុងការរៀបចំកម្មវិធី ដើម្បីជួយគាំទ្រដល់ធុរកិច្ចក្រៅប្រព័ន្ធ និងធុរកិច្ចដែលមានសក្តានុពល ក្នុងគោលបំណងផ្សារភ្ជាប់ទីផ្សារនាំចេញផលិតផលក្នុងស្រុក, បង្កើនការផ្គត់ផ្គង់វត្ថុធាតុដើមសម្រាប់ផលិតកម្មក្នុងស្រុក និងកាត់បន្ថយការនាំចូលជាដើម៕ អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
