​បាល់ទាត់៖ ​ការប៉ះទង្គិច​គ្នា​ដោយ​ហិង្សា​បាន​ផ្ទុះឡើង​រវាង​នគរបាល​អ៊ីតាលី និង​អ្នកគាំទ្រ Eintracht Frankfurt បន្ទាប់​ពី​អាជ្ញាធរ​អ៊ីតាលី​បាន​ហាមឃាត់​អ្នកគាំទ្រ​អាល្លឺម៉ង់​ មិនឱ្យ​ទស្សនាការ​ប្រកួត​ផ្ទាល់​នៅ​កីឡដ្ឋាន​របស់ Napoli ដោយ​សារតែ​ការព្រួយបារម្ភ​អំពី​សុវត្ថិភាព​ បន្ទាប់ពី​មាន​អំពើហិង្សា​រវាង​អ្នកគាំទ្រ​ក្នុង​ជើង​ទីមួយ​។​

​អ្នកគាំទ្រ​បាល់ទាត់ Frankfurt បានធ្វើ​កុប្បកម្ម​គប់​វត្ថុ​រឹងទៅលើ​នគរបាល​មាន​សមត្ថកិច្ច​អ៊ីតាលី និង​ដុត​រថយន្ត​ប៉ូលិស​ផងដែរ​។​ អ្នកគាំទ្រ Eintracht Frankfurt ប្រហែល ៤០០នាក់​ដែល​មិនមាន​សំបុត្រ​បានមក​ដល់ទី​ក្រុង Naples កាលពី​ថ្ងៃ​អង្គារ​តាម​រថភ្លើង​ពី Salerno ហើយ​ត្រូវបាន​គេ​នាំទៅ​សណ្ឋាគារ​មួយ​ក្បែរ​សណ្ឋាគារ​ដែល​ក្រុម​របស់ Napoli ស្នាក់នៅ​។​ អ្នកគាំទ្រ​ក្រុម​ទាំង២ ​បាន​ប៉ះទង្គិច​គ្នា​មុន​ការប្រកួត​ជើង​ទី១ ​ក្នុង​ទីក្រុង Frankfurt ដោយ​ប៉ូលិស​បានចាត់ទុក​ការប្រកួត​នោះ​ថា​មាន​ហានិភ័យ​ខ្ពស់​។​

​​ក្រុម​ជើងឯក Europa League រដូវ​កាល​មុន Frankfurt កំពុង​រីករាយ​នឹង​ទំរង់​ល្អ​បំផុត​របស់ខ្លួន​ក្នុង​មួយ​ទស្សវត្សរ៍​ចុងក្រោយ​នេះ ស្រប​ពេលដែល Frankfurt តែងតែ​ឧបត្ថម្ភ​ការចំណាយ​សម្រាប់​អ្នកគាំទ្រ​ក្រៅ​ដី​មួយចំនួន រាល់​ការប្រកួត​នៅក្រៅ​ដី​ក្នុង​ក្របខណ្ឌ​អឺរ៉ុប​។​ ​Frankfurt បាន​រង​បរាជ័យ ៣-០ ទៀត​នៅ​ទឹកដី Napoli និង​សរុប​ទាំងពីរ​ជើង​ចាញ់ ៥-០ ធ្លាក់​ពី UCL ត្រឹម​វគ្គ ១៦ក្រុម​ចុងក្រោយ៕​

​អត្ថបទ​៖​នាង សុភា​វុ​ធ