កំពង់ឆ្នាំង៖ នៅល្ងាចថ្ងៃទី១២ ខែមីនា ឆ្នាំ២០២៣នេះ ប្រជាពលរដ្ឋដែលរងគ្រោះដោយភ្លើងឆេះផ្ទះចំនួន ៤៥គ្រួសារនៅចំណុចទំនប់បារាំង ភូមិផ្សារឆ្នាំង សង្កាត់ផ្សារឆ្នាំង ក្រុងកំពង់ឆ្នាំង បានទទួលអំណោយមនុស្សធម៌ពីសាខាកាកបាទក្រហមកម្ពុជាខេត្តកំពង់ឆ្នាំង ដែលមានឯកឧត្តម ស៊ុន សុវណ្ណារិទ្ធិ ប្រធានសាខាកាកបាទក្រហមកម្ពុជាខេត្តជាគណៈអធិបតីផងដែរ។
ឯកឧត្តម ស៊ុន សុវណ្ណារិទ្ធិ បានពាំនាំប្រសាសន៍ផ្ដាំផ្ញើការសាកសួរសុខទុក្ខ ក្តីនឹករលឹក អាណិតស្រឡាញ់ពីសម្តេចកិត្តិព្រឹទ្ធិបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា សូមចូលរួមរំលែកទុក្ខក្នុងក្ដីសោកស្ដាយឥតគណនា ចំពោះក្រុមគ្រួសាររងគ្រោះទាំងអស់ដែលបានបាត់បង់ទ្រព្យសម្បត្តិ ក្នុងអគ្គិភ័យនាពេលនេះ។ ឯកឧត្តមបានផ្ដាំផ្ញើឱ្យប្រជាពលរដ្ឋទាំងអស់គិតគូរថែទាំសុខភាពឲ្យបានល្អ ដោយរស់នៅត្រូវមានអនាម័យ ពិសាទឹកដាំឆ្អិន និងបរិភោគអាហារូបត្ថម្ភឱ្យបានត្រឹមត្រូវ រាល់ការធ្វើដំណើរទៅទីណាកន្លែងណា ទោះជិត ឬឆ្ងាយសូមមានការប្រុងប្រយ័ត្នឱ្យបានខ្ពស់ ដើម្បីជៀសវាងពីការគ្រោះថ្នាក់ផ្សេងពិសេសពីជំងឺកូវីដ-១៩។
គួរបញ្ជាក់ថា គ្រោះថ្នាក់ភ្លើងឆេះផ្ទះនៅក្នុងភូមិផ្សារឆ្នាំងនាព្រឹកមិញនេះ មូលហេតុនៃការឆេះគឺបណ្តាលមកពីការឆ្អើរត្រី ដែលបានឆេះបំផ្លាញផ្ទះប្រជាពលរដ្ឋអស់ ២៥ខ្នង (តូបចំនួន ៤តូប) ក្នុងចំណោមផ្ទះ ៤២ខ្នងនៅចំណុចទំនប់បារាំង។ នៅក្នុងចំណោមផ្ទះទាំង ២៥ខ្នងនេះមានប្រជាពលរដ្ឋរស់នៅចំនួន ៤៥គ្រួសារ ក្នុងនោះមានអ្នកជួលរស់នៅចំនួន ៦គ្រួសារ អ្នកមានតូបលក់ដូរឆេះអស់ ៤គ្រួសារ រួមនឹងម្ចាស់ផ្ទះឆេះអស់ចំនួន ៣៥គ្រួសារទៀត។ ដោយឡែកពាក់ព័ន្ធនឹងការពន្លត់អគ្គិភ័យវិញ លោកឧត្តមសេនីយ៍ ខូវ លី ស្នងការនគរបាលខេត្តកំពង់ឆ្នាំងបានបញ្ជាក់អោយដឹងថា ក្រុមសមត្ថកិច្ចនគរបាលពន្លត់អគ្គិភ័យបានប្រើប្រាស់ទឹកអស់ប្រមាណជាង ១៥០ឡាន ក្នុងនោះមានរថយន្តពន្លត់អគ្គិភ័យចំនួន ១០គ្រឿង។
ក្នុងរថយន្តពន្លត់អគ្គិភ័យទាំង ១០គ្រឿងនេះបានយកពីស្រុកកំពង់លែង ស្រុកកំពង់ត្រឡាច ស្រុកទឹកផុស និងស្រុករលាប្អៀរ មកបូកជាមួយរថយន្តនៅក្នុងក្រុងកំពង់ឆ្នាំង ដើម្បីជួយពន្លត់ភ្លើងនៅព្រឹកមិញនេះ។ ចំពោះកម្លាំងនគរបាលពន្លត់អគ្គិភ័យ កម្លាំងនគរបាលអន្តរាគមន៍ និងកម្លាំងនគរបាលចរាចរណ៍សរុបទាំងអស់ជិត ២០០នាក់ក្នុងការជួយអន្តរាគមន៍នៅក្នុងថ្ងៃនេះ៕ អត្ថបទ៖ ហុង វាស្នា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
