កំពង់ស្ពឺ៖ ឯកឧត្តម ហ៊ុន ម៉ានី អ្នកតំណាងរាស្រ្តមណ្ឌលខេត្តកំពង់ស្ពឺ ព្រមទាំងឯកឧត្តម លោកជំទាវ សមាជិកព្រឹទ្ធសភា និងរដ្ឋសភា ប្រចាំភូមិភាគ និងមណ្ឌលខេត្តកំពង់ស្ពឺ នាព្រឹកថ្ងៃទី១៥ ខែមីនា ឆ្នាំ២០២៣នេះ បានអញ្ជើញជួបសំណេះសំណាលជាមួយកងកម្លាំង​ខេត្តកំពង់ស្ពឺ សរុបប្រមាណ ២០០នាក់ នៅក្នុងបរិវេណសាលាខេត្ត។

ក្នុងពិធីជួបសំណេះសំណាលខាងលើនេះ ​មានការចូលរួមពីសំណាក់ឯកឧត្តម យឹម សុខុម ប្រធាន​ក្រុមប្រឹក្សាខេត្តកំពង់ស្ពឺ ឯកឧត្តមឧត្តមសេនីយ៍ឯក ស៊ុន សារឿន មេបញ្ជាការរងកងទ័ពជើងទឹក និងជាមេបញ្ជាការតំបន់ការពារកោះឆ្នេរ ​លោកឧត្តមសេនីយ៍ សំ សាមួន ស្នងការនគរបាល​ខេត្តកំពង់ស្ពឺ លោកឧត្តមសេនីយ៍ទោ ម៉ាន់ ម៉ាច មេបញ្ជាការតំបន់ប្រតិបត្តិសឹករងកំពង់ស្ពឺ លោកឧត្តមសេនីយ៍ទោ ជូ សារុន មេបញ្ជាការកងរាជអាវុធហត្ថខេត្តកំពង់ស្ពឺ ក្រុមការងាររដ្ឋ​បាលខេត្ត និងកងកម្លាំងទាំង៤ប្រភេទ។

ឯកឧត្តម ហ៊ុន ម៉ានី បានថ្លែងថា ការជួបជុំថ្ងៃនេះ គឺក្នុងឱកាសអបអរសាទរនៃការជិតឈានមកដល់ នៃពិធីបុណ្យចូលឆ្នាំខ្មែរ និងសួរសុខទុក្ខព្រមទាំងថ្លែងអំណរគុណចំពោះកិច្ចខិតខំប្រឹងប្រែង ក្នុងការ​បំពេញបេសសកម្ម ថែរក្សាសុខសន្តិភាពជូនប្រជាជន។ កងកម្លាំងមានតួនាទីសំខាន់ ក្នុងការគោរព​យ៉ាងម៉ឹងម៉ាត់តាមបទបញ្ជា ដោយបន្តឈរជើងការពារនៅតាមទិសដៅ ដើម្បីធានាសុវត្ថិភាព​ជូន​ប្រជាពលរដ្ឋ ការពារសន្តិសុខ សណ្តាប់ធ្នាប់ជូនប្រទេសជាតិ។

ឯកឧត្តម ក៏បានសូមឲ្យកងកម្លាំងទាំងអស់ បន្តជឿជាក់លើគោលនយោបាយដាក់​ចេញដោយរាជ​រដ្ឋាភិបាល ក្រោមការដឹកនាំប្រកប​ដោយយុទ្ធសាស្រ្ត និងគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្រី្ត ដែលលោកតែងតែបន្តគិតគូរ និងយកចិត្តទុកដាក់ចំពោះកងកម្លាំងទាំងអស់។ និយាយដោយឡែក តាមបទពិសោធន៍ដែលយើងធ្លាប់បានឆ្លងកាត់កាលពីឆ្នាំ២០១៣ គឺជាមេរៀន​ដ៏ជូរចត់ ហើយយើងជឿថា អង្គការចាត់តាំងបដិវត្តន៍ពណ៌ និងផែនការអនុវត្តនៅតែមាន ទោះបីជា​ពេលនេះមិនទាន់នឹងអាចកើតមាននៅឡើយ។ ដូច្នេះសូមកងកម្លាំងទាំងអស់ត្រៀមខ្លួន រួមទាំង​បង្កើន​ការប្រុងប្រយ័ត្នខ្ពស់ដោយឈរលើជំហរដ៏រឹងមាំ​ ក្នុងការរារាំងដល់ការធ្វើបដិវត្តន៍ពណ៌ ការ​ប៉ុនប៉ងនានា ក្នុងន័យជ្រៀតចូលឲ្យបានក្នុងកិច្ចការដឹកនាំប្រទេស បង្កចលាចលដល់ប្រទេសជាតិ និងផ្តល់អសុវត្ថិភាព អសន្តិសុខដល់ប្រជាពលរដ្ឋកម្ពុជា។ ដើម្បីយល់ពីគុណតម្លៃនៃសុខសន្តិភាព យើងត្រូវប្រៀបធៀបដំណាក់កាលដែលប្រទេសកម្ពុជា គ្មានសុខសន្តិភាព រងនូវសោកវិនាសកម្ម​ដ៏ឃោរឃៅ សង្រ្គាមរ៉ាំរ៉ៃ នឹងត្រូវនឹកឃើញដល់អ្នកដែលបានលៈបង់ និងពុះពារ ដើម្បីដណ្តើម​យកសុខ​សន្តិភាពជូនប្រទេសជាតិ។ ផ្សារភ្ជាប់ជាមួយគ្នាដែរ ឯកឧត្តម បានរំលេចដែរថា សន្តិភាព បាននាំមកនូវការអភិវឌ្ឍជូនប្រទេសកម្ពុជា។ ជាឧទាហរណ៍ តាមរយៈនយោបាយឈ្នះឈ្នះ យើងក៏ទទួលបានសុខសន្តិភាព និងស្ថេរភាពនយោបាយ ដែលផ្តល់ឱកាសអោយប្រទេសកម្ពុជា មានអ្នកវិនិយោគច្រើន ​ដែលជាចំណុចវិជ្ជមានក្នុងការអភិវឌ្ឍសង្គមសេដ្ឋកិច្ចប្រទេសកម្ពុជា។ សុខសន្តិភាព បានទាក់ទាញឱកាស នៃការវិនិយោទុន ​ពង្រីកខឿនសេដ្ឋកិច្ច គៀងគរថវិកាជាតិ បង្កើនប្រាក់វិវត្តន៍ និងអត្ថប្រយោជន៍ផ្សេងៗទៀតជូនដល់ប្រទេសជាតិ។ ការខិតខំរបស់រាជរដ្ឋាភិបាល ក្នុងការខិតខំការពារសុខសន្តិភាពនេះ គឺដើម្បីកូនចៅជំនាន់ក្រោយ និងគិតគូរពីអនាគតរបស់ពួកគេ​ និងធានានូវឱកាសរស់នៅ សិក្សា រៀនសូត្រ ប្រកបការងារ ក្រោមម្លប់នៃសុខសន្តិភាព៕ អត្ថបទ រដ្ឋា