ភ្នំពេញ ៖ ឯកឧត្តម ឃួង ស្រេង បានជំរុញឱ្យអាជ្ញាធរខណ្ឌទាំង១៤ និងកម្លាំងមាន​សមត្ថកិច្ច​ទាំងអស់​យកចិត្ត​ទុក​ដាក់​ខ្ពស់ ក្នុងកិច្ចការពាររក្សាសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈ ខណៈការប្រកួត​កីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣នេះ នៅសល់តែ៥២ថ្ងៃទៀតប៉ុណ្នោះ។

ថ្លែងក្នុងកិច្ចប្រជុំគណៈបញ្ជាការឯកភាពរាជធានីភ្នំពេញ នៅសាលារាជធានីភ្នំពេញ នារសៀលថ្ងៃទី១៤ ខែមីនា ឆ្នាំ២០២៣ ឯកឧត្តម ឃួង ស្រេង ប្រធានគណៈបញ្ជាការឯកភាពរាជធានីភ្នំពេញ បានជំរុញឱ្យអាជ្ញាធរខណ្ឌទាំង១៤ និងកម្លាំងមានសមត្ថកិច្ចទាំងអស់យកចិត្តទុកដាក់ខ្ពស់ ក្នុងកិច្ចការពាររក្សាសន្តិសុខ សុវត្ថិភាព សណ្តាប់ធ្នាប់ និង​របៀបរៀបរយសាធារណៈ ខណៈដែលកម្ពុជានឹងត្រូវធ្វើជាម្ចាស់ផ្ទះនៃការប្រកួតកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣នេះ ដោយព្រឹត្តិការណ៍នេះនៅសល់តែ៥២ថ្ងៃទៀតប៉ុណ្នោះ។

ឯកឧត្តម ឃួង ស្រេង បានលើកឡើងថា កិច្ចប្រជុំនេះធ្វើឡើងមួយផ្នែក ដើម្បីពិនិត្យពីវឌ្ឍនភាពការងារ​ត្រៀម​សហការ​រៀបចំការប្រកួតកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ ជាមួយអនុគណៈកម្មការចំពោះកិច្ច និង​ការពង្រឹងកិច្ចការរងារការពាររក្សាសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈ ក្នុង​ការ​ប្រកួតកីឡានេះ។

ឯកឧត្តម ឃួង ស្រេង បន្តទៀតថា ការងារធំរបស់គណបញ្ជាការឯកភាពរាជធានីភ្នំពេញ គឺកិច្ចការពាររក្សាសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈ។ ដូច្នេះអាជ្ញាធរខណ្ឌទាំង១៤ និងកម្លាំងមាន​សមត្ថកិច្ច​ទាំង​អស់ត្រូវយកចិត្តទុកដាក់ឱ្យបានខ្ពស់បំផុត កុំឱ្យមានបទល្មើសកើតឡើងនៅក្នុងមូលដ្ឋានរបស់ខ្លួន ពិសេស​ថែម​ទៀតនោះ គឺកិច្ចការពារ សន្តិសុខ ជូនប្រតិភូកីឡាករ ភ្ញៀវជាតិ អន្តរជាតិ ដែលមកចូលរួមក្នុងពិធីដ៏ធំនេះ។

ឯកឧត្តម ឃួង ស្រេង ក៏បានជំរុញ មន្ទីរសាធារណការនិងដឹកជញ្ជូនរាជធានីភ្នំពេញ ត្រូវយកចិត្តទុកដាក់​ក្នុងការ​ជួសជុលផ្លូវ តុបតែងភ្លើងបំភ្លឺសាធារណៈ ដើម្បីលើកសោភណ្ឌភាពរាជធានីភ្នំពេញឱ្យកាន់តែមានភាពស្រស់បំព្រង ពិសេសផ្លូវសំខាន់ៗ ចូលទៅក្នុងពិធី ដូចជាផ្លូវជាតិលេខ៥ ផ្លូវជាតិលេខ៦ និងផ្លូវ២ខ្សែ​ថ្មីចូលទៅ​កាន់មហាវិថី​ឈ្នះឈ្នះ​ និងមហាវិថីឈ្នះឈ្នះនេះតែម្តង។ ចំពោះអាជ្ញាធរខណ្ឌទាំង១៤ ក្រៅពីពង្រឹងសន្តិសុខ សណ្តាប់ធ្នាប់ហើយ ការសម្អាត អនាម័យបរិស្ថានក៏ត្រូវយកចិត្តទុកដាក់ ជាមួយនិងការចលនាប្រជាពលរដ្ឋឱ្យដាក់ទង់ជាតិ ព្រោះនេះ​ជាមុខមាត់របស់ប្រទេសជាតិទាំងមូល៕ អត្ថបទ ៖ ប្រាក់ វ៉ាន់ដា​