អន្ដរជាតិ៖ ក្រុមមេបញ្ជាការសហរដ្ឋអាមេរិកដឹកនាំសមយុទ្ធប្រឆាំងអំពើភេរវកម្មប្រចាំឆ្នាំនៅអាហ្វ្រិកខាងលិច បានជំរុញ​ឲ្យ​បណ្តាប្រទេសតាមតំបន់ឆ្នេរទាំងអស់នេះ ចេះពឹងកម្លាំងខ្លួនឯងដើម្បីទប់ទល់ជាមួយនឹងក្រុមបះបោរអ៊ីស្លាម ជាជាងទៅពឹងកម្លាំងមិនមែនជាលោកខាងលិច ពោល គឺរយៈពេល ១ឆ្នាំ ក្រោយប្រទេសម៉ាលី ជួលទាហានស៊ីឈ្នូលរុស្ស៊ីជួយពួកគេ​ប្រយុទ្ធ​ជាមួយក្រុមជីវពល។

ទំនាក់ទំនងរវាងរុស្ស៊ី និងសហរដ្ឋអាមេរិក កាន់តែប្រកបដោយអរិភាពខ្លាំងជាងមុន ចាប់តាំងពីទីក្រុងម៉ូស្គូ បើកការវាយលុកទៅ​លើអ៊ុយក្រែនកាលពីរយៈពេលជាង ១ឆ្នាំមុន ហើយទីក្រុងវ៉ាស៊ីងតោន និងសម្ព័ន្ធមិត្តរបស់ពួកគេ បានជំទាស់ដាច់ណាត់ចំពោះឥទ្ធិពលរុស្ស៊ី​នៅអាហ្វ្រិកខាងលិច។ អំឡុងសមយុទ្ធយោធាក្នុងខែនេះ នៅតំបន់ភាគខាងជើងប្រទេសហ្គាណា ក្រុមមេបញ្ជាការអាមេរិក បានជំរុញឲ្យទាហានចែករំលែកលេខទូរស័ព្ទជាមួយសមភាគីបរទេសកំពុងប្រតិបត្តិការតាមតំបន់ព្រំដែន ដែលមានចម្ងាយប៉ុន្មានគ.ម ពីគ្នា​ប៉ុណ្ណោះ៕