​អ៊ុយក្រែន៖ ប្រធានាធិបតី​អ៊ុយ​ក្រែ​ន​លោក Volodymyr Zelenskiy បាន​និយាយ​កាលពី​ថ្ងៃ​ចន្ទ​ថា អនាគត​របស់ប្រទេស​អ៊ុយ​ក្រែ​ន​ពឹង​ផ្អែកលើ​លទ្ធផល​នៃ​ការ​ប្រយុទ្ធ ​នៅ​ក្នុង​ទីតាំង​សំខាន់ៗ​នៅ​ភាគ​ខាងកើត​ប្រទេស​។​ ​លោក Zelenskiy និយាយ​ថា វា​មាន​ភាព​តានតឹង​ខ្លាំង​នៅ​ភាគ​ខាងកើត លំបាក​ខ្លាំង​ដែល​យើង​ត្រូវតែ​បំផ្លាញ​ឥទ្ធិពល​យោធា​របស់​សត្រូវ​។

លោក​និយាយ​ថា ទីក្រុង​ជាច្រើន​ជាទី​ក្រុង​អនាគត​ដែល​យើង​កំពុង​ត្រូវ​ធ្វើ​ការសម្រេចចិត្ត ជាទី​ក្រុង​អនាគត​របស់​ទាហាន​អ៊ុយ​ក្រែ​ន​ទាំងអស់​កំពុង​ប្រយុទ្ធ​ការពារ​។​ ទីក្រុង Bakhmut ភាគ​ខាងកើត​ប្រទេស​អ៊ុយ​ក្រែ​នបាន​ក្លាយ​ជា​ចំណុច​ស្នូល​នៃ​យុទ្ធនាការ​រដូវរងា​របស់​រុស្ស៊ី ដោយ​ភាគី​ទាំងពីរ​បាន​និយាយ​ថា ពួកគេ​បាន​ប្រយុទ្ធ​គ្នា​ឥត​ឈប់ឈរ​នៅ​ក្នុង ​និង​ជុំវិញ​ទីក្រុង​បាក់បែក​មួយ​នេះ​។ ទីក្រុង​មូ​ស្គូ​និយាយ​ថា ​កា​រដណ្តើម​យក​បាន​ទីក្រុង​នេះ វា​នឹង​ក្លាយ​ជា​ជោគ​ជ័យ​ដ៏​សំខាន់​ដោយ​ត្រួស​ត្រាយផ្លូវ​ ដើម្បី​ដណ្តើម​យក​តំបន់​នៅ​សេសសល់​ជុំវិញ​តំបន់ Donetsk ជា​គោលដៅ​សង្គ្រាម​។ ​

​ដោយ​ប្រឈម​ការ​ប្រយុទ្ធ​នៅ​សមរភូមិ ទាហាន​អ៊ុយ​ក្រែ​ន​រាប់​សិប​នាក់​កាលពី​ថ្ងៃ​ចន្ទ​បាន​បញ្ចប់​ការ​ហ្វឹកហ្វឺន​រយៈពេល ៤​សប្តាហ៍​នៅ​ប្រទេស​អេស្ប៉ាញ​អំពី​របៀប​ប្រើប្រាស់​រថក្រោះ​ប្រយុទ្ធ​ឡេ​ភឺ​ត 2A4 (Leopard 2A4) ដែល​រថក្រោះ​ទាំងនេះ​ទីក្រុង​ Madrid មាន​ផែនការ​បញ្ជូន​ចំនួន ៦​គ្រឿង​ទៅ​ឲ្យ​ទីក្រុង Kyiv នៅ​និទាឃៈ​រដូវ​នេះ​។ កងកម្លាំងប្រដាប់អាវុធ​របស់​​អេស្ប៉ាញ​បាន​និយាយ​នៅ​ក្នុង​សេចក្តីថ្លែងការណ៍​ថា សមាជិក​ទាហាន​រថក្រោះ​សរុប​ ៤០​នាក់ និង​អ្នកឯកទេស​មេកានិច ​១៥​នាក់​បាន​ទទួល​ការ​បណ្តុះបណ្តាល​លើ​ការប្រើប្រាស់​រថក្រោះ​ នៅ​មូលដ្ឋាន​យោធា​មួយ​កន្លែង​ក្នុង​ទីក្រុង Zaragoza ភាគ​ឦសាន៕

អត្ថបទ៖ ប៊ុនថន