ភ្នំពេញ៖ ឯកឧត្តម លេង ផាលី រដ្ឋលេខាធិការក្រសួងផែនការ ជាសមាជិកគណៈអចិន្ត្រៃយ៍​គណៈកម្មាធិការ​កណ្តាលសហភាពសហព័ន្ធយុវជនកម្ពុជា និងជាប្រធានប្រតិបត្តិ​ក្រុមការងារ​គ្រូពេទ្យស្ម័គ្រចិត្តឯកឧត្តម ហ៊ុន ម៉ានី បានជួបសំណេះសំណាលជាមួយសមាជិកក្រុមការងារ​គ្រូពេទ្យ​ស្ម័គ្រចិត្ត ​ឯកឧត្ដម ហ៊ុន ម៉ានី ប្រចាំសាកលវិទ្យាល័យវិទ្យាសាស្ត្រសុខាភិបាល។

ក្នុងពិធីជួបសំណេះសំណាលធ្វើឡើង នាព្រឹកថ្ងៃទី១៥ ខែមីនា ឆ្នាំ២០២៣នេះ ឯកឧត្តមសាស្ត្រាចារ្យ សាផុន វឌ្ឍនៈ ​ទីប្រឹក្សាក្រសួងសុខាភិបាល សាកលវិទ្យាធិការ នៃសាកលវិទ្យាល័យ​វិទ្យាសាស្ត្រ​សុខាភិបាល ​និងជាអនុប្រធានប្រតិបត្តិក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ទទួល​បន្ទុកជាប្រធានប្រតិបត្តិក្រុមការងារ ​គ្រូពេទ្យស្ម័គ្រចិត្ត ​ឯ​កឧត្តម ហ៊ុន ម៉ានី ប្រចាំសាកលវិទ្យាល័យ​វិទ្យាសាស្ត្រសុខាភិបាល បានមានប្រសាសន៍ថា គិតមកដល់ខែកុម្ភៈ ឆ្នាំ២០២៣នេះ សាកល​វិទ្យាល័យ បាន​បញ្ចូល​សមាជិក​ សមាជិកាសហភាពសហព័ន្ធយុវជនកម្ពុជា ​ជាមន្ត្រី បុគ្គលិក សាកល​វិទ្យាល័យ ចំនួន១០០នាក់ និងសមាជិក សមាជិកា.ស.ស.យ.ក ​ជានិស្សិតចំនួន៣,១៥៥នាក់ ស្មើនឹង៥១,៦៥ % នៃនិស្សិតសរុបនៅសាកលវិទ្យាល័យ។

ឯកឧត្តមសាស្ត្រាចារ្យ សាផុន វឌ្ឍនៈ បានលើកឡើងទៀតថា យោងតាមអនុសាសន៍ណែនាំ​ដ៏ខ្ពង់ខ្ពស់​របស់ឯកឧត្ដម ហ៊ុន ម៉ានី ប្រធានសហភាពសហព័ន្ធយុវជនកម្ពុជា នាឱកាសដែល​ឯកឧត្តមប្រធាន បានផ្ដល់កិត្តិយសសំណេះសំណាល ជាមួយសមាជិក.ស.ស.យ.ក.ប្រចាំសាកល​វិទ្យាល័យ វិទ្យាសាស្ត្រសុខាភិបាល នាថ្ងៃទី១៨ ខែមករា ឆ្នាំ២០២៣ថ្មីៗនេះ និងដោយក្តីគោរព ស្រលាញ់​ ឯកឧត្តម ហ៊ុន ម៉ានី ដែលបានផ្ដល់ឱកាសដល់និស្សិតសាកលវិទ្យាល័យ បានចូលរួម​សកម្មភាព​មនុស្សធម៌ជាមួយក្រុមគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ព្រមជាមួយ​បុព្វហេតុ​ក្នុងការចូលរួមចំណែកជួយសម្រាលបន្ទុករបស់ប្រជាពលរដ្ឋកម្ពុជាយើង ក្រោមមាគ៌ាដឹកនាំប្រកប​ដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រី គិតមកដល់ថ្ងៃទី១៥ ខែមីនា ឆ្នាំ២០២៣នេះ​ មានមន្ត្រី បុគ្គលិក និស្សិតសាកលវិទ្យាល័យវិទ្យាសាស្ត្រសុខាភិបាល សរុបចំនួន ២,១៥៧ នាក់ ដែលក្នុងនោះ មន្ត្រីបុគ្គលិក ចំនួន៨២នាក់ និងនិស្សិតពីគ្រប់មហាវិទ្យាល័យ សាលាចំនួន២,០៧៥នាក់ បានស្ម័គ្រចិត្តចូលរួមជាសមាជិកក្រុមគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី។

ឯកឧត្តម លេង ផាលី ប្រធានប្រតិបត្តិក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បានថ្លែងថា ក្នុងរយៈពេល ១១ឆ្នាំ (០២ ធ្នូ ឆ្នាំ២០១២ ដល់ ១៥ មីនា ឆ្នាំ២០២៣) ក្រោមការដឹកនាំដ៏ខ្ពង់ខ្ពស់​ដោយ​ផ្ទាល់ ការ​ចង្អុលបង្ហាញជាប្រចាំ ប្រកបដោយទស្សនវិស័យវែងឆ្ងាយ និងប្រាកដប្រជាគួរ​ឱ្យ​គោរពកោតសរសើរ របស់ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា ជាប្រធាន​គណៈកម្មការទី៧នៃរដ្ឋសភា និងប្រធានកិត្តិយសក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ដែលមានក្រុមគ្រូពេទ្យចំនួន ជាង១ម៉ឺននាក់ បានបំពេញបេសកកម្មដ៏ថ្លៃថ្លាដោយទទួល​បាន​លទ្ធផលប្រកបដោយប្រសិទ្ធភាព និងប្រសិទ្ធផលជាច្រើនឥតគណនា ក្នុងការចូលរួមអប់រំ​ផ្សព្វផ្សាយ ចាក់វ៉ាក់សាំងបង្ការជំងឺកូវីដ-១៩ ​ក្នុងក្របខណ្ឌទូទាំងប្រទេស សង្គ្រោះបឋម យក​សំណាករកវីរុសកូវីដ-១៩ និងពិនិត្យព្យាបាលជំងឺជូនប្រជាពលរដ្ឋដោយឥតគិតថ្លៃក្នុង ២៥រាជធានី- ខេត្ត នៃព្រះរាជាណាចក្រកម្ពុជា បានចំនួនជិត៩០០លើក ជាពិសេសទៅទៀតក្រុមការងារគ្រូពេទ្យ​​ស្ម័គ្រចិត្តឯកឧត្តម ហ៊ុន ម៉ានី ចំនួន ៤,៦០១នាក់ បាននិងកំពុងចុះយុទ្ធនាការចាក់វ៉ាក់សាំង​បង្ការ​ជំងឺកូវីដ-១៩ ​ក្នុងក្របខណ្ឌទូទាំងប្រទេសដោយឥតគិតថ្លៃ ​និងឥតគិតថវិកាបេសកកម្ម ដោយចាក់​ជូន​ប្រជាពលរដ្ឋ ក្នុង២៥ រាជធានី-ខេត្តផងដែរ៕អត្ថបទ រដ្ឋា