ស៊ីហ្គេម៖ គណៈកម្មការសន្ដិសុខ និងសណ្ដាប់ធ្នាប់នៃគណៈកម្មាធិការជាតិរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេមឆ្នាំ២០២៣ (CAMSOC-CAMAPGOC) បានអះអាងពីការត្រៀមខ្លួនរួចរាល់ ដើម្បីធានាសន្ដិសុខ និងសុវត្ថិភាពជូនប្រតិភូ និងអត្តពលិកប្រមាណ ១ម៉ឺននាក់ដែលនឹងចូលរួមប្រកួតកីឡាស៊ីហ្គេមនៅកម្ពុជា។
នេះបើតាមការផ្ដល់នូវសក្ខីកម្មថ្មីពីឯកឧត្តមនាយឧត្តមសេនីយ៍ ហ៊ឹម យ៉ាន អនុប្រធានប្រចាំការនៃគណៈកម្មការសន្ដិសុខ និងសណ្ដាប់ធ្នាប់ ក្រោយបញ្ចប់កិច្ចប្រជុំពិភាក្សាការងារពាក់ព័ន្ធ ក្រោមការដឹកនាំរបស់ឯកឧត្តមបណ្ឌិត ថោង ខុន រដ្ឋមន្ដ្រីក្រសួងទេសចរណ៍ និងជាអនុប្រធានអចិន្ដ្រៃយ៍ CAMSOC កាលពីថ្ងៃទី១៦ ខែមីនា ឆ្នាំ២០២៣ នៅពហុកីឡដ្ឋានជាតិមរតកតេជោ។ ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC បានបញ្ជាក់ថា បន្ទាប់ពីស្ដាប់នូវរបាយការណ៍វឌ្ឍនភាពរបស់ថ្នាក់ដឹកនាំគណៈកម្មការសន្ដិសុខ និងសណ្ដាប់ធ្នាប់ ឯកឧត្តមរដ្ឋមន្ដ្រី ថោង ខុន បានវាយតម្លៃខ្ពស់ចំពោះការត្រៀមលក្ខណៈគ្រប់ជ្រុងជ្រោយ របស់គណៈកម្មការជំនាញមួយនេះដោយសង្ឃឹមយ៉ាងមុតមាំថា នឹងរួមចំណែកយ៉ាងសំខាន់ ដើម្បីការពារសន្ដិសុខ សណ្ដាប់ធ្នាប់ កំឡុងការប្រកួតស៊ីហ្គេម។
គួរបញ្ជាក់ថា គិតត្រឹមថ្ងៃទី១៧ ខែមីនានេះ កម្ពុជានៅសល់រយៈពេល ៤៩ថ្ងៃទៀតប៉ុណ្ណោះនឹងឈានដល់ការប្រកួតកីឡាស៊ីហ្គេមលើកទី៣២ ដែលនឹងប្រារព្ធពិធីបើកផ្លូវការនាថ្ងៃទី០៥ ខែឧសភារហូតដល់ថ្ងៃទី១៧ ខែឧសភា មុនបន្ដរៀបចំការប្រកួតកីឡាអាស៊ានប៉ារ៉ាហ្គេមលើកទី១២ ចាប់ពីថ្ងៃទី០៣ ដល់ថ្ងៃទី០៩ ខែមិថុនា ឆ្នាំ២០២៣ ខាងមុខ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
