ស្នូកឃ័រ៖ កីឡាការិនីជម្រើសជាតិស្នូកឃ័រកម្ពុជា ស្រួង ភាវី បានអំពាវនាវឲ្យប្រជាពលរដ្ឋខ្មែរទាំងអស់ចូលរួមសហការ និងពួតដៃជាមួយអាជ្ញាធរដើម្បីប្រយុទ្ធប្រឆាំងនឹងជំងឺកូវីដ-១៩ ដែលកំពុងគំរាមកំហែងខ្លាំងដល់ពិភពលោក និងប្រទេសកម្ពុជា។
ម្ចាស់មេដាយមាសជើងឯកទ្វីបអាស៊ី ២សម័យរូបនេះបានផ្ញើសារតាមរយៈវីដេអូពីសាធារណរដ្ឋកូរ៉េ ដោយទទូចឲ្យប្រជាពលរដ្ឋទាំងក្នុង និងក្រៅប្រទេស រួមទាំងកីឡាករ-កីឡាការិនីត្រូវថែរក្សាសុខភាព និងគោរពតាមការណែនាំរបស់ក្រសួងសុខាភិបាល ដើម្បីទប់ស្កាត់ការរីករាលដាលជំងឺដ៏កាចសាហាវនេះ ព្រោះបុគ្គលម្នាក់អាចធ្វើឲ្យមនុស្សរាប់រាយលាននាក់រងទុក្ខផង និងអាចរួចផុតពីជំងឺរាតត្បាតជាសកលនេះផង។ ការផ្ញើសាអំពាវនាវ និងជូនពរប្រជាពលរដ្ឋខ្មែរពីសំណាក់កីឡការិនី ដែលកំពុងរស់នៅប្រទេសកូរ៉េជាមួយស្វាមីដែលជាជនជាតិកូរ៉េនេះ ស្របពេលស្ថានភាពជំងឺកូវីដ-១៩ កំពុងមានការរីករាលដាលខ្លាំងនៅប្រទេសកម្ពុជា ដែលមកទល់ពេលនេះមិនទាន់មានសញ្ញាណថមថយនៅឡើយ។ ដូច្នេះលោកស្រីរំពឹងថា ប្រជាពលរដ្ឋគ្រប់រូបត្រូវចូលរួមអនុវត្តវិធានការ របស់អាជ្ញាធរឲ្យមានប្រសិទ្ធភាពបំផុត ដើម្បីឆ្លងកាត់គ្រាដ៏លំបាកនេះ។
គួរដឹងថា ស្រួង ភាវី គឺជាកីឡាការិនីស្នូកឃ័រដ៏ឆ្នើមរបស់កម្ពុជា ដែលធ្លាប់ឈ្នះមេដាយជាច្រើនក្នុងការប្រកួតថ្នាក់តំបន់ និងពិភពលោក ជាក់ស្ដែងនាងធ្លាប់ដណ្ដើមបានមេដាយមាស ការប្រកួតកីឡាស្នូកឃ័យជ្រើសរើសជើងឯកទ្វីបអាស៊ីចំនួន ២សម័យ និងធ្លាប់ឈ្នះមេដាយសំរឹទ្ធពិភពលោកកាលពីឆ្នាំ២០១៨ រួមទាំងការប្រកួតឈ្នះពាន និងជើងឯកជាច្រើនក្នុងការប្រកួតថ្នាក់ជាតិនៅសាធារណរដ្ឋកូរ៉េទៀតផង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
