ភ្នំពេញ៖ នៅថ្ងៃទី១៦ ខែមីនានេះ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ និងអាស៊ានប៉ារ៉ាហ្គេម ឆ្នាំ២០២៣ CAMSOC បានបើកសន្និសិទស្តីពី ប្រព័ន្ធផ្សព្វផ្សាយកីឡាSEA GAMES និងASEAN PARA GAMES2023នៅកម្ពុជា ដែលមានអ្នកសារព័ត៌មានជាតិ អន្តរជាតិជាច្រើនបានចូលរួម។

នៅក្នុងសន្និសិទនេះ គឺមានបណ្តាញទូរទស្សន៍ក្នុងតំបន់អាស៊ានចំនួន ៧ក្រុមហ៊ុន បានទទួលសិទ្ធផ្សាយផ្តាច់មុខពី SEA GAMESនៅកម្ពុជា។

ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ និងអាស៊ានប៉ារ៉ាហ្គេម ឆ្នាំ២០២៣ CAMSOCថ្លែងថា ​មកដល់នេះ គណៈកម្មាធិការជាតិ CAMSOC បានផ្តល់សិទ្ធឲ្យបណ្តាញទូរទស្សន៍ចំនួន៧ ធ្វើការផ្សាយបន្តផ្ទាល់ពីព្រឹត្តិការណ៍ការប្រកួតកីឡា SEA GAMES និង PARA GAMES 2023 ពីកម្ពុជាក្នុងនោះ មានទូរទស្សន៍ក្រៅប្រទេសចំនួន៥ រួមមាន៖ ក្រុមបណ្តាញទូរទស្សន៍មកពីប្រទេសឥណ្ឌូនេស៊ី ថៃ វៀតណាម ម៉ាឡេស៊ី និងសឹង្ហបូរី ហើយនិងមានក្រុមហ៊ុនបណ្តាញទូរទស្សន៍មកពីប្រទេសជាសមាជិកផ្សេងៗទៀត បាន​នឹងកំពុងរៀបចំការ​ចរចា​ថ្លៃ ដើម្បីទទួលសិទ្ធការផ្សាយនៅប្រទេសគេ។

ឯកឧត្តម វ៉ាត់ ចំរើន បញ្ជាក់ថា សម្រាប់ការទិញសិទ្ធផ្សាយការប្រកួតកីឡា SEA GAMES និងASEAN PARA GAMESនេះ ​គឺបណ្តាញទូរទស្សន៍ក្នុងស្រុកផ្តល់ជូនដោយឥតគិតថ្លៃ។

បើតាមតំណាងក្រុមហ៊ុនទូរទស្សន៍ iMSPORT មកពីប្រទេសឥណ្ឌូនេស៊ី ថ្លែងថា នៅពេលនេះ​យើងបានទទួលសិទ្ធិការផ្សាយផ្ទាល់លើគ្រប់កីឡាទាំងអស់ពីប្រទេសកម្ពុជា​ទៅកាន់ប្រទេស​ឥណ្ឌូនេស៊ី ហើយការផ្សាយនោះ ​នឹងមានទូរទស្សន៍​ជាច្រើនប៉ុស្តិ៍ផ្សេងទៀត ដែលស្ថិត​ក្នុង​ចង្កោមការគ្រប់គ្រងរបស់ក្រុមហ៊ុននេះ ទទួលបានការផ្សាយបន្តផ្ទាល់ផងដែរ។

សូមបញ្ជាក់ថា នៅក្នុងព្រឹត្តិការណ៍កីឡាSEA GAMES និងPARA Games2023 កម្ពុជាបាន​រៀបចំប្រកួតចំនួន៣៦ប្រភេទកីឡា មានវិញ្ញាសាប្រកួត៥៨១វិញ្ញាសារ ក្នុងនោះ វិញ្ញាសាប្រកួតកីឡាបាល់ទាត់ ​នឹងចាប់ផ្តើមប្រកួតមុនគេ នៅថ្ងៃទី២៩ ខែមេសា ឆ្នាំ២០២៣៕អត្ថបទ ស៊ុម សុខជា