ភ្នំពេញ៖ ក្រុមប្រឹក្សារាជធានីភ្នំពេញ កោតសរសើរចំពោះអាជ្ញាធររាជធានី ដែលបានយកចិត្ត​ទុកដាក់​បង្ការទប់ស្កាត់បទល្មើសព្រហ្មទណ្ឌ ​និងគ្រោះថ្នាក់ចរាចរណ៍បានល្អក្នុងខែកុម្ភៈកន្លងមក។

ប្រធានក្រុមប្រឹក្សារាជធានីភ្នំពេញ ឯកឧត្តម ម៉ប់ សារិន បានសម្តែងនូវការកោតសរសើរ​ចំពោះ​អាជ្ញាធររាជធានីភ្នំពេញ ដែលបានយកចិត្តទុកដាក់បង្ការទប់ស្កាត់បទល្មើសព្រហ្មទណ្ឌ និងគ្រោះថ្នាក់​ចរាចរណ៍បានយ៉ាងល្អក្នុងខែកុម្ភៈកន្លងមក។

ការកោតសរសើរនេះបានធ្វើឡើងនាព្រឹកថ្ងៃទី១៥ ខែមីនា ឆ្នាំ២០២៣ ក្នុងពេលដែល ឯកឧត្តម និងលោក កើត ឆែ អភិបាលរងរាជធានីភ្នំពេញ ​អញ្ជើញជាអធិបតី​ដឹកនាំកិច្ចប្រជុំសាមញ្ញលើកទី៤៦ របស់ក្រុមប្រឹក្សារាជធានីភ្នំពេញ អាណត្តិទី៣ នៅសាលារាជធានីភ្នំពេញ។

ឯកឧត្តម ម៉ប់ សារិន ក៏បានកោតសរសើរផងដែរ ​ចំពោះការរៀបចំសណ្តាប់ធ្នាប់បានល្អ ដល់អ្នក​លក់ដូរចល័ត និងអ្នកលក់ដូរនៅនឹងកន្លែង ​និងបានទប់ស្កាត់បទល្មើសគ្រឿង ក្មេងទំនើង​បានយ៉ាងល្អ​ មិនមានបង្កអសន្តិសុខតាមមូលដ្ឋាន។

លោក ហុក ហួលីម នាយករដ្ឋបាលស្តីទីនៃរដ្ឋបាលរាជធានីភ្នំពេញ ​បានឱ្យដឹងថា ក្នុងខែកុម្ភៈកន្លង​ទៅ បទល្មើសព្រហ្មទណ្ឌកើតមាន ៤៧លើក មានការថយចុះ ៥លើក បើធៀបនឹងខែមករា ​ស្មើនឹង ៩.៦១%។ ការបង្ក្រាបបទល្មើសព្រហ្មទណ្ឌបាន ៣៦ករណី ​ឃាត់ខ្លួនមនុស្ស ៥៨នាក់។ បង្ក្រាបបទល្មើសគ្រឿងញៀន​ បាន១០៩ករណី ឃាត់ខ្លួន ១៩១នាក់ និងបានកសាងសំណុំរឿង​បញ្ជូនទៅសាលាដំបូងរាជធានីភ្នំពេញ។ ការងារទប់ស្កាត់ និងបង្ក្រាបក្មេងទំនើងបាន ៧០ករណី ឃាត់ខ្លួន ១១៤នាក់ ​ពីបទបង្កឱ្យបាត់សណ្ដាប់ធ្នាប់ក្នុងមូលដ្ឋាន ​និងបានអនុវត្តវិធានការរដ្ឋបាល ដោយធ្វើកិច្ចសន្យាអប់រំប្រគល់ឱ្យអាណាព្យាបាលវិញ។

ចំពោះការងារបង្ក្រាបល្បែងស៊ីសងខុសច្បាប់ គឺបង្ក្រាបបានចំនួន ៥ករណី ឃាត់ខ្លួន ៣៦នាក់ ដកហូត​បានសម្ភារៈពាក់ព័ន្ធមួយចំនួនបញ្ជូនទៅសាលាដំបូងរាជធានីភ្នំពេញ និងបានបង្ក្រាប​ការជួញ​ដូរមនុស្ស និងការពារអនីតិជន និងយេនឌ័រ បាន ១ករណី ​ឃាត់ខ្លួនមនុស្សម្នាក់ និងបាន​កសាងសំណុំរឿងបញ្ជូនទៅសាលាដំបូងរាជធានីភ្នំពេញ។

គួរបញ្ជាក់ថា កិច្ចប្រជុំសាមញ្ញលើកទី៤៦ របស់ក្រុមប្រឹក្សារាជធានីភ្នំពេញបានពិនិត្យ និង​អនុម័តលើសេចក្តីព្រាងកំណត់ហេតុកិច្ចប្រជុំសាមញ្ញលើកទី៤៥​ កាលពីថ្ងៃទី១០ ខែកុម្ភៈ ឆ្នាំ២០២៣។​ ពិនិត្យនិងអនុម័តលើសេចក្តីព្រាងរបាយការណ៍ប្រចាំខែកុម្ភៈ ឆ្នាំ២០២៣ ស្តីពីការអនុវត្តការងាររបស់រដ្ឋបាលរាជធានីភ្នំពេញ។ ពិនិត្យ និងអនុម័តលើសេចក្ដីព្រាង​សេចក្តី​សម្រេចស្ដីពីការកែសម្រួលប្រការ១ នៃសេចក្ដីសម្រេច លេខ ០៣១/២២ សសរ.ធ ចុះថ្ងៃទី២៤ ខែកុម្ភៈ ឆ្នាំ២០២២ ស្តីពីការកែសម្រួលសមាសភាពគណៈកម្មាធិការពិគ្រោះយោបល់កិច្ចការស្ត្រី និងកុមារ។ ពិនិត្យ និងអនុម័តលើសេចក្ដីព្រាងសេចក្ដីសម្រេចស្ដីពីការកែសម្រួលប្រការ១ នៃសេចក្តីសម្រេច លេខ ០៦៧/២២ សសរធ ចុះថ្ងៃទី១៦ ខែមីនា ឆ្នាំ២០២២ ស្តីពីការកែ​សម្រួលសមាសភាពគណៈកម្មាធិការសម្របសម្រួលបច្ចេកទេស។ ពិនិត្យ និងអនុម័តលើសេចក្តី​ព្រាង​ពិន្ទុសូចនាករកម្មវិធីពានរង្វាន់សេវាសង្គមនៅថ្នាក់រាជធានីភ្នំពេញ ឆ្នាំ២០២២៕