​ស្នូកឃ័រ៖ ​កីឡាករ​ស្នូកឃ័រ​លេខ ១ ពិភពលោក Judd Trump បាន​ធ្លាក់​ចេញពី​ការប្រកួត​ស្នូកឃ័រ​ជើងឯក​ពិភពលោក​ហើយ នៅ​វគ្គ​ពាក់កណ្តាល​ផ្តាច់ព្រ័ត្រ​ក្រោយ​បរាជ័យ​ក្រោម​ស្នាដៃ​កីឡាករ Shaun Murphy​។ ​បន្ទាប់ពី​ស្មើគ្នា ៤-៤ ហ្វ្រេ​ម Shaun Murphy ធ្វើ​បានល្អ​ណាស់​ដោយបាន​នាំមុខ ១០-៦ហ្វ្រេ​ម​។

មើល​ទៅ​ហាក់ដូច Murphy នឹង​យកឈ្នះ​ការប្រកួត​នេះ​បាន​លឿន តែ​ផ្ទុយទៅវិញ Judd Trump វាយ​បក​វិញ​រហូត​ស្មើគ្នា ១១-១១ហ្វ្រេ​មយ៉ាង​ស្វិតស្វាញ​។ ​យ៉ាងណាក្តី​ជើងឯក​ពិភព​លោក​ឆ្នាំ២០០៥ Shaun Murphy វាយ​មួយ​ឈើ​បាន ៧០ពិន្ទុ និង ៦២ពិន្ទុ យកឈ្នះ​ពីរ​ហ្វ្រេ​ម​ផ្ទួនៗ​យកឈ្នះ​ការប្រកួត​នេះ ១៣-១១ហ្វ្រេ​ម​។ ​ចំណែក​មួយ​ប្រកួត​ទៀត Anthony McGill ដែល​ទំលាក់ Ronnie O’Sullivan ឡើងមក​ដល់​វគ្គ​នេះនោះ​ បានបញ្ចប់​ដំណើរ​ស្វែងរក​ជើងឯក​ពិភពលោក​លើកដំបូងរ​បស់​ខ្លួន ​ត្រឹម​ថ្វីដៃ​ជើងឯក​ពិភពលោក​ឆ្នាំ២០១៥ Stuart Bingham​។

​​បន្ទាប់ពី​ដំណាក់កាល​ដំបូង McGill បាន​នាំមុខ​ការប្រកួត ១០-៧ហ្វ្រេ​ម មុនពេល Stuart Bingham វាយបករហូត​តាម​ស្មើ ១២-១២ហ្វ្រេ​ម ត្រូវ​ហ្វ្រេ​ម​កាត់សេចក្តី​ចុងក្រោយ​ហ្វ្រេ​ម​ទី ២៥​។ ​ការ​វាយ​មួយ​ឈើ​បាន ១២៥ពិន្ទុ​របស់ Stuart Bingham ធ្វើអោយ​កីឡាករ​វ័យ ៤៤ឆ្នាំ​អង់​គ្លេស​រូបនេះ​យក​ឈ្នះ Anthony McGill ក្នុង​លទ្ធផល ១៣-១២ហ្វ្រេ​ម​។ ​ដូច្នេះ​នៅ​វគ្គ​ពាក់កណ្តាល​ផ្តាច់ព្រ័ត្រ Stuart Bingham ត្រូវ​ជួប Mark Selby និង Kyren Wilson ជួប Shaun Murphy៕

​អត្ថបទ​៖​នាង សុភា​វុ​ធ