​​វាយ​កូន​បាល់៖ កីឡាករ​វាយ​កូន​បាល់​កំពូល​របស់​អង់គ្លេស​នាពេល​បច្ចុប្បន្ន Cameron Norrie បាន​បញ្ចប់​បេសកកម្ម​របស់ខ្លួននៅ​ព្រឹត្តិការណ៍ Indian Wells លើ​ទឹកដី​សហរដ្ឋអាមេរិក​ហើយ ក្រោយ​រង​បរាជ័យ​ក្រោម​ស្នាដៃ​កីឡាករ​ម្ចាស់ផ្ទះ Frances Tiafoe នៅ​វគ្គ ៨ នាក់​ចុងក្រោយ​។

​​Cameron Norrie ដែលជា​ជើងឯក​នៅទីនេះ​កាលពី​ឆ្នាំ២០២១ ហាក់​ធ្វើ​មិនបាន​ល្អ​ជាង​ការប្រកួត​សព្វដង ដោយ​ធ្វើឱ្យមាន​កំហុស​បច្ចេកទេស​ដល់​ទៅ ២៨លើក​បណ្តាលឱ្យ​ចាញ់​កីឡាករ​វ័យ ២៥ឆ្នាំ Frances Tiafoe ២សិត​ផ្ទួនៗ ៦-៤ និង ៦-៤​។ ​Frances Tiafoe នឹង​ឡើង​វគ្គ​ពាក់កណ្តាល​ផ្តាច់ព្រ័ត្រ​លើកដំបូង​ក្នុង​កម្មវិធី Masters 1000 ដោយ​នឹងត្រូវ​ជួប​ជាមួយ​កីឡាករ​រុស្ស៊ី Daniil Medvedev​។ ​​អតីត​កីឡាករ​លំដាប់​លេខ ១ ពិភពលោក Daniil Medvedev បាន​យកឈ្នះ​កីឡាករ​អេ​ស្ប៉ា​ញ Alejandro Davidovich Fokina ដោយ​លទ្ធផល ២សិត​ផ្ទួនៗ​ផងដែរ ៦-៣ និង ៧-៥ ព្រឹក​មិញ​នេះ​។ ​​នេះ​ជា​ជ័យជំនះ ១៨ប្រកួត​ជាប់​គ្នា​ហើយ​សំរាប់ Daniil Medvedev បូករួម​ទាំង​ជើងឯក​ចំនួន ៣ ក្នុង​ឆ្នាំ២០២៣ នេះ​។

​​ងាក​មក​ការប្រកួត​ផ្នែក​នារី​វិញ អតីត​ជើងឯក Wimbledon, Emma Raducanu បាន​ធ្លាក់​ពី​ការប្រកួត​ត្រឹម​ជុំ​ទី៤ ក្រោម​ស្នាដៃ​កីឡាការិនី​លំដាប់​លេខ ១ ពិភពលោក Iga Swiatek​។ អ្នកការពារ​តំណែង​ជើងឯក​សញ្ជាតិ​ប៉ូឡូញ Swiatek បាន​យកឈ្នះ​ដោយ​លទ្ធផល ២សិត​ផ្ទួនៗ ៦-៣ និង ៦-១ ដើម្បី​បន្ត​ជួប​ជាមួយ​កីឡាការិនី​រ៉ូ​ម៉ា​នី Sorana Cirstea នៅ​វគ្គ ៨នាក់​ចុងក្រោយ​៕

​អត្ថបទ​៖​នាង សុភា​វុ​ធ