​បាល់ទាត់៖ ​ខ្សែប្រយុទ្ធ​វ័យ​ចំណាស់ Zlatan Ibrahimovic ត្រូវបាន​កោះហៅ​ចូល​ក្រុម​ជម្រើសជាតិ​ស៊ុយអែត​ សម្រាប់​ការប្រកួត​មិត្តភាព​ក្នុង​ខែមីនា​នេះ បើទោះបី​ជាមាន​វ័យ​ដល់​ទៅ ៤១ឆ្នាំ​ក៏ដោយ​។ ​​ខ្សែប្រយុទ្ធ AC Milan រូបនេះ​បាន​សម្រាក​នៅក្រៅ​ទីលាន​ភាគច្រើន​ក្នុង​រដូវ​កាល​នេះ​ដោយសារ​របួស​ជង្គង់​។

​​តែ​ការកោះហៅ​លើក​នេះមានន័យថា ​អតីត​ខ្សែប្រយុទ្ធ​បិសាច​ក្រហម Manchester United រូបនេះ​នឹង​បង្ហាញខ្លួនឱ្យ​ក្រុម​ជម្រើសជាតិ​ស៊ុត​អែ​ត​សាជាថ្មី ​ក្រោយ​ខកខាន​ពេញ​មួយឆ្នាំ​។ ​​Zlatan Ibrahimovic បានសំរេច​ចិត្ត​ចូលនិវត្តន៍​ពី​ក្រុម​ជម្រើសជាតិ​ម្តង​រួចទៅហើយ​កាលពី​ឆ្នាំ២០១៦ ក្រោយ​ចប់ Euro 2016 តែ​ក៏បាន​សម្រេចចិត្ត​ត្រលប់​មកវិញ​កាលពី​ឆ្នាំ២០២១ ក្នុង​យុទ្ធនា​ការប្រកួត​ជម្រុះ World Cup 2022 តែ​មិន​ជោគជ័យ​។

​​Ibrahimovic ដែល​បង្ហាញខ្លួន​បាន​ត្រឹម ៣ប្រកួត​ប៉ុណ្ណោះ​ក្នុង​រដូវ​កាល​នេះ​ជាមួយ AC Milan នោះបាន​ចូល​លេង​ឱ្យ​ស៊ុយអែត​ចុងក្រោយ​បំផុត​ពេល​ចាញ់​ប៉ូឡូញ​នៅ​វគ្គ Play-Off ជម្រុះ World Cup 2022​។ ​​Zlatan Ibrahimovic គឺជា​កីឡាករ​ដែល​ស៊ុត​បញ្ចូល​ទី​ច្រើនជាងគេ​ឱ្យ​ក្រុម​ជម្រើសជាតិ​ស៊ុត​អែ​ត​សរុប ៦២គ្រាប់​ក្នុងការ​បង្ហាញខ្លួន ១២១ប្រកួត​៕

​អត្ថបទ​៖​នាង សុភា​វុ​ធ