ភ្នំពេញ៖ រាជរដ្ឋាភិបាលកម្ពុជា​បានបិទបញ្ចប់កម្មវិធីឧបត្ថម្ភ​សាច់ប្រាក់ជូនជនរងគ្រោះដោយសារ​ទឹកជំនន់​ នៅក្នុងខែមីនា ឆ្នាំ២០២៣។

ទន្ទឹម​នឹងការបិទបញ្ចប់​កម្មវិធីកម្មវិធី​ឧត្ថម្ភ​សាច់ប្រាក់​មួយនេះ​ រាជរដ្ឋាភិបាលកម្ពុជា ក៏នៅតែបន្ត​ឧបត្ថម្ភ​សាច់ប្រាក់ជូនគ្រួសាររងគ្រោះដោយ​សារទឹកជំនន់ទាំងនោះ ​ដោយ​សម្រេចផ្ទេរគ្រួសារ​ទទួល​ផលពីកម្មវិធីឧបត្ថម្ភសាច់ប្រាក់ដោយសារ​ទឹកជំនន់ ចូលទៅក្នុងកម្មវិធី​ឧបត្ថម្ភសាច់ប្រាក់​ជូន​គ្រួសារ​រងការប៉ះពាល់​ពី​សម្ពាធ​អតិផរណាវិញ។

កម្មវិធីឧបត្ថម្ភសាច់ប្រាក់ជូនគ្រួសាររងផលប៉ះពាល់​ដោយ​សារទឹកជំនន់ ដែលត្រូវបានដាក់​ឱ្យ​អនុវត្តកាលពីខែធ្នូ ឆ្នាំ ២០២២ ត្រូវបានប្រកាសបិទបញ្ចប់ក្នុងខែមីនា ឆ្នាំ ២០២៣នេះ។ ទន្ទឹមនឹងការបិទបញ្ចប់ រាជរដ្ឋាភិបាលក៏សម្រេចផ្ទេរគ្រួសារទទួល​ផលទាំងនោះ ចូលទៅក្នុង​កម្មវិធីឧបត្ថម្ភសាច់ប្រាក់ដល់គ្រួសាររងផលប៉ះពាល់ពីសម្ពាធអតិផរណាវិញ។

ឯកឧត្តម ឈួរ សុបញ្ញា ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកមូលនិធិជាតិជំនួយ​សង្គម ​លើកឡើងថា គ្រួសារដែលទទួលផលពីកម្មវិធីឧបត្ថម្ភសាច់ប្រាក់ជនរង​គ្រោះដោយសារ​ទឹកជំនន់ចំនួនជិត ១០ម៉ឺនគ្រួសារ ​ក៏ជាគ្រួសារដែលរងការប៉ះពាល់ពីសម្ពាធអតិផរណាផងដែរ។ ហេតុផលនេះ ទើបមានការសម្រេចផ្ទេរគ្រួសារទាំងអស់នោះ​ ឱ្យមកទទួលថវិកាពីកម្មវិធីឧបត្ថម្ភ​សាច់ប្រាក់​ជូនគ្រួសារររងសម្ពាធអតិផរណាលើកទី ២ ដោយស្វ័យប្រវត្តិ។ ​ចំពោះការបើក​សាច់ប្រាក់ គឺចាប់ផ្ដើមនៅថ្ងៃទី ១០ ខែមេសា ខាងមុខ។

ឯកឧត្តមបន្តថា ចំពោះថវិកាដែលទទួលបាន គឺនឹងមិនដូចថវិកាដែលធ្លាប់ទទួលបានក្នុង ឧបត្ថម្ភសាច់ប្រាក់ ជូនគ្រួសាររងគ្រោះដោយសារទឹកជំនន់នោះទេ។ ​កម្មវិធីទាំងពីរនេះ មាន​ការ​គណនា​ថវិកាផ្សេងគ្នា ​ហើយរយៈពេលបើកថវិកាក៏ផ្សេងគ្នាផងដែរ។ ជាក់ស្ដែងកម្មវិធី​ឧបត្ថម្ភ​សាច់ប្រាក់ជូន គ្រួសាររងគ្រោះដោយសារទឹកជំនន់​ បើកសាច់ប្រាក់រៀងរាល់ខែ រីឯកម្មវិធី​ឧបត្ថម្ភសាច់ប្រាក់ជូនគ្រួសាររងសម្ពាធអតិផរណា ​គឺមានគម្លាតនៃការបើកថវិកាវែងជាង ដោយ​ការបើកលើកទី ១ ធ្វើឡើងនៅថ្ងៃទី ១០ ខែធ្នូ ឆ្នាំ ២០២២ ការបើកលើកទី ២ នៅថ្ងៃទី ១០ ខែមេសា ២០២៣ និងការបើកលើកទី ៣ ថ្ងៃទី ១០ ខែ កក្កដា ២០២៣។

ឯកឧត្តម ឈួរ សុបញ្ញា បញ្ជាក់បន្ថែមថា ការបើកសាច់ប្រាក់នេះ គឺគ្រួសារទទួលផលទាំងអស់ ត្រូវទៅ​បើកថវិកានៅភ្នាក់ងារវីងដដែល​ តែត្រូវប្រើប្រាស់លេខគណនី ​និងលេខកូដថ្មី ដែល​នឹងមានការផ្ដល់ជូនដោយអាជ្ញាធរតាមមូលដ្ឋាននាពេលខាងមុខ។

គួរបញ្ជាក់ដែរថា ​សម្រាប់កម្មវិធីឧបត្ថម្ភសាច់ប្រាក់ជូនគ្រួសាររងគ្រោះដោយ​សារទឹកជំនន់ ដែល​ត្រូវបានបិទបញ្ចប់នេះ ​គឺរាជរដ្ឋាភិបាលកម្ពុជា បានចំណាយថវិកាជាង ​៤៦ពាន់លានរៀល ក្នុង​រយៈពេល៣ខែ សម្រាប់គ្រួសារចំនួនជិត១០ម៉ឺនគ្រួសារ៕អត្ថបទ៖ គឹមហុក