ភ្នំពេញ ៖ ឯកឧត្តម ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយក​នៃមជ្ឈមណ្ឌល​សកម្មភាព​កំចាត់មីន​កម្ពុជា នៅ​ថ្ងៃ​ទី១៦ខែមីនានេះ ទទួលជួបពិភាក្សាការងារជាមួយ លោកជំទាវ Masuda JUKO អគ្គនាយក នៃ​អគ្គនាយកដ្ឋានកសាងសន្តិភាព និងអភិបាលកិច្ច នៃទីភ្នាក់ងារសហប្រតិបត្តិការអន្តរជាតិជប៉ុន JICA ត្យូក្យូ អមដំណើរដោយ​មន្រ្តីជាន់ខ្ពស់របស់JICAប្រចាំ​កម្ពុជាមួយចំនួនទៀត។

ក្រោយបញ្ចប់ការជួបពិភាក្សា ឯកឧត្តមហេង រតនា បានប្រសាសន៍ប្រាប់អ្នកសារព័ត៌មានថា នៅក្នុងជំនួបនោះ លោកជំទាវ Masuda JUKO បានសម្តែងនូវក្តីរីករាយ និងកោតសរសើរចំពោះការដឹកនាំរបស់សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានធ្វើ​ឱ្យ​ទំនាក់ទំនងប្រទេសទាំងពីរមានភាពល្អប្រសើរ។ហើយជំទាវ ក៏បាន​ថ្លែង​អំណរគុណ​ដល់អង្គភាពស៊ីម៉ាក់ ដែលបានផ្តល់ការហ្វឹកហ្វឺន​ជំនាញបច្ចេកវិទ្យាឧបករណ៍បោសសម្អាតមីន​ដល់អង្គភាព​ផ្តល់សេវា​កម្មរដ្ឋក្នុងគ្រាអាសន្ននៃប្រទេសអ៊ុយក្រែន (SESU) កាលពីខែមករា ឆ្នាំ២០២៣នេះផងដែរ។

លោកជំទាវក៏បានជម្រាបអំពីព័ត៌មាននៃជំនួបរបស់លោកជំទាវជាមួយអង្គភាពSESU របស់អ៊ុនក្រែន នៅប្រទេសជប៉ុន ដោយអង្គភាពSESUរបស់អ៊ុនក្រែនបានលើកឡើងអំពីសារៈសំខាន់ និងសារប្រយោជន៍នៃវគ្គហ្វឹកហ្វឺន ក្រោមការយក​ចិត្តទុកដាក់ខ្ពស់របស់អង្គភាពស៊ីម៉ាក់ ធ្វើអោយការហ្វឹកហ្វឺននេះទទួលបានជោគជ័យយ៉ាងធំធេង។លោកជំទាវបន្ថែមថា ក្រោមកិច្ចសហប្រតិបត្តិការត្បូង-ត្បូង អង្គភាពស៊ីម៉ាក់ បានចែករំលែកបទពិសោធន៍ ចំណេះដឹង បច្ចេកទេស និងជំនាញ លើវិស័យសកម្មភាពកំចាត់មីន មិនត្រឹមតែប្រទេសអ៊ុយក្រែនប៉ុណ្ណោះទេ ថែមទាំងប្រទេសមួយចំនួនដូចជា អង់ហ្គោឡា អ៊ីរ៉ាក់ ឡាវ និងកូឡុំប៊ី ផងដែរ។

ជាទីបញ្ចប់លោកជំទាវ Masuda JUKO មានសង្ឃឹមយ៉ាងមុតមាំថា ការកសាងសារមន្ទីរសន្តិភាព​នឹងដំណើរទៅ​ដោយរលូន ហើយនឹងត្រូវបញ្ចប់ការសាងសង់អាគារទាំងនេះតាមការគ្រោងទុកនៅឆ្នាំ២ ០ ២៥ ដើម្បីក្លាយ​ជាឃ្លាំង​ចំណេះដឹង ព័ត៌មាន និងដាក់បង្ហាញភស្តុតាង និងបកស្រាយរឿងរ៉ាវប្រវត្តិសាស្ត្រសង្គ្រាម និងប្រវត្តិជីវិតពិត​របស់​ប្រជាជាជន​កម្ពុជាដែលបានឆ្លងកាត់ក្នុងសង្គ្រាម និងក្រោយសង្គ្រាមដែលទិដ្ឋភាព​ទាំងនេះនឹង​ក្លាយជាមជ្ឈមណ្ឌល​ព័ត៌មានប្រវត្តិសាស្រ្តយ៉ាងសំខាន់ ទុកសម្រាប់អប់រំយុវជនកម្ពុជាជំនាន់ក្រោយៗទៀតស្វែងយល់ ៕ ដោយ ៖ សុភ័ណ្ឌ