ភ្នំពេញ ៖ ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្តីក្រសួងសុខាភិបាល បានអនុញ្ញាតជូនឯកឧត្តម យូអ៊ីណូ អាស៊ូស៊ី (UENO Atsushi) ឯកអគ្គរដ្ឋទូតវិសាមញ្ញ និងពេញសមត្ថភាព ប្រទេសជប៉ុន ប្រចាំព្រះរាជាណាចក្រកម្ពុជា ចូលជួបសំដែងការគួរសម និងពិភាក្សាការងារ នៅទីស្ដីការក្រសួងសុខាភិបាល ថ្ងៃទី១៣ ខែមីនា ឆ្នាំ២០២៣នេះ។

​ជាកិច្ចចាប់ផ្តើមឯកឧត្តមរដ្ឋមន្ត្រី បានសំដែងការអបអរសាទរចំពោះឯកឧត្តម យូអ៊ីណូ អាស៊ូស៊ី (UENO Atsushi) ដែលត្រូវបានតែងតាំងជាឯកអគ្គរដ្ឋទូតថ្មី និងបានថ្លែងអំណរគុណដល់ភាគីជប៉ុន ចំពោះកិច្ចសហការ​លើវិស័យ​សុខាភិបាលរវាងប្រទេសទាំងពីរ ជាពិសេសក្នុងកាលៈទេសៈនៃការប្រយុទ្ធ នឹងការរីករាលដាលជំងឺកូវីដ-១៩។ ឯកឧត្តមរដ្ឋមន្ត្រី ក៏បានថ្លែងអំណរគុណដល់រដ្ឋាភិបាល និងប្រជាជនជប៉ុន ដែលបានផ្ដល់ជំនួយ​បន្ទាន់​សម្រាប់ឆ្លើយ​តបនឹងការរីករាលដាលជំងឺកូវីដ-១៩ មួយចំនួនដូចជា៖ ជំនួយបឋមនាខែកុម្ភៈ ឆ្នាំ២០២០ ពេលដែល​កម្ពុជា បាន រកឃើញករណីកូវីដ-១៩ ដំបូង រួមមាន ១) កញ្ចប់តេស្ដរហ័ស, ២) សម្លៀកបំពាក់​សុវត្ថិភាពសម្រាប់ មន្ត្រី សុខាភិបាល, ៣) កញ្ចប់ឧបករណ៍ពិសោធន៍ និងម៉ាស់។ ជាបន្តបន្ទាប់ដើម្បីទប់ស្កាត់ ឆ្លើយតបនឹងការ​រាលដាល​ជំងឺកូវីដ-១៩ រដ្ឋាភិបាលជប៉ុន តាមរយៈកម្មវិធីអភិវឌ្ឍន៍សេដ្ឋកិច្ច និង សង្គម បានផ្តល់ជំនួយឥតសំណង ជូន​រាជរដ្ឋាភិបាល​កម្ពុជា ថវិកាចំនួន២០០០លានយេន ប្រមាណជា ១៨.៥លានដុល្លារអាមេរិក អនុវត្តដោយ Japan International Cooperation System (JICS) រួមមាន៖ ១) រថយន្តគិលានសង្គ្រោះ ចំនួន ១០០គ្រឿង, ២) Ultrasound Scanner ចំនួន១គ្រឿង, ៣) គ្រែសម្រាប់ផ្នែក ICU ចំនួន១០០គ្រែ, ៤) Thermographic Camera ចំនួន ១០គ្រឿង, ៥) Portable X-Ray ចំនួន ១០គ្រឿង, ៦) Mobile Ultrasound Scanner ចំនួន ២៥គ្រឿង, ៧) Oxygen Concentrator ចំនួន ១០០គ្រឿង, ៨) ការពង្រីកផ្នែកសង្គ្រោះបន្ទាន់សម្រាប់ជំងឺកូវីដ-១៩ រួមទាំងការបំពាក់ឧបករណ៍វេជ្ជសាស្ត្រ ត្រូវបានដាក់បញ្ចូលទៅក្នុងគម្រោងធ្វើឱ្យប្រសើរឡើងមន្ទីរពេទ្យបង្អែកខេត្តសៀមរាប, ៩) ឧបករណ៍វាស់​សម្ពាធ​ឈាម​ ចំនួន១០០គ្រឿង, ១០) ម៉ាស៊ីនភ្លើង ចំនួន១០០គ្រឿង។ តាមរយៈកម្មវិធីជំនួយបន្ទាន់ រដ្ឋាភិបាលជប៉ុន ផ្តល់ជំនួយឥតសំណងជូនដល់រាជរដ្ឋាភិបាលកម្ពុជា ចំនួន ៦.៣ លានដុល្លារអាមេរិក អនុវត្តដោយ UNOPS រួមមាន៖ ១) សាងសង់ម៉ាស៊ីនផលិតខ្យល់អុកស៊ីហ្សែន (Oxygen Plant) នៅ ១១ មន្ទីរពេទ្យដែលបាននឹងកំពុងអនុវត្តជិតចប់, ២) សម្ភារៈឧបករណ៍បរិក្ខារវេជ្ជសាស្ត្រ, ៣) សម្ភារៈ IT ព្រមទាំងបានចូលរួមចំណែកក្នុងយុទ្ធនាការចាក់វ៉ាក់​សាំងកូវីដ-១៩ រដ្ឋាភិបាលជប៉ុនបានផ្ដល់ជំនួយវ៉ាក់សាំងប្រភេទ AstraZeneca ចំនួន ១.០០០.០០០ដូស តាមរយៈមជ្ឈមណ្ឌល COVAX។

ឯកឧត្តមឯកអគ្គរដ្ឋទូតជប៉ុនថ្មី បានសម្តែងនូវការកោតសរសើរចំពោះរាជរដ្ឋាភិបាលកម្ពុជា ក្រោមការដឹកនាំដ៏​ឈ្លាសវៃ និងប្រកបដោយគតិបណ្ឌិត ចង្អុលបង្ហាញផ្ទាល់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលគ្រប់គ្រងការរាលដាលនៃជំងឺកូវីដ-១៩ បានយ៉ាងល្អប្រសើរ ជំរុញឱ្យកម្ពុជា អាចបើកដំណើរការឡើងវិញទាំងសកម្មភាពសេដ្ឋកិច្ច និងសង្គមតាំងពីខែវិច្ឆិកា ឆ្នាំ២០២១។ ឯកឧត្តមឯកអគ្គរដ្ឋទូតជប៉ុន ក៏បានសម្តែងអំណរគុណយ៉ាងជ្រាលជ្រៅដល់រាជរដ្ឋាភិបាលកម្ពុជា ដែលបានចាក់វ៉ាក់សាំងកូវីដ-១៩ ដល់ជនជាតិជប៉ុនទាំងអស់ដែលរស់នៅលើទឹកដីកម្ពុជា ដោយឥតគិតថ្លៃ។

ឯកឧត្តមឯកអគ្គរដ្ឋទូត ក៏បានថ្លែងអំណរគុណដល់ក្រសួងសុខាភិបាល ដែលបានសហការគាំទ្រយ៉ាងពេញ​ទំហឹងកិច្ចសហប្រតិបត្តិការលើវិស័យសុខាភិបាល រវាងប្រទេសទាំងពីរ ជាពិសេសតែងតែគាំទ្រដល់ JICA ក្នុងការអនុវត្តគម្រោងជំនួយឥតសំណងនានា ជាក់ស្ដែងគម្រោងធ្វើឱ្យប្រសើរឡើងមន្ទីរពេទ្យបង្អែក ខេត្តសៀមរាប ដែលបាននឹងកំពុងអនុវត្ត។ ឯកឧត្តមឯកអគ្គរដ្ឋទូត ក៏បានស្នើសុំការគាំទ្រពីឯកឧត្តមរដ្ឋមន្តី្រ ទៅលើកិច្ច​សហប្រតិបត្តិការ​​ជាបន្តទៀតទាំងគម្រោងជំនួយឥតសំណង និងគម្រោងហិរញ្ញប្បទានសម្បទាន។

ជាការឆ្លើយតប ឯកឧត្តមរដ្ឋមន្ត្រី បានគាំទ្រចំពោះកិច្ចសហប្រតិបត្តិការលើវិស័យសុខាភិបាលរវាងប្រទេសទាំងពីរ ជាក់ស្ដែងការកសាងហេដ្ឋារចនាសម្ព័ន្ធសុខាភិបាលនៅតាមបណ្តាខេត្តជាច្រើន ការបណ្ដុះបណ្ដាល ធនធានមនុស្ស ដែលជាការសបញ្ជាក់នូវការរឹតចំណងមិត្តភាព និងសាមគ្គីភាព ជាប្រពៃណីរវាងប្រទេសទាំងពីរ កម្ពុជា-ជប៉ុន៕ អត្ថបទ ៖ រដ្ឋា