ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តី បានអះអាងជាថ្មីម្តងទៀតថា គ្មានវត្តមានកងទ័ពចិន ឬកងទ័ពប្រទេសនាឈរជើងនៅកម្ពុជានោះទេ ការដែលកម្ពុជាកំពុងសាងសង់មូលដ្ឋានសមុទ្ររាមនាពេល បច្ចុប្បន្ននេះគឺធ្វើឡើងដើម្បីពង្រីកសមត្ថភាពបន្ថែមរបស់កងទ័ពជើងទឹករបស់ខ្លួនប៉ុណ្ណោះ ខណៈការធ្វើនេះក៏គ្មានការគំរាមកំហែងដល់អ្នកណានោះដែរ។

ក្នុងឱកាសអញ្ជើញជាអធិបតីភាពក្នុងពិធីប្រគល់សញ្ញាបត្រជូននិស្សិត នៃសាកលវិទ្យាល័យបៀលប្រាយ សរុបប្រមាណ ៤,៥៦៦នាក់ នៅមជ្ឈមណ្ឌលសន្និបាត និងពិព័រណ៍កោះពេជ្រ នាព្រឹកថ្ងៃទី១៦ ខែមីនា ឆ្នាំ២០២៣នេះ សម្តេចតេជោ ហ៊ុន សែន បានសង្កត់ធ្ងន់ថា សូមផ្តាំទៅបណ្តាប្រទេសមួយ ចំនួនដែលធ្វើយុទ្ធនាការ​បង្ខូច​កេរ្តិ៍ឈ្មោះ​មកលើកម្ពុជា ដោយចោទប្រកាន់កម្ពុជាម្តងហើយម្តងទៀតថា កម្ពុជាអនុញ្ញាតឲ្យកងទ័ពចិនតាំងមូលដ្ឋានលើទឹកដីខ្លួននោះគឺមិនមែនជាការពិតនោះទេ។

ជាមួយគ្នានោះដែរ សម្តេចតេជោ ហ៊ុន សែន នាយករដ្ឋមន្រ្តី ក៏បានបញ្ជាក់ប្រាប់ដល់បណ្តាប្រទេស​ទាំង​អស់ដែលជាមិត្តរបស់កម្ពុជាផងដែរថា បន្ទាប់ពីកម្ពុជាធ្វើការសាងសង់ ឬការស្តាកំពង់ផែ​របស់ខ្លួននៅខេត្តព្រះសីហនុរួចហើយនោះ កម្ពុជានឹងស្វាគមន៍គ្រប់នាវាប្រទេសទាំងអស់​ដែលចង់មកចូលសំចតនៅកម្ពុជា ហើយពេលនោះប្រសិនបើចង់ធ្វើសមយុទ្ធរួមគ្នា​ជាមួយកងទ័ព​កម្ពុជាក៏កម្ពុជាមិនបដិសេធនោះដែរ។

សម្តេចតេជោ ហ៊ុន សែន ក៏បានឌឺដងដល់ប្រទេសខ្លះបានធ្វើការថតតាមប្រព័ន្ធផ្កាយរណបនៅជុំវិញ ការសាងសង់កំពង់ផែព្រះសីហនុផងដែរថា ការដែលកម្ពុជាសាងសង់នេះពុំមានការ​លួចលាក់​នោះទេ គឺ បានធ្វើឡើងដោយបើកចំហរ ខណៈពេលនេះក៏បានចាក់គ្រឹះរួចដែរ សូមប្រទេស​ដែលបានចោទប្រកាន់ កម្ពុជាលើផ្លូវផ្សេងនោះល្មមបញ្ចប់ការធ្វើយុទ្ធនាការបង្ខូចកេរ្តិ៍​កម្ពុជាបន្តទៀតទៅ។

សម្តេចក៏បានពន្យល់បន្ថែមទៀតផងដែរថា សព្វថ្ងៃនេះកំពុងផែរបស់កម្ពុជាតូច ហើយរាក់ ដូច្នេះ ត្រូវតែពង្រីកបន្ថែមសម្រាប់ចូលសំចតនូវនាវាធំៗ មិនថានាវាកម្ពុជា ឬប្រទេសណានោះទេ គឺអាចចូលចត់ បានទាំងអស់បន្ទាប់ពីធ្វើការសាងសង់រួចនោះ៕ អត្ថបទ៖ បាន ចក់