ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ នឹងបញ្ជូននិស្សិតជំនាញកសិកម្ម ប្រមាណជាង ២០០នាក់ ទៅតាមសហគមន៍ ដើម្បីជួយផ្សព្វផ្សាយ រួមទាំងចែករំលែកចំណេះដឹង ទៅ​ដល់កសិករក្នុងការផលិតស្រូវ ​ឲ្យស្របតាមស្ដង់ដារ ​និងមានតម្លៃខ្ពស់ និងការទុកដាក់ពូជ​ស្រូវឲ្យបានល្អ ។

ក្នុងពេលសំណេះសំណាល ឬណែនាំបន្ថែមដល់និស្សិតស្ម័គ្រចិត្ត ត្រូវចុះទៅតាមមូលដ្ឋាន នៅ​ថ្ងៃទី១៧ ខែមីនា ឆ្នាំ២០២៣ នាសាលាភូមិន្ទកសិកម្មចម្ការដូង ឯកឧត្តមបណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា ការងារសំខាន់ ដែល​ក្រុមនិស្សិតចុះទៅនេះ​ គឺគាំទ្រដល់កសិករផលិតពូជស្រូវ ឲ្យស្របទៅនឹងតម្រូវការទីផ្សារ និង​កសិករផលិតពូជ​ស្រូវផ្សារភ្ជាប់នឹងទីផ្សារ ឬរោងម៉ាស៊ី ​ក៏ដូចជាផ្ដល់ឱកាសដល់ពួកគេបាន​ហាត់ការងារ​ ដើម្បីទទួល​បាន​បទ​ពិសោធន៍​ពាក់ព័ន្ធនឹងពូជ ​និង​សង្វាក់ផលិតកម្មស្រូវអង្ករនេះ ។

ឯកឧត្តម បានបន្តថា សម្រាប់និស្សិតទាំងអស់នេះ ​មុននឹងចុះទៅតាមមូលដ្ឋាន ពួកគេ ត្រូវបាន​ណែនាំ​បន្ថែមពីមន្ត្រីជំនាញ ​នៃក្រសួងកសិកម្ម ​ឲ្យស្គាល់ពីពូជស្រូវ ហើយសម្រាប់អ្នកដែល​ត្រូវ​ជ្រើសរើស សុទ្ធតែមានសមត្ថភាពគ្រប់គ្រាន់ ​ហើយក្រសួងក៏បានត្រៀមរួចរាល់ នូវសហគមន៍​ដែល​ពួកគេត្រូវចុះទៅ ដោយការងារនេះ នឹងត្រូវអនុវត្តនៅចុងខែមីនានេះ ។

សម្រាប់និស្សិតស្ម័គ្រចិត្ត លើកឡើងថា ​ពួកគេបានត្រៀមលក្ខណៈរួចរាល់ហើយ ក្នុងការចុះទៅ​ជួយ​កសិករ ក្នុងនោះមានចំណេះដឹង ​កម្លាំងកាយចិត្ត ការទំនាក់ទំនងជាមួយកសិករ ដើម្បីធ្វើយ៉ាងណា ឲ្យពួកគាត់បានទទួលចំណេះដឹងបន្ថែម ​ពាក់ព័ន្ធនឹងការផលិតស្រូវ ​មានទាំងការប្រើប្រាស់ពូជ និង​ការប្រើប្រាស់ជីជាដើម​ ធ្វើយ៉ាងណាឲ្យស្របតាមស្ដង់ដារ និងទទួលបានទិន្នផលខ្ពស់ ។

គួរបញ្ជាក់ថា ដើម្បីគាំទ្រដល់ការផលិតស្រូវ និងដំណាំកសិកម្មផ្សេងៗ​ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ​ក៏បានណែនាំដល់ក្រសួងកសិកម្ម ​ត្រូវរៀបចំឲ្យមានមន្ត្រីកសិកម្ម ប្រចាំ​នៅតាមឃុំសង្កាត់ ​ដើម្បីជួយដោះស្រាយ និងណែនាំបន្ថែមដល់កសិករ លើការធ្វើកសិករ ៕

អត្ថបទ បាន សុខរិទ្ធិ