UN៖ អង្គការសហប្រជាជាតិបានគាំទ្រប្រទេសទួរគី និងអ៊ុយក្រែនកាលពីថ្ងៃព្រហស្បតិ៍ ក្នុងការអំពាវនាវឱ្យមានកិច្ចព្រមព្រៀងរយៈពេល ១២០ថ្ងៃ ដែលអនុញ្ញាតឱ្យមានការនាំចេញគ្រាប់ធញ្ញជាតិប្រកបដោយសុវត្ថិភាព ពីកំពង់ផែសមុទ្រខ្មៅជាច្រើនរបស់អ៊ុយក្រែន បន្ទាប់ពីរុស្ស៊ីបាននិយាយថា ខ្លួននឹងបន្តកិច្ចព្រមព្រៀងនេះត្រឹមតែ ៦០ថ្ងៃប៉ុណ្ណោះ។
កិច្ចព្រមព្រៀងចុងក្រោយ នឹងត្រូវផុតកំណត់នៅថ្ងៃសៅរ៍ ទី១៨ ខែមីនានេះ។ កិច្ចព្រមព្រៀងរវាងរុស្ស៊ី និងអ៊ុយក្រែនត្រូវបានសម្របសម្រួលដោយអង្គការសហប្រជាជាតិ និងប្រទេសទួរគីក្នុងខែកក្កដា ហើយបានបន្តថ្មីក្នុងខែវិច្ឆិកាដើម្បីប្រយុទ្ធប្រឆាំងវិបត្តិស្បៀងអាហារពិភពលោក។ អ្នកនាំពាក្យរបស់អង្គការសហប្រជាជាតិលោក Stephane Dujarric បានថ្លែងនៅក្នុងសន្និសីទសារព័ត៌មានកាលពីថ្ងៃព្រហស្បតិ៍ថា កិច្ចព្រមព្រៀងនេះគឺធ្វើឡើងជាសាធារណៈ វាជាឯកសារបើកចំហ ហើយវារំពឹងថានឹងមានការផ្លាស់ប្តូរឈានទៅរកកិច្ចព្រមព្រៀងរយៈពេល ១២០ថ្ងៃ។ អ្នកនាំពាក្យក្រសួងការបរទេសរុស្ស៊ីលោកស្រី Maria Zakharova បាននិយាយកាលពីថ្ងៃព្រហស្បតិ៍ថា កិច្ចព្រមព្រៀងកំពុងត្រូវបានបន្តសម្រាប់រយៈពេលតែ ៦០ថ្ងៃ នៅពេលលោកស្រីត្រូវបានសួរឱ្យធ្វើអត្ថាធិប្បាយចំពោះការលើកឡើងរបស់លោក Dujarric ។
ខណៈរុស្ស៊ីពុំបាននិយាយជាក់លាក់ពីមូលហេតុ ដែលខ្លួនចង់បានការបន្ថែមពេលត្រឹមតែរយៈពេល ៦០ថ្ងៃ រុស្ស៊ីបានត្អូញត្អែរថា ការនាំចេញស្បៀងអាហារ និងជីរបស់ខ្លួនកំពុងត្រូវបានរារាំងដោយទណ្ឌកម្មរបស់ប្រទេសលោកខាងលិច។ ប្រទេសមហាអំណាចលោកខាងលិចបានដាក់គំនាបរុស្ស៊ីដោយការដាក់ទណ្ឌកម្មយ៉ាងតឹងរ៉ឹង ជុំវិញការវាយលុកលើអ៊ុយក្រែន។ ខណៈការនាំចេញស្បៀងអាហារ និងជីរបស់ខ្លួនមិនស្ថិតនៅក្រោមការដាក់ទណ្ឌកម្ម ទីក្រុងមូស្គូនិយាយថា ការរឹតបន្តឹងលើការទូទាត់ ការដឹកជញ្ជូន និងឧស្សាហកម្មធានារ៉ាប់រងគឺជាឧបសគ្គចំពោះការដឹកជញ្ជូន។ យោងតាមអង្គការសហប្រជាជាតិបានឱ្យដឹងថា រហូតមកដល់ពេលនេះអ៊ុយក្រែនបាននាំចេញពោត និងស្រូវសាលីជាចម្បងជិត ២៥លានតោនក្រោមកិច្ចព្រមព្រៀង ហើយគោលដៅចម្បងសម្រាប់ការនាំចេញគឺទៅកាន់ប្រទេសចិន អ៊ីតាលី អេស្ប៉ាញ ទួរគី និងហូឡង់៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
