ជប៉ុន៖ មេដឹកនាំជប៉ុន និងកូរ៉េខាងត្បូងបានជួបគ្នាកាលពីថ្ងៃព្រហស្បតិ៍ក្នុងឱកាសជាប្រវត្តិសាស្ត្រ ព្រោះនេះជាលើកដំបូងដែលប្រធានាធិបតីកូរ៉េខាងត្បូង បានទៅទស្សនកិច្ចប្រទេសជប៉ុនក្នុងរយៈពេល ១២ឆ្នាំមកនេះ។
ប្រទេសទាំង២ ដែលជាសម្ព័ន្ធមិត្តរបស់សហរដ្ឋអាមេរិក ប៉ុន្តែក៏ជាគូសត្រូវរវាងគ្នាដែរនោះកំពុងពន្លឿនសន្ទុះខិតទៅជិតគ្នាកាន់តែខ្លាំង ដោយសារការកើនឡើងវត្តមានរបស់ចិននៅក្នុងកិច្ចការពិភពលោក និងការគំរាមផ្នែកសន្តិសុខទៅវិញទៅមកដូចជាប្រទេសកូរ៉េខាងជើង។ កូរ៉េខាងជើងបានបាញ់មីស៊ីលបាលីស្ទីករយៈចម្ងាយឆ្ងាយ ១គ្រាប់ផ្សេងទៀតដែលបានធ្លាក់ក្នុងសមុទ្ររវាងប្រទេសទាំង៣ ប៉ុន្មានម៉ោងមុនលោកប្រធានាធិបតីកូរ៉េខាងត្បូង Yoon Suk Yeol បានទៅដល់ប្រទេសជប៉ុន។
លោក Yoon និងលោកនាយករដ្ឋមន្ត្រីជប៉ុន Fumio Kishida បានឈានដល់កិច្ចព្រមព្រៀងថ្មីៗមួយចំនួនក្នុងដំណើរទស្សនកិច្ចនេះ រួមទាំងការបង្កើនការចែករំលែកព័ត៌មានចារកម្ម និងបញ្ចប់ជម្លោះជិត ៤ឆ្នាំជុំវិញវត្ថុធាតុដើមដែលបានប្រើប្រាស់ក្នុងឧបករណ៍បច្ចេកវិទ្យាទំនើប។ ដំណើរទស្សនកិច្ចនេះក៏បានកើតឡើងផងដែរ អំឡុងសមយុទ្ធយោធារួមគ្នារវាងកងកម្លាំងកូរ៉េខាងត្បូង និងសហរដ្ឋអាមេរិក។ គេពុំបានដឹងច្បាស់ទេថា តើភាពកក់ក្ដៅរវាងរដ្ឋាភិបាលជប៉ុន និងកូរ៉េខាងត្បូងនឹងផ្លាស់ប្ដូរផ្នត់គំនិតនៅក្នុងប្រទេសរបស់ខ្លួន ឬអត់ទេ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
