ត្បូងឃ្មុំ៖ ដោយមានភាពជឿជាក់លើការដឹកនាំរបស់គណបក្សប្រជាជនកម្ពុជា ដែលមានសម្តេចតេជោជាប្រមុខដឹកនាំប្រទេសជាតិមានសុខសន្តិភាព និងអភិវឌ្ឍលើគ្រប់វិស័យតាមគន្លងប្រជាធិបតេយ្យយ៉ាងពិតប្រាកដ ធ្វើឲ្យយុវជននៅក្នុងឃុំពពេល ស្រុកពញាក្រែក ខេត្តត្បូងឃ្មុំ ៣១១នាក់ និងសមាជិកគណបក្សផ្សេង ៨៩នាក់បានស្ម័គ្រចិត្តចូលរួមក្នុងជីវភាពនយោបាយជាមួយគណបក្សប្រជាជនកម្ពុជា ខណៈពិធីប្រកាស និងបញ្ចូលសមាជិក សមាជិកាជាយុវជននេះបានធ្វើឡើងនៅស្នាក់ការគណបក្សប្រជាជនកម្ពុជាស្រុកពញាក្រែក ក្រោមអធិបតីភាពឯកឧត្ដម វង សូត ប្រធានក្រុមការងារគណបក្សចុះមូលដ្ឋានស្រុកពញាក្រែក និងលោកជំទាវនៅថ្ងៃទី១២ ខែមិនា ឆ្នាំ២០២៣។
ជាមួយការប្រកាសក្លាយជាសមាជិកថ្មីតំណាងយុវជនទាំង ៣១១នាក់បានលើកឡើងថា មានតែគណបក្សប្រជាជនកម្ពុជាគត់ដែលបានដឹកនាំប្រទេសឲ្យរីកចំរើនលើគ្រប់វិស័យ ក្រោមដំបូលសន្តិភាព ដែលធ្វើឲ្យប្រជាជនរស់យ៉ាងសប្បាយរីករាយជាមួយជីវភាពកាន់ប្រសើរឡើងជាលំដាប់ ដូច្នេះក្នុងនាមសមាជិកថ្មី និងខិតខំកសាងខ្លួនឲ្យក្លាយជាសមាជិកគំរូ ដោយអនុវត្តតាមគោលនយោបាយរបស់គណបក្ស។ ចូលរួមគ្រប់សកម្មភាពដែលបម្រើឲ្យផលប្រយោជន៍គណបក្ស និងប្រជាជនគ្រប់ស្រទាប់វណ្ណៈ ពិសេសប្ដេជ្ញាបោះឆ្នោតជូនគណបក្សប្រជាជនកម្ពុជា ដើម្បីបន្តដឹកនាំប្រទេសជាតិជារៀងរហូត។
នៅក្នុងឱកាសនោះឯកឧត្ដម វង សូត មានប្រសាសន៍លើកឡើងថា ជាការពិតរយៈពេលជាង ៤០ឆ្នាំមកនេះគណបក្សប្រជាជនកម្ពុជាបានដឹកនាំប្រទេសជាតិឲ្យរីកចម្រើនលើគ្រប់វិស័យ ក្រោមដំបូលសន្តិភាព ក្នុងនោះតែងយកចិត្តទុកដាក់យ៉ាងខ្លាំងពីសុខទុករបស់ប្រជាជន ជាក់ស្ដែងរាជរដ្ឋាភិបាលក្រោមការដឹកនាំរបស់សម្តេចតេជោ បានចំណាយថវិកាយ៉ាងច្រើនទិញវ៉ាក់សាំងប្រឆាំងជំងឺកូវីដ-១៩ ចាក់ជូនប្រជាជនដោយមិនគិតថ្លៃ ក្នុងនោះប្រជាជនដែលងាយរងគ្រោះក៏ត្រូវបានផ្តល់ប្រាក់ឧបត្ថម្ភជាប្រចាំ ដើម្បីសម្រួលដល់ជីវភាពរស់នៅប្រចាំថ្ងៃផងដែរ។ ក្រៅពីនោះការអភិវឌ្ឍន៍ហេដ្ឋារចនាសម្ព័ន្ធនានា សម្រាប់បម្រើផលប្រយោជន៍ប្រជាជនដូចជាផ្លូវថ្នល់ មន្ទីរពេទ្យ សាលារៀនជាដើមគឺមានច្រើនកាន់តែជិតប្រជាជន ដែលកត្តាទាំងនេះហើយទើបប្រជាជននៅតែផ្តល់សេចក្តីទុកចិត្ត បន្តគាំគណបក្សប្រជាជនរហូតមក។
បើតាមលោក លី សុភាលីន អភិបាលស្រុកពញាក្រែកបានឲ្យដឹងថា ដោយផ្អែកលើអំពើល្អរបស់មន្ត្រីគណបក្សជាបន្តបន្ទាប់កន្លងមក ពិសេសការដឹកនាំដ៏ត្រឹមប្រកបដោយគតិបណ្ឌិតរបស់សម្តេចតេជោ ដែលធ្វើឲ្យប្រទេសមានសុខសន្តិភាព ជីវភាពប្រជាពលរដ្ឋប្រសើរឡើងពី ១ថ្ងៃទៅមួយថ្ងៃ ទើបប្រជាពលរដ្ឋកាន់តែមានភាពជឿជាក់ ពិសេសយុវជន ជាក់ស្ដែងយុវជនចំនួន ៣១១នាក់នៅឃុំពពេលបានសម្រេចគាំទ្រ និងចូលរួមជាមួយគណបក្សប្រជាជនកម្ពុជា៕ អត្ថបទ៖ ជឹង សេងឡុង
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
