កូរ៉េខាងជើង៖ ទីភ្នាក់ងារសារព័ត៌មានរដ្ឋ KCNA បាននិយាយនៅថ្ងៃចន្ទនេះ ខណៈដែលកូរ៉េខាងត្បូង និងសហរដ្ឋអាមេរិកបានចាប់ផ្ដើមសមយុទ្ធយោធារួមគ្នា ទ្រង់ទ្រាយធំបំផុតមិនធ្លាប់មានរបស់ខ្លួនក្នុងរយៈពេល ៥ឆ្នាំមកនេះថា កូរ៉េខាងជើងបានបាញ់សាកល្បងមីស៊ីលតម្រង់គោលដៅយុទ្ធសាស្ត្រចំនួន ២គ្រាប់ចេញពីនាវាមុជទឹកកាលពីថ្ងៃអាទិត្យ ទី១២មីនា។
ពាក្យថាយុទ្ធសាស្ត្រ ជាទូទៅត្រូវបានប្រើដើម្បីពិពណ៌នាពីអាវុធ ដែលមានសមត្ថភាពបំពាក់ក្បាលគ្រាប់នុយក្លេអ៊ែរ។ ទីភ្នាក់ងារសារព័ត៌មាន KCNA និយាយថា ការបាញ់នេះបានបញ្ជាក់ពីភាពជឿជាក់នៃប្រព័ន្ធ និងបានសាកល្បងប្រតិបត្តិការវាយលុកក្រោមទឹកនៃកងនាវាមុជទឹក ដែលជាផ្នែកមួយនៃការរារាំងដោយនុយក្លេអ៊ែររបស់ប្រទេសកូរ៉េខាងជើង។ នាយសេនាធិការចម្រុះកូរ៉េខាងត្បូងបាននិយាយថា យោធាស្ថិតក្នុងការប្រុងប្រយ័ត្នខ្ពស់ ហើយទីភ្នាក់ងារចារកម្មរបស់ប្រទេសនេះ កំពុងធ្វើការជាមួយសមភាគីសហរដ្ឋអាមេរិករបស់ខ្លួន ដើម្បីវិភាគពីភាពជាក់លាក់នៃការបាញ់នេះ។
នៅថ្ងៃចន្ទនេះ យោធាកូរ៉េខាងត្បូង និងអាមេរិកបានចាប់ផ្ដើមសមយុទ្ធយោធារួមគ្នារយៈពេល ១១ថ្ងៃដែលមានឈ្មោះថា "Freedom Shield 23"។ ទីភ្នាក់ងារសារព័ត៌មានកូរ៉េខាងជើងនិយាយថា ការបាញ់មីស៊ីលយុទ្ធសាស្ត្រចេញពីនាវាមុជទឹកនេះ ក្នុងគោលបំណងបង្ហាញពីការប្ដេជ្ញាចិត្តរបស់កូរ៉េខាងជើង ក្នុងការគ្រប់គ្រងស្ថានភាពដែលចក្រពត្តិនិយមអាមេរិក និងកងកម្លាំងអាយ៉ងកូរ៉េខាងត្បូងកំពុងបង្កឡើង ដើម្បីប្រឆាំងសមយុទ្ធយោធារបស់កូរ៉េខាងជើង៕ អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
