ប៉ាគីស្ថាន៖ ក្រុមអ្នកគាំទ្រដែលខឹងសម្បាររបស់លោក Imran Khan បានប៉ះទង្គិចជាមួយនគរបាលបង្ក្រាបកុបកម្ម ដែលប៉ុនប៉ងចូលចាប់ខ្លួនអតីតនាយករដ្ឋមន្ត្រីប៉ាគីស្ថាន ប៉ុន្តែមេដឹកនាំប្រឆាំងវ័យ ៧០ឆ្នាំរូបនេះបានទទូចថា អ្វីទាំងអស់គឺស្ថិតលើច្បាប់ និងសណ្ដាប់ធ្នាប់។
លោកបាននិយាយទៅកាន់ប្រព័ន្ធផ្សព្វផ្សាយនៅទីក្រុង Lahore កាលពីថ្ងៃពុធថា លោកជឿជាក់លើនីតិរដ្ឋ ខណៈជាភាពស្មោះត្រង់របស់គណបក្សលោក។ នគរបាលមានបំណងចាប់ខ្លួនលោក Khan ពីបទមិនចូលតាមកាលបរិច្ឆេទរបស់តុលាការ ដើម្បីឆ្លើយតបទៅនឹងការចោទប្រកាន់ដែលលោកខកខាន មិនបានប្រកាសអំណោយដែលលោកបានទទួលក្នុងអំឡុងពេលចូលកាន់តំណែងរយៈពេល ៣ឆ្នាំកន្លះរបស់លោក ឬប្រាក់ចំណូលដែលបានមកពីការលក់អំណោយទាំងនោះ។ ប៉ុន្តែនគរបាលបានជួបប្រទះដោយក្រុមអ្នកគាំទ្រនិយមជ្រុលរាប់រយនាក់មានកាន់ដំបង និងគប់ដុំថ្ម លើកទង់ជាតិពណ៌បៃតង និងក្រហមចាស់របស់គណបក្ស PTI របស់លោក Khan នៅពេលក្រុមអ្នកតវ៉ាប៉ះទង្គិចជាមួយក្រុមមន្ត្រី។
លោក Khan ត្រូវបានបណ្តេញចេញពីតំណែង នៅក្នុងការបោះឆ្នោតដកសេចក្តីទុកចិត្តកាលពីខែមេសាឆ្នាំមុន ដែលបង្កឱ្យមានភាពចលាចលនយោបាយរយៈពេល ១ឆ្នាំនៅក្នុងប្រទេសប៉ាគីស្ថាន ទោះបីជាប្រទេសនេះត្រូវបានបំផ្លាញដោយទឹកជំនន់ ខ្យល់មូសុងដ៏មហន្តរាយ និងការធ្លាក់ចុះសេដ្ឋកិច្ចក៏ដោយ។ លោក Khan និយាយថា ចាប់តាំងពីពេលនោះមក លោកបានប្រឈមការចោទប្រកាន់មួយចំនួនតាមរយៈតុលាការ ដែលសុទ្ធតែមានបំណងរារាំងលោកមិនឲ្យចូលរួមប្រជែងក្នុងការបោះឆ្នោតបន្ទាប់៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
