ភ្នំពេញ៖ រដ្ឋបាលរាជធានីភ្នំពេញ មានមន្ត្រីរាជការជានារីជិតមួយរយនាក់ ដែលកំពុងបំពេញការងារ និង​ទទួលខុសត្រូវលើការដឹកនាំអង្គភាព ​គ្រប់គ្រងរដ្ឋបាល ​ជំនាញបច្ចេកទេស និងជាប្រតិបត្តិករ​ជួរមុខ​​ក្នុងការផ្តល់សេវាសាធារណៈជូនដល់ប្រជាពលរដ្ឋយ៉ាងសកម្មបំផុត។

រដ្ឋបាលរាជធានីភ្នំពេញមានមន្ត្រីរាជការជានារី ចំនួន៩៤នាក់ ដែលបាននិងកំពុងបំពេញការងារ និង​ទទួលខុសត្រូវលើការដឹកនាំអង្គភាព ​គ្រប់គ្រងរដ្ឋបាល ​ជំនាញបច្ចេកទេស ​និងជាប្រតិបត្តិករជួរមុខ ក្នុងការផ្តល់សេវាសាធារណៈជូនដល់ប្រជាពលរដ្ឋយ៉ាងសកម្មបំផុត។

នេះជាការលើកឡើងរបស់ ឯកឧត្ដម ឃួង ស្រេង អភិបាលរាជធានីភ្នំពេញ ខណៈដែលឯកឧត្ដម និងលោកជំទាវ ព្រមទាំងឯកឧត្ដម ម៉ប់ សារិន ប្រធានក្រុមប្រឹក្សារាជធានីភ្នំពេញ អញ្ជើញជា​អធិបតីភាពក្នុងពិធីអបអរសាទរខួបលើកទី១១២​ ទិវាអន្តរជាតិនារី ៨ មីនា ឆ្នាំ២០២៣ ក្រោម​ប្រធានបទ ស្ត្រីរួមគា្នរក្សាសុខសន្តិភាព​ ដើម្បីកិច្ចអភិវឌ្ឍន៍​ក្នុងយុគសម័យឌីជីថល នាព្រឹកថ្ងៃទី១៤ ខែមីនា ឆ្នាំ២០២៣ នៅសាលារាជធានីភ្នំពេញ។

ឯកឧត្ដម ឃួង ស្រេង បានលើកឡើងថា ការប្រារព្ធទិវាអន្តរជាតិនារី ៨ មីនា ក្នុងឆ្នាំនេះ មាន​គោលបំណង​រំលេចពីតម្លៃសុខសន្តិភាព ដែលនាំឱ្យមានការលើកកម្ពស់សមភាពយេនឌ័រ និង​ការអភិវឌ្ឍក្នុងយុគសម័យបច្ចេកវិទ្យា ព្រមទាំងជាសារបង្ហាញឱ្យឃើញកាន់តែច្បាស់ អំពី​ការយកចិត្តទុកដាក់គាំពារ ថែរក្សា លើកទឹកចិត្ត ​និងផ្តល់តម្លៃខ្ពស់របស់រាជរដ្ឋាភិបាលកម្ពុជា​ចំពោះបងប្អូននារី ​ដែលជាដៃគូមិនអាចខ្វះបានក្នុងដំណើរការស្តារកសាង​ និងអភិវឌ្ឍជាតិមាតុភូមិ ព្រមទាំង​ការប្រយុទ្ធនឹងជំងឺកូវីដ-១៩​ ក្នុងរយៈពេលជាង ៣ ឆ្នាំកន្លងមកនេះ។

ឯកឧត្ដម ឃួង ស្រេង ក្នុងឱកាសនោះ ​ក៏បានសម្តែងនូវការកោតសរសើរ និងវាយតម្លៃខ្ពស់​ចំពោះស្នាដៃ និងសមិទ្ធផលការងារជាច្រើនដែលបងប្អូននារីក្នុងរចនាសម្ព័ន្ធរដ្ឋបាល​រាជធានីភ្នំពេញ​បានសហការចូលរួម ​ជ្រោមជ្រែងបំពេញភារកិច្ចពិសេសការផ្តល់សេវាសាធារណៈជូនប្រជាពលរដ្ឋ​ក្នុង​ដែន​សមត្ថកិច្ច ដោយមិនខ្លាចនឿយហត់ និងបានចូលរួមចំណែកជាច្រើនក្នុងសកម្មភាពសង្គម សកម្មភាព​មនុស្សធម៌ ​យុទ្ធនាការចាក់វ៉ាក់សាំងបង្ការជំងឺកូវីដ-១៩ និងការអភិវឌ្ឍរាជធានីភ្នំពេញ​រហូតទទួលបានជោគជ័យយ៉ាងធំធេង។

ឯកឧត្ដម ឃួង ស្រេង បានបន្តថា ការរៀបចំពិធីអបអរសាទរទិវាអន្តរជាតិនារី ៨ មីនា ធ្វើឡើង​ក្នុងគោលបំណងរំលឹកនូវគំរូវីរភាពរបស់នារី ដែលបានតស៊ូរើបម្រះ​ និងពុះពារគ្រប់ឧបសគ្គ ដើម្បីរំដោះខ្លួន​ចេញផុតពីការជិះជាន់ ​និងការរើសអើងនៅក្នុងសង្គម រហូតសម្រេច​បាន​ជោគជ័យ​ទទួលបានសិទ្ធិ-សេរីភាព ​នឹងបានធ្វើឱ្យមានសមភាពរវាងបុរស និងស្ត្រីទាំងក្នុងទិដ្ឋភាពនយោបាយ សេដ្ឋកិច្ច សង្គម ​និងវប្បធម៌។

បច្ចុប្បន្ននេះ​ នារីនៅតែជាដៃគូមិនអាចខ្វះបាន និងបានចូលរួមចំណែកយ៉ាងសំខាន់ក្នុងដំណើរ​ការ​អភិវឌ្ឍជាតិមាតុភូមិ តាមរយៈសមត្ថភាពដឹកនាំរបស់នារី​ ជាថ្នាក់ដឹកនាំនៅតាមបណ្តាក្រសួង-ស្ថាប័ន​ រដ្ឋបាលថ្នាក់ក្រោមជាតិ អង្គភាពរដ្ឋ ​និងឯកជន។

ឯកឧត្ដម ឃួង ស្រេង បានអំពាវនាវដល់គ្រប់ក្រសួង-ស្ថាប័ន អង្គភាពពាក់ព័ន្ធ និងដៃគូអភិវឌ្ឍន៍​ទាំងអស់ សូមបន្តរួមគ្នាឱ្យកាន់តែល្អប្រសើរបន្ថែមទៀតក្នុង​បុព្វហេតុលើកកម្ពស់សិទ្ធិនារី និង​ត្រូវស្គាល់​អំពីសុខទុក្ខរបស់នារី ដើម្បីជួយដល់ពួកគាត់ក្នុងការទប់ស្កាត់ អំពើហិង្សាក្នុងគ្រួសារ ការជួញ​ដូរស្រ្តី និងកុមារ កាត់បន្ថយអត្រាមរណភាពមាតា និងទារក ព្រមទាំងចូលរួមដោះស្រាយ​បញ្ហា​ស្រ្តីមានវិបត្តិផ្សេងៗទៀត ឱ្យកាន់តែប្រសើរឡើង៕អត្ថបទ ៖ ប្រាក់ វាន់ដា