ភ្នំពេញ៖ ឯកឧត្តម នាយឧត្តមសេនីយ៍កិត្តិបណ្ឌិត ហ៊ីង ប៊ុនហៀង អគ្គមេបញ្ជាការរង កងយោធពលខេមរភូមិន្ទ (ខ.ភ.ម) និងជាមេបញ្ជាការ បញ្ជាការដ្ឋានអង្គរក្ស និងជានាយករងខុទ្ទកាល័យសម្តេចតេជោនាយករដ្ឋមន្រ្ដី បានមានប្រសាសន៍ថានាយទាហាននិងពលទាហានបញ្ជាការដ្ឋានអង្គរក្ស បានធ្វើពលីកម្មយ៉ាងច្រើន​ក្នុងបុព្វ​ហេតុ​ការពារ​ជា​តិបូរណៈភាពទឹកដី និងប្រជាជនកម្ពុជានៅក្នុងប្រទេសនិងតាមព្រំដែនតំបន់ប្រាសាទព្រៈវិហារ និងប្រាសាទតាមាន់ នាពេលកន្លងមក។

ឯកឧត្ដមបានថ្លែងដូចនេះក្នុងឱកាស ប្រារព្វពិធីគោរពវិញ្ញាណក្ខ័ន្ធជូនដល់អតីតយុទ្ធជន និងយុទ្ធនារី នៃបញ្ជាការដ្ឋានអង្គរក្ស ដែលបានធ្វើពលីកម្មនិងទទួលមរណៈភាព ក្នុងបុព្វហេតុជាតិមាតុភូមិ និងប្រជាជនកម្ពុជា នាពេលកន្លងមកនាព្រឹកថ្ងៃទី១៥ ខែមីនា ឆ្នាំ២០២៣នេះ នៅទីបញ្ជាការដ្ឋានអង្គរក្សក្រុងតាខ្មៅ។

ឯកឧត្ដមថ្លែងថា បញ្ជាការដ្ឋានអង្គរក្ស ជាអង្គភាពស្នូលមួយរបស់ ខ.ភ.ម ដែលកន្លងមកបានចូលរួមបំពេញតួនាទី ភារកិច្ចយ៉ាងសកម្មក្នុងកិច្ចការពារជាតិមាតុភូមិ ការពារប្រជាជនជាសេនាធិការកាកបាទក្រហមកម្ពុជាដែលមានសម្ដេចកិត្តិព្រឹទ្ធបណ្ឌិតប៊ុនរ៉ានីហ៊ុនសែនជាប្រធានកាកបាទក្រហមកម្ពុជា ក្នុងការជួយដឹកជញ្ជូនលីសែងស្បៀង អំណោយនិងសម្ភារៈផ្សេងៗ ដើម្បីយកទៅចែកជូន​ប្រជាពលរដ្ឋងាយរងគ្រោះ ជនក្រីក្រចាស់ជរា ស្រ្តីមេម៉ាយ គ្រោះធម្មជាតិផ្សេងៗ និងបានចូលរួមការងារសង្គម​កិច្ចជាច្រើនទៀត និងចូលរួមកសាងនិងអភិវឌ្ឍន៍ជាតិជាពិសេសរក្សាការពារសន្តិសុខសណ្ដាប់ធ្នាប់ធានាសុវត្ថិភាពជូនប្រមុខរាជរដ្ឋាភិបាលសម្ដេចតេជោ និងសម្ដេចកិត្តិព្រឹទ្ធបណ្ឌិតព្រមទាំងក្រុមគ្រួសារបាន១០០% ដើម្បីឱ្យសម្ដេចមានលទ្ធភាពពេលវេលា​គ្រប់គ្រាន់ក្នុងការដឹក នាំប្រទេសជាតិឈានទៅរកត្រើយសុខសន្តិភាពពេញលេញនិងការអភិវឌ្ឍដូចសព្វថ្ងៃនេះ។

ឯកឧត្ដមបញ្ជាក់ថា នាយទាហាន នាយទាហានរង និងពលទាហាន ក្នុងបញ្ជាការដ្ឋានអង្គរក្សទាំងអស់ បានប្តេជ្ញាចិត្តស្មោះត្រង់ ការពារ និងបម្រើ សម្តេចតេជោ ហ៊ុនសែន និងសម្តេចកត្តិព្រឹទ្ធបណ្ឌិត ព្រមទាំងក្រុមគ្រួសារ ឲ្យបាន១០០% និងលុះអវសាន្តនៃជីវិតនិងបន្តគាំទ្រសម្ដេចតេជោ ហ៊ុនសែនជានាយករដ្ឋមន្រ្តីជារៀងរហូត និងគាំទ្រឯកឧត្ដមបណ្ឌិត ហ៊ុន ម៉ាណែតជាបេក្ខជននាយករដ្ឋមន្រ្តី នៃពេលអនាគត៕ អត្ថបទ៖ ម៉ក់ រ៉េនីតា