​អាមេរិក៖ ឧត្ដមសេនីយ៍​លោក Pat Ryder អ្នកនាំពាក្យ​មន្ទីរ​បញ្ច​កោណ​និយាយថា យាន​ដ្រូ​ន​ស៊ើបការណ៍ MQ-9 "Reaper" របស់​អាមេរិក​បាន​ធ្លាក់​ចូល​ទៅ​ក្នុង​សមុទ្រ​ខ្មៅ​កាលពី​ថ្ងៃ​អង្គារ បន្ទាប់ពី​យន្តហោះ​ចម្បាំង​របស់​រុស្ស៊ី ២​គ្រឿង​បាន​អនុវត្ត​នូវ​អ្វី​ដែល​សហរដ្ឋអាមេរិក​ហៅថា បាញ់​ស្ទាក់​ចាប់​ដោយ​មិន​ប្រុងប្រយ័ត្ន​។

​នៅ​ម៉ោង​ប្រហែល ៧:០៣​នាទី​ព្រឹក​ម៉ោង​នៅ​អឺរ៉ុប​កណ្តាល យន្តហោះ Su-27 របស់​រុស្ស៊ី​មួយ​គ្រឿង​បាន​វាយប្រហារ​លើ​ស្លាប​យាន​ដ្រូ​ន MQ-9 បណ្ដាល​ឲ្យ​យាន​ដ្រូ​ន ​MQ-9 ​ធ្លាក់​ចូល​ទៅ​ក្នុង​ដែនទឹក​អន្តរជាតិ​។ ឧបទ្ទវហេតុ​នេះ​បង្ហាញ​ពី​ការ​ខ្វះ​សមត្ថកិច្ច​ បន្ថែម​ពីលើ​ការ​ពុំមាន​សុវត្ថិភាព និង​គ្មាន​វិជ្ជាជីវៈ​។​ វា​ជា​ឧបទ្ទវហេតុ​លើកដំបូង​ចាប់​តាំង​ពី​ការឈ្លានពាន​របស់​រុស្ស៊ី​លើ​អ៊ុយ​ក្រែ​ន​កាល​ពីមួយ​ឆ្នាំមុន ហើយបាន​ធ្វើ​ឲ្យ​មាន​ការ​ថ្កោលទោស​ពី​សេត​វិមាន និង​មន្ទីរ​បញ្ច​កោណ ដែល​បាន​ព្រមាន​ពី​ហានិភ័យ​កើន​ឡើង​។

​កងទ័ពអាកាស​សហរដ្ឋ​អាមេរិក​បាន​និយាយ​ថា យាន​ដ្រូ​ន​កំពុង​ធ្វើ​បេសកកម្ម​ស៊ើបការណ៍ និង​ឃ្លាំមើល។ មន្ទីរ​បញ្ច​កោណ​បាន​និយាយ​ថា​ យាន​ដ្រូ​ន MQ-9 អាច​ផ្ទុក​សព្វាវុធ ប៉ុន្តែ​បាន​បដិសេធ​មិន​ធ្វើ​អត្ថាធិប្បាយ​ថា​ តើ​យាន​ដ្រូ​ន​ពិសេស​នេះ​បំពាក់អាវុធ​ឬ​អត់​។ អ្នកនាំពាក្យ​រូប​នេះ​គ្រាន់តែ​និយាយ​ថា ឧបទ្ទវហេតុ​នេះបាន​កើត​ឡើង​នៅ​ក្នុង​ដែនអាកាស​អន្តរជាតិ​៕

អត្ថបទ៖ ប៊ុនថន