កំពង់ធំ៖ ព្រឹត្តិការណ៍បុណ្យទន្លេលើកទី៧ នៅខេត្តកំពង់ធំរយៈពេល ៣ថ្ងៃបានទាក់ទាញភ្ញៀវទេសចរ និងប្រជាពលរដ្ឋចូលដើរទស្សនាប្រមាណជាង ១លាន ១២ម៉ឺននាក់ ខណៈព្រឹត្តិការណ៍បុណ្យនេះភ្ញៀវទេសចរកំពុងបន្តលេងនៅថ្ងៃឈប់សំរាកចុងសប្តាហ៍ ២ថ្ងៃបន្ថែមទៀត។
ឯកឧត្តម ថោង ខុន រដ្ឋមន្ត្រីក្រសួងទេសចរណ៍ថ្លែងថា ចាប់ពីថ្ងៃទី៧ ដល់ថ្ងៃទី១០ ខែមីនា ពិធីបុណ្យទន្លេលើកទី៧ នៅខេត្តកំពង់ធំ បានទាក់ទាញភ្ញៀវទេសចរចូលទស្សនាកម្សាន្តប្រមាណ ១,១២៨,៥០០នាក់ ក្នុងនោះមុន ១ថ្ងៃនៃព្រឹត្តិការណ៍បុណ្យទន្លេនៅថ្ងៃទី៧ ខែមីនាមានភ្ញៀវទេសចរចូលទស្សនាមានប្រមាណ ១៨,៥០០នាក់, ថ្ងៃទី៨ ខែមីនាមានប្រមាណ ៣៨៥,០០០នាក់, ថ្ងៃទី៩ ខែមីនាមានប្រមាណ ៤០៥,០០០នាក់ និងថ្ងៃទី១០ ខែមីនា ភ្ញៀវទេសចរចូលទស្សនាមានប្រមាណ ៣២០,០០០នាក់។ ឯកឧត្តមរដ្ឋមន្ត្រី ថោង ខុន ថ្លែងថា ទេសចរដែលចូលទស្សនាបុណ្យទន្លេភាគច្រើនជាភ្ញៀវទេសចរមានស្រាប់នៅក្នុងស្រុក ជាប្រជាពលរដ្ឋមកពីក្រុង-ស្រុកទាំង៩ ទូទាំងខេត្តកំពង់ធំ និងប្រជាពលរដ្ឋមកពីបណ្ដាខេត្តជាប់ព្រំប្រទល់ ពិសេសខេត្តជាប់បឹងទន្លេសាបដូចជាខេត្តសៀមរាម កំពង់ចាម កំពង់ឆ្នាំង ព្រះវិហារ ខេត្តបាត់ដំបង ខេត្តពោធិ៍សាត់ ខេត្តស្ទឹងត្រែង និងខេត្តក្រចេះជាដើម។
ឯកឧត្តមរដ្ឋមន្ត្រី ថោង ខុន ថ្លែងថា ជារួមសកម្មភាពចូលរួមទស្សនារបស់ប្រជាពលរដ្ឋយ៉ាងកុះករ សកម្មភាពទិញលក់ផលិតផលក្នុងស្រុកនៅស្តង់ពិព័រណ៍ក៏មមាញឹក អមដោយការសម្ដែងសិល្បៈ របាំ ចម្រៀង តន្ត្រីសម័យ ការប្រកួត និងលេងកីឡា ព្រមជាមួយទស្សនីយភាពជាច្រើនទៀតសម្រាប់ផ្ដល់ជូនប្រជាពលរដ្ឋ និងភ្ញៀវទេសចរដែលមកលេងកម្សាន្តនាឱកាសពិធីបុណ្យនេះ។ ឯកឧត្តម ថោង ខុន ថ្លែងថា ការរៀបចំឱ្យមានពិធីបុណ្យទន្លេ បុណ្យសមុទ្រ ពិព័រណ៍ទេសចរណ៍ ក៏ដូចជាព្រឹត្តិការណ៍ទេសចរណ៍នានា ត្រូវបានចាត់ទុកថាបានរួមចំណែកជួយផ្សព្វផ្សាយពីផលិតផលកសិកម្ម ផ្សព្វផ្សាយពីវិស័យវប្បធម៌ និងគោលដៅទេសចរណ៍បេតិកភណ្ឌ ក៏ដូចជាជួយអប់រំណែនាំពីវិស័យបរិស្ថានជាដើម ជាពិសេសជំរុញមូលដ្ឋាន និងគោលដៅទេសចរណ៍ទទួលបានអភិវឌ្ឍន៍ និងទាក់ទាញទេសចរជាតិ-អន្តរជាតិទៅទស្សនាកម្សាន្ត និងការជំរុញកំណើនសេដ្ឋកិច្ចផងដែរ៕ អត្ថបទ៖ ស៊ុម សុខជា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
