​ស្វីស៖ ម្ចាស់​ភាគហ៊ុន​សហរដ្ឋ​អាមេរិក​នៃ​ក្រម​ហ៊ុន Credit Suisse Group AG (CSGN.S) បាន​ប្ដឹង​ធនាគារ​ស្វី​ស​កាល​ពី​ថ្ងៃ​ព្រហស្បតិ៍ ដោយ​អះអាង​ថា ធនាគារ​នេះ​បាន​បោកប្រាស់​ម្ចាស់​ភាគហ៊ុន​ទាំងនោះ ដោយ​ការ​លាក់បាំង​បញ្ហា​ទាក់ទង​នឹង​ហិរញ្ញវត្ថុ​របស់​ខ្លួន​។​

​ពាក្យបណ្ដឹង​តំណាង​ដែល​បាន​ស្នើ​ឡើង បាន​ចោទប្រកាន់​ធនាគារ​ Credit Suisse ពី​បទ​បោកប្រាស់​វិនិយោគិន​ដោយ​ការ​ខកខាន​ក្នុង​ការ​បង្ហាញ​ថា​ ខ្លួន​កំពុង​រងគ្រោះ​ពី​ការ​ដក​ប្រាក់​ដ៏​ច្រើន​របស់​អតិថិជន ហើយ​ថា​ ខ្លួន​មាន​ចំណុចខ្សោយ​ក្នុង​ការ​គ្រប់គ្រង​ផ្ទៃក្នុង​របស់​ខ្លួន ​លើ​របាយការណ៍​ហិរញ្ញវត្ថុ​។​ ក្រុម​ម្ចាស់​ភាគហ៊ុន​ដឹកនាំ​ដោយ​អគ្គនាយក​ក្រុមហ៊ុន យុទ្ធសាស្ត្រ​ផ្នែក​លក់ និង​ទីផ្សារ​អតិថិជន (Sales Strategy & Customer Marketing) លោក Braden Turner បាន​និយាយ​ថា ​ខណៈ​ការ​ពិត​ត្រូវ​បាន​លាតត្រដាង ហើយ​ម្ចាស់​ភាគហ៊ុន​ធំ​បំផុត​របស់​ធនាគារ Credit Suisse របស់​ប្រទេស​ស្វី​ស​និយាយ​ថា នឹង​មិន​បោះ​ទុន​ប្រាក់​បន្ថែម​ចូល​ក្នុង​ធនាគារ​នេះ​ទេ​នោះ ក្រុម​វិនិយោគិន​បាន​ដក​លុយ​ចេញ​ដែល​នាំ​ឲ្យ​ខាត​បង ស្រប​ពេល​តម្លៃ​ផ្សារភាគហ៊ុន​របស់​ធនាគារ Credit Suisse ដាំ​ក្បាល​ចុះ​ដល់​កម្រិត​ទាប​បំផុត​។

​ពាក្យបណ្ដឹង​នេះ​ទំនង​ក្លាយ​ជា​បណ្ដឹង​ដំបូង​បំផុត​ ធ្វើឡើង​ដោយ​ក្រុម​វិនិយោគិន​សហរដ្ឋអាមេរិក ជុំវិញ​បញ្ហា​ថ្មីៗ​នៅ​ធនាគារ​ស្វី​ស ដែល​បាន​ស្ដារ​ទំនុក​ចិត្ត​ទីផ្សារ​ឡើងវិញ​កាលពី​ថ្ងៃ​ព្រហស្បតិ៍ ក្រោយ​ទទួល​បាន​ការ​ជួយ​ជ្រោមជ្រែង​ផ្ដល់​កម្ចី​ប្រាក់​រហូតដល់ ​៤៥​ពាន់​លាន​ដុល្លារ​អាមេរិក​ពី​ធនាគារ​កណ្ដាល​របស់​ស្វី​ស​។ ​ធនាគារ Credit Suisse បាន​បដិសេធ​មិន​ធ្វើ​អត្ថាធិប្បាយ​លើ​បណ្ដឹង​នេះ ដែល​ត្រូវ​បាន​ដាក់​នៅ​តុលាការ​សហព័ន្ធ​នៅ​ក្នុង​ទីក្រុង Camden រដ្ឋ ​New Jersey សហរដ្ឋអាមេរិក ៕

អត្ថបទ៖ សុខមាន