ភ្នំពេញ៖ ក្នុងជំនួបស្វាគមន៍ និងពិភាក្សាការងារជាមួយ ឯកឧត្តម ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីក្រសួង​ការបរទេស និងសហប្រតិបត្តិការអន្តរជាតិ កាលពីថ្ងៃទី១៥ ខែមីនា ឆ្នាំ២០២៣ ម្សិលមិញនេះ ឯកអគ្គរដ្ឋទូត​អូស្រ្តាលីថ្មីប្រចាំកម្ពុជា ឯកឧត្តម ចាស្ទីន ខេវីន វ៉ាយអេត សន្យាបន្តកិច្ចសន្ទនាជាមួយកម្ពុជា ឈរលើ​មូលដ្ឋាន​ស្មើភាព និងអធិបតេយ្យភាព

នាឱកាសនោះ ឯកអគ្គរដ្ឋទូតអូស្រ្តាលី បានកោតសរសើរកម្ពុជា ដែលបានបំពេញតួនាទីជាប្រធានអាស៊ាន កាលពីឆ្នាំមុន បានយ៉ាងល្អប្រសើរ និងបានរំលឹកដោយសេចក្តីអំណរគុណ ចំពោះកិច្ចខិតខំប្រឹងប្រែងរបស់កម្ពុជា ដែលនាំឱ្យមានការដោះលែងសាស្ត្រាចារ្យអូស្ត្រាលី លោកSean Turnell ពីសំណាក់អាជ្ញាធរមីយ៉ាន់ម៉ា កាល​ពីឆ្នាំមុន។

ឯកឧត្តម ឯកអគ្គរដ្ឋទូតអូស្ត្រាលី បានបញ្ជាក់ថា អូស្រ្តាលី នឹងបន្តកិច្ចសន្ទនាដោយការគោរព ឈរលើមូលដ្ឋាន​ស្មើភាព និងអធិបតេយ្យភាពសម្រាប់ទំនាក់ទំនងប្រទេសទាំងពីរ។

ឯកឧត្តម ឯកអគ្គរដ្ឋទូត ក៏បានប្តេជ្ញាពង្រឹងទំនាក់ទំនងទ្វេ ភាគីជាមួយកម្ពុជា និងស្វែងរកកាលានុវត្តនានា ដើម្បី​ពង្រឹងភាពជាដៃគូក្នុងក្របខ័ណ្ឌអាស៊ាន- អូស្ត្រាលី។

ជាមួយគ្នា ឯកឧត្តម ប្រាក់ សុខុន បានរំលឹកដោយការថ្លែងអំណរគុណចំពោះជំនួយរបស់ប្រជាជន និងរដ្ឋាភិបាល​អូស្ត្រាលី ដែលបានផ្តល់ដល់កម្ពុជា គាំទ្រវិស័យនានា ដែលក្នុងនោះរួម មានវិស័យកសិកម្ម ហេដ្ឋារចនាសម្ព័ន្ធ ការអប់រំ ការដោះមីន ទំនាក់ទំនងរវាងប្រជាជននិងប្រជាជន និងសុខាភិបាល រួមទាំងវ៉ាក់សាំងកូវីដ-១៩ ផងដែរ។

ឯកឧត្តម ប្រាក់ សុខុន បានស្នើអូស្ត្រាលី បន្តជួយគាំទ្រការបោសសម្អាតគ្រាប់មីន ដើម្បីសម្រេចបាន​នូវគោលដៅ​កម្ពុជាគ្មានគ្រាប់មីនត្រឹមឆ្នាំ២០២៥។

លើសពីនេះ ឯកឧត្តម ប្រាក់ សុខុន និងឯកអគ្គរដ្ឋទូត បានពិភាក្សាអំពីអភិក្រមនានា​ក្នុងការពង្រីក​បន្ថែមទៀត​នូវកិច្ចសហប្រតិបត្តិការទ្វេភាគី ក្នុងវិស័យពាណិជ្ជកម្មនិងវិនិយោគ សុខាភិបាល កសិកម្ម សមភាពយេនឌ័រ ព្រមទាំងសន្តិសុខនិងការពារជាតិ ខណៈពេលដែលរដ្ឋាភិបាលអូស្ត្រាលីកំពុងរៀបចំ «យុទ្ធសាស្ត្រ​សេដ្ឋកិច្ច​អាស៊ីអាគ្នេយ៍​រហូត ដល់ឆ្នាំ ២០៤០» ឯកឧត្តមឯកអគ្គរដ្ឋទូតថ្មី មានបំណងលើកទឹក​ចិត្តឱ្យមានការ​វិនិយោគ​ប្រកបដោយគុណភាព មកកាន់កម្ពុជា។

បន្ថែមលើសពីនេះ ក្រសួងការបរទេសនៃប្រទេសទាំងពីរ ទន្ទឹងរង់ចាំ «កិច្ចពិគ្រោះយោបល់ថ្នាក់ឧត្តមមន្ត្រី» លើកទី ៤ ដែលនឹងប្រព្រឹត្តទៅនៅប្រទេសកម្ពុជា នៅឆ្នាំ២០២៣នេះ។ ក្នុងនោះ ភាគីទាំងពីរបានសម្តែងការពេញ​ចិត្តចំពោះការរីកចម្រើននៃទំនាក់ទំនងរវាងប្រទេសទាំងពីរលើគ្រប់វិស័យ។ ភាគីទាំងពីរក៏បាន​ផ្លាស់ប្តូរ​ទស្សនៈលើបញ្ហាតំបន់មួយចំនួនផងដែរ៕ ដោយ ៖ ឧត្ដម