ស៊ីហ្គេម៖ គណៈកម្មាធិការជាតិរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេម ២០២៣ (CAMSOC-CAMAPGOC) បានបញ្ចប់ការទទួលក្រុមហ៊ុនឧបត្ថម្ភកម្រិត១ និងកម្រិត២ ហើយ ខណៈក្រុមហ៊ុនអាកាសចរណ៍ខេមបូឌាអ៊ែរវ៉េបានក្លាយជាដៃគូចលនូបត្ថម្ភក្រោយគេ ដែលបានចុះហត្ថលេខាលើកិច្ចព្រមព្រៀងចូលរួមឧបត្ថម្ភព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេមនៅកម្ពុជាកាលពីថ្ងៃទី១៥ ខែមីនា ឆ្នាំ២០២៣ ម្សិលមិញ។
ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC-CAMAPGOC មានប្រសាសន៍ថា ក្រុមហ៊ុនអាកាសចរណ៍ក្នុងស្រុកមួយនេះ បានរួមចំណែកឧបត្ថម្ភគាំទ្រអត្តពលិកកម្ពុជាជាច្រើនឆ្នាំមកហើយ ជាក់ស្ដែងកាលពីស៊ីហ្គេមនៅវៀតណាម តបតាមការយកចិត្តទុកដាក់របស់រាជរដ្ឋាភិបាល ខេមបូឌាអ៊ែរវ៉េក៏បានចូលខ្លួនឧបត្ថម្ភការធ្វើដំណើរឥតគិតថ្លៃដល់ប្រតិភូ និងអត្តពលិកកម្ពុជារាប់រយនាក់ ហើយឥលូវក្រុមហ៊ុនបានបន្ដឧបត្ថម្ភគាំទ្រព្រឹត្តិការណ៍ក្នុងស្រុក ទាំងថវិកា សំបុត្រយន្ដ និងការផ្សព្វផ្សាយបន្ថែមទៀត។
ក្នុងនាមប្រតិបត្តិករកីឡា និងតំណាងគណៈកម្មាធិការជាតិ CAMSOC ឯកឧត្តមបានបញ្ជាក់ថា មកទល់ពេលនេះកិច្ចសហការប្រតិបត្តិជាមួយដៃគូចលនូបត្ថម្ភកម្រិត១ និងកម្រិត២ គឺបានបិទបញ្ចប់ហើយ នៅឡើយដៃគូឧបត្ថម្ភកម្រិតទី៣ ដែលផ្ដោយលើផ្នែកសេវាផ្សេងៗនៅតែបន្ដ ហើយក៏គ្រោងនឹងបញ្ចប់ក្នុងពេលឆាប់ៗនេះដែរ។ បន្ថែមលើនេះ ឯកឧត្តម វ៉ាត់ ចំរើន ក៏បានអំពាវនាវដល់សប្បុរសជន ដែលមានបំណងរួមចំណែកអភិវឌ្ឍន៍ក្នុងព្រឹត្តិការណ៍ប្រវត្តិសាស្ដ្រ គឺអាចចូលរួមឧបត្ថម្ភដល់ក្រុមជម្រើសជាតិកម្ពុជា ឬ Team Cambodia ដើម្បីជាការរួមចំណែកលើកទឹកចិត្តដល់អត្តពលិកកម្ពុជាឆ្ពោះទៅដណ្ដើមមេដាយ និងឧត្តមភាពជូនជាតិផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
