កំពង់ចាម៖ នៅថ្ងៃទី១១ ខែមីនា ឆ្នាំ២០២៣ នៅសាលប្រជុំទីស្នាក់ការគណបក្សប្រជាជនកម្ពុជា ស្រុកកំពង់សៀម ខេត្តកំពង់ចាម មានរៀបចំពិធីអបអរសាទរទិវារនារីអន្តរជាតិ ៨ មីនា លើកទី១១២ ក្រោមប្រធានបទ ស្រ្តីចូលរួមរក្សាសន្តិភាព ដើម្បីកិច្ចអភិវឌ្ឍក្នុងយុគសម័យថ្មីឌីជីថល ដែលមាន​បងប្អូន​ជាស្រ្តីនិងថ្នាក់ដឹកនាំនៅមូលដ្ឋានចូលរួមប្រមាណ ​៧២២ នាក់។

ពិធីនេះ ធ្វើឡើងក្រោមអធិបតីភាព ឯកឧត្ដម វេង សាខុន រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះមូលដ្ឋាន ស្រុកកំពង់សៀម ខេត្តកំពង់ចាម និងស្រុកតំបែរ ខេត្តត្បូងឃ្មុំ។

នាឱកាសនោះ ឯកឧត្តមរដ្ឋមន្ត្រីប្រតិភូបានពាំនាំនូវការផ្តាំផ្ញើសាកសួរសុខទុក្ខ និងសេចក្តីនឹករលឹក​ពី​សម្តេចតេជោ ហ៊ុន សែន នាយករដ្ឋមន្រ្តី និងសម្តេចកិត្តិព្រឹទ្ធបណ្ឌិត មកជូនបងប្អូនជាស្រ្តី​ទាំង​អស់​នៅទូទាំងស្រុកកំពង់សៀម ​និងជូនពរដល់បងប្អូនជាស្រ្តី​ឱ្យជួបតែពុទ្ធពរទាំង ៤ប្រការ កុំបីឃ្លៀងឃ្លាតឡើយ។

ឯកឧត្តម ក៏បានថ្លែងអំណរគុណ កោតសរសើរ និងវាយតម្លៃខ្ពស់ចំពោះស្រ្តីខ្មែរ ដែលបានធ្វើ​ពលីកម្ម​គ្រប់បែបយ៉ាង ​និងបានបំពេញតួនាទីនិងភារកិច្ចជាស្រ្តីបាន​យ៉ាងល្អប្រពៃដើម្បីសង្គម​និង​គ្រួសារខ្មែរ ដែលស្រ្តីខ្មែរស្ទើរគ្រប់រូបបានធ្វើជា៖ កូនស្រីល្អ, ភរិយាល្អ, ម្តាយល្អ, និងជាជីដូន​ដ៏ល្អប្រពៃ ហើយនិងបានចូលរួមយ៉ាងសកម្ម ក្នុងការអភិវឌ្ឍសង្គម និងការថែរក្សាសុវត្ថិភាព​សង្គមគ្រួសារ​ និងសង្គមកម្ពុជាទាំងមូល ​ជាពិសេសបានចូលរួមយ៉ាង​សកម្មក្នុងការថែរក្សានូវ​សុខ​សន្តិភាព​នៅ​កម្ពុជា​ក្រោមការដឹកនាំដ៏ឈ្លាសវៃរបស់សម្តេចតេជោ នាយករដ្ឋមន្រ្តី និងជាប្រធានគណបក្សប្រជាជនកម្ពុជា ។

ក្នុងឱកាសនោះដែរ ឯកឧត្តម បានគាំទ្រយ៉ាងពេញលេញ ​ចំពោះអនុសាសន៍ដ៏ខ្ពង់ខ្ពស់របស់​សម្តេចតេជោ ចំពោះការងារអាទិភាពចំនួន៨ចំណុច ​ដែលសម្តេច​បាន​គូសរំលេច នៅ​ក្នុងពិធីអបអរ​សាទរទិវា​អន្តរជាតិ ៨មីនា លើកទី១១២ នាថ្ងៃទី៧ ខែមីនា ឆ្នាំ២០២៣ កន្លងទៅថ្មីៗនេះ បាន​អំពាវនាវឲ្យ​គ្រប់​ក្រសួង-ស្ថាប័ន រួមទាំងវិស័យឯកជន​ ទាំងអស់បន្តយកចិត្តទុកដាក់ ​និងជំរុញ ដែល​ចាត់ទុកជា​គោល​​នយោបាយកម្មវិធីជាតិ រួមជាមួយនឹងទាំងកម្មវិធីកែទម្រង់នានាក្របខណ្ឌ​ជាតិគាំពារសង្គម ៕