ភ្នំពេញ៖ យោងតាមការអង្កេតវាយតម្លៃសហគមន៍កសិកម្មនៅកម្ពុជា ដោយនាយកដ្ឋានអភិវឌ្ឍន៍​សហគមន៍​កសិកម្ម​កាលពីឆ្នាំ២០២២បានឲ្យដឹងថា សហគមន៍កសិកម្មប្រមាណជាង ១៧% (២១៧សហគមន៍) មានស្ថានភាពរឹងមាំល្អ ៦៦,២ % (៨២៨ សហគមន៍) មានស្ថានភាពមធ្យម និង ១៦,៣ % (២០៤សហគមន៍)មានស្ថានភាពខ្សោយ ដែលទាំង​នេះសរបញ្ជាក់ឱ្យឃើញថា សហគមន៍កសិកម្មភាគច្រើននៅកម្ពុជា ស្ថិតនៅស្ថានភាពមធ្យម និងខ្សោយ។

ឯកឧត្តមបណ្ឌិត ងិន ឆាយ ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានកសិកម្ម នៅក្នុង​អង្គសន្និបាត​បូកសរុបការងារសហគមន៍កសិកម្មប្រចាំឆ្នាំ២០២២ និងលើកទិសដៅឆ្នាំ២០២៣ ក្រោមប្រធានបទ “សហគមន៍កសិកម្ម ជាចលករនៃផលិតកម្មកសិកម្មតាមកិច្ចសន្យា” កាលពីថ្ងៃទី១៤ ខែមីនាកន្លងទៅ បានលើក​ឡើងថា ពាក្យសហគមន៍កសិកម្ម គឺជាសហករណ៍កសិកម្ម ដោយសារគោលការណ៍គ្រឹះ និងគោលគំនិត​សហករណ៍​ដែលសហគមន៍កសិកម្មនៅកម្ពុជាយកមកអនុវត្តនាពេលបច្ចុប្បន្ននេះ គឺជាគោលការណ៍គ្រឹះ​របស់សម្ព័ន្ធ​សហករណ៍​អន្តរជាតិ ដែលកំពុងត្រូវបានប្រើប្រាស់នៅទូទាំងពិភពលោក និងត្រូវបានដាក់បញ្ចូល​ទៅក្នុងច្បាប់​ស្តីពីសហគមន៍​កសិកម្ម។ ឯកឧត្តមបានបន្តថា គិតចាប់ពីឆ្នាំ២០០៣ កម្ពុជាមានតែសហគមន៍កសិកម្មចំនួន ១គត់ ប៉ុន្តែរហូតមក​ឆ្នាំ២០២២ មានសហគមន៍កសិកម្មចំនួនជាង ១ ២០០សហគមន៍កសិកម្ម ត្រូវបានបង្កើតទ្បើងដោយប្រជាកសិករ។

ជុំវិញនៃការបង្ហាញថា សហគមន៍កសិកម្មភាគច្រើននៅកម្ពុជាស្ថិតនៅស្ថានភាពមធ្យម និងខ្សោយ ឯកឧត្តម ងិន ឆាយ បានលើកឡើងថា ដោយសារសហគមន៍កសិកម្មភាគច្រើន បាននឹងកំពុងជួបប្រទះបញ្ហាប្រឈមជាច្រើន មាន​ដូចជា សមត្ថភាពដឹកនាំនិងគ្រប់គ្រងនៅខ្សោយ ខ្វះខាតដើមទុនដើម្បីពង្រីកមុខរបរ ថ្នាក់ដឹកនាំគ្រប់គ្រង​សហគមន៍​កសិកម្មភាគច្រើនមានភាពវ័យចំណាស់ និងមិនមានសមត្ថភាពលើការធ្វើអាជីវកម្មមុខជំនួញ ខ្វះការរៀប​ចំ​យុទ្ធសាស្រ្តធ្វើទីផ្សារកសិផល ការងារគ្រប់គ្រងហិរញ្ញវត្ថុនិងការធ្វើអាជីវកម្មមុខជំនួញនៅមានកម្រិត ខ្វះខាត​ហេដ្ឋារចនាសម្ព័ន្ធរូបវន្តគាំទ្រនិងទីផ្សារ ការចូលរួមពីយុវជនក្នុងសហគមន៍កសិកម្មនៅមានចំនួនតិច និងការយល់​ដឹងលើបច្ចេកទេសកសិកម្មទំនើបលើការដាំដុះដំណាំនិងការចិញ្ចឹមសត្វ និងបច្ចេកវិទ្យាឌីជីថល ក៏មានកម្រិត​ផងដែរ។

នៅក្នុងកិច្ចប្រជុំនោះ ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានណែនាំ​ឲ្យ​នាយកដ្ឋានដំណាំចំនួន៣ រួមមាន នាយកដ្ឋានដំណាំស្រូវ, នាយកដ្ឋានដំណាំសាកវប្បកម្ម និងដំណាំរួមផ្សំ និង​នាយកដ្ឋានដំណាំឧស្សាហកម្ម និងនាយកដ្ឋានការពារដំណាំ អនាម័យ និងភូតគាមអនាម័យ ត្រូវផ្តោតការ​អនុវត្តឱ្យ​សកម្មនូវជំនាញរបស់ខ្លួននៅតាមសហគមន៍កសិកម្ម។ ជាមួយគ្នានេះដែរ ឯកឧត្តម ក៏បានស្នើតំណាង​សហគមន៍​កសិកម្ម និងសហភាពសហគមន៍កសិកម្មទាំងអស់ ត្រូវខិតខំស្វែងរកដៃគូពាក់ព័ន្ធ ដើម្បីជំរុញការទិញ​ធាតុចូល​កសិកម្មក្នុងតម្លៃលក់ដុំ និងការលក់កសិផលរបស់ប្រជា​កសិករបានតម្លៃ​សមរម្យតាមរយៈការ​ធ្វើផលិតកម្ម​កសិកម្ម​តាមកិច្ចសន្យា និងស្នើនាយកដ្ឋានជំនាញទាំងអស់ ត្រូវអនុវត្តការងារជំនាញរបស់ខ្លួននៅតាមសហគមន៍កសិកម្ម ដើម្បីពង្រឹងសមត្ថភាពបច្ចេកទេសកសិកម្មដល់កសិករជាសមាជិក និងដើម្បីធានាឲ្យបាននូវភាពរីកចម្រើន និងនិរន្តភាពរបស់សហគមន៍កសិកម្ម៕ អត្ថបទ៖ ឈិត បូរ៉ាវី