ភ្នំពេញ៖ អគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ នៅក្នុងឆ្នាំ២០២២ កន្លងទៅនេះបាន​ចាប់ខ្លួន ​និងបណ្តេញចេញជនបរទេសឲ្យទៅប្រទេសពួកគេវិញជិតប្រាំមួយពាន់​នាក់​ដែលមកពី ៤២សញ្ជាតិ ខណៈជនបរទេសមួយចំនួនទៀតកំពុងលាក់ខ្លួន ​ហើយអាជ្ញាធរកំពុង​ស្រាវជ្រាវ​ស្វែងរកចាប់ខ្លួនយកមកផ្តន្ទាទោសទៅតាមច្បាប់។

យោងតាមរបាយការណ៍ របស់អគ្គនាយករដ្ឋានអន្តោប្រវេសន៍ ដែលបានចែកជូនដល់​អ្នក​សារ​ព័ត៌មាន​ក្នុងកិច្ចប្រជុំបូកសរុបលទ្ធផលការងារឆ្នាំ២០២២ ​និង​លើកទិស​ដៅអនុវត្ត​ឆ្នាំ២០២៣ របស់​អគ្គនាយកដ្ឋានអន្តោប្រវេសន៍ ​ដែលបានប្រព្រឹត្តិទៅ នាថ្ងៃទី១៤ ខែមីនា ឆ្នាំ២០២៣នេះ ក្រោម​អធិបតីភាពឯកឧត្តម សុខ ផល រដ្ឋលេខាធិការក្រសួងមហាផ្ទៃនោះ ​បានបង្ហាញថា មាន​ជន​បរទេស ៥.៨២៥នាក់ មកពី៤២សញ្ជាតិ ដោយក្នុងនោះជនជាតិថៃ ​ចិន និងវៀតណាមច្រើនជាងគេ ហើយ​ការ​ចាប់​បញ្ជូនពួកគេទៅប្រទេសវិញនេះ​ គឺមក ពីពួកគេចូលធ្វើការនៅស្រុកខ្មែរពុំមានឯកសារ​ត្រឹមត្រូវ ​និងប្រព្រឹត្តបទល្មើសជាដើម។

ទាក់ទងនិងការចាប់ខ្លួន និងបណ្តេញជនបរទេសចេញពីប្រទេសកម្ពុជានេះដែរ​ នាយឧត្តមសេនីយ៍ កែវ វណ្ណថន​ អ្នកនាំពាក្យអគ្គនាយកដ្ឋានអន្តោប្រវេសន៍ ក៏បានបញ្ជាក់ផងដែរថា ការដែលនគរបាល​អន្តោប្រវេសន៍ចាប់ខ្លួន ​និងបណ្តេញជនបរទេសទាំងនោះ ចេញគឺដោយសារពួកគេបានប្រព្រឹត្តខុស​និងច្បាប់នៅកម្ពុជា ​ដូចជាការចូលមកធ្វើការងារដោយពុំមានឯក ​សារត្រឹមត្រូវ និងលួចចូល​ស្រុកខ្មែរតាមផ្លូវកាត់ជាដើម។

នាយឧត្តមសេនីយ៍បានបញ្ជាក់បន្ថែមទៀតថា​ ក្រៅពីធ្វើការចាប់ខ្លួន និងបណ្តេញពួកជន​បរទេស​នោះចេញពីកម្ពុជាហើយក​ ក៏នៅមានជនបរទេស​ មួយចំនួនទៀត​ កំពុងលាក់ខ្លួនផងដែរ ប៉ុន្តែ​អាជ្ញាធរកំពុងស្រាវជ្រាវ​តាមចាប់ផងដែរ។

កាលពីឆ្នាំ២០២២កន្លងទៅនេះដែរ ជនបរទេសដែលបានជាប់ពន្ធនាគារនៅកម្ពុជា គឺមាន​ចំនួន ១.៦១២នាក់ មកពី៤៥សញ្ជាតិ ​ដោយក្នុងនោះមានជនជាតិវៀតណាម ចិន ​និងថៃច្រើនជាងគេ។ ដោយ ឡែកជនបរទេសរងគ្រោះដោយឧបទ្ទវហេតុផ្សេងៗ​មានចំនួន២៨២នាក់ ដោយក្នុង​នោះស្លាប់ចំនួន២២៣ នាក់៕អត្ថបទ៖ បាន ចក់