ភ្នំពេញ៖ អតីតប្រធានអាជ្ញាធរអន្តរកាលរបស់អង្គការសហប្រជាជាតិ ដែលហៅកាត់ថា UNTAC លោក យ៉ា ស៊ុ ស៊ី អាកាស៊ី បានថ្លែងថា ឧត្តមសេនីយ៍ឯក ហ៊ុន ម៉ាណែត ដែលជាបេក្ខភាពនាយករដ្ឋមន្រ្តី នៃព្រះរាជាណាចក្រ​កម្ពុជា​នាពេលអនាគត គឺជាយុវជនដែលមានចំណេះដឹងខ្ពស់ និងភាពខ្លាំងដូចជាឪពុក គឺសម្តេចតេជោ ហ៊ុន សែន នាយករដ្ឋមន្រ្តី នៃកម្ពុជានាពេលបច្ចុប្បន្ននេះ ដែលការដឹកនាំរបស់សម្តេចតេជោ បានធ្វើឲ្យប្រទេសកម្ពុជាមានសុខសន្ដិភាព និងការរីកចំរើនលើគ្រប់វិស័យ។

តាមរយៈកិច្ចសម្ភាសន៍ពិសេសជាមួយទូរទស្សន៍ BTV ពេលទស្សនៈកិច្ចនៅប្រទេសជប៉ុន លោកយ៉ា ស៊ុ ស៊ី អាកាស៊ី បានលើកឡើងថា កាលពីកន្លងទៅលោកបានជួបពិភាក្សាការងារមួយចំនួនជាមួយឧត្តមសេនីយ៍ឯក ហ៊ុន ម៉ាណែត ហើយពេលនោះ លោកបានមើលឃើញអំពីសក្តានុពលរបស់លោក ហ៊ុន ម៉ាណែត ថា យុវជនពិតជាខ្លាំង​ដូចជា​ឪពុក​របស់លោកមែន ហើយអតីតប្រមុខ UNTACរូបនេះ ក៏បានបួងសួងឲ្យការដឹកនាំរបស់លោក ហ៊ុន ម៉ាណែត នាពេល​អនាគតរបស់កម្ពុជានោះ ប្រកបដោយភាពរីកចំរើន និងស្របទៅតាមលទ្ធិប្រជាធិបតេយ្យយូរអង្វែងផងដែរ។

លោក យ៉ា ស៊ុ ស៊ី អាកាស៊ី ក៏បានសម្តែងនូវ មោទនភាពយ៉ាងខ្លាំងផងដែរ បន្ទាប់ពីលោកបាន​ឃើញប្រទេស​កម្ពុជា​ធ្លាប់​តែជាប្រទេសមានសង្រ្គាមរាំរ៉ៃកាប់សម្លាប់គ្នាឯង ហើយត្រូវបានកងកម្លាំងអង្គការសហប្រជាជាតិជួយអន្តរាគមន៍ ប៉ុន្តែ បច្ចុប្បន្នកម្ពុជាបានក្លាយទៅជា ប្រទេស​មួយ​ដែលមានសមត្ថភាព និងក្លាហានបានបញ្ជូនកងកម្លាំងមួកខៀវ របស់​ខ្លួនទៅកាន់​ប្រទេសនានានៅលើពិភពលោក ដែលកំពុងមានសង្រ្គាម ក្រោយមានការ​ស្នើសុំរបស់អង្គការ​សហប្រជាជាតិ​នោះ។

ដោយឡែកសម្រាប់ទំនាក់ទំនងទ្វេភាគីរវាងកម្ពុជា និងជប៉ុនវិញ លោក យ៉ា ស៊ុ ស៊ី អាកាស៊ី ក៏បាន បាន​បញ្ចេញ​ទស្សន​ផងដែរថា ប្រទេសទាំងពីរកំពុងមានកិច្ចសហប្រតិបត្តិការយ៉ាងល្អប្រសើ និងគ្រប់ជ្រុង ជ្រោយទាំងទ្វេភាគី និង​ពហុភាគី ខណៈការអះអាងរបស់លោកយ៉ាងដូច្នេះ គឺដោយសារលោកមើលឃើញ ថាកម្ពុជា និងជប៉ុនជា​អ្នកកាន់​សាសនា​ព្រះពុទ្ធដូចគ្នា ហើយប្រជាជន និងប្រជាជនឲ្យតម្លៃ និងគោរពគ្នាទៅវិញទៅមកផងដែរ៕ អត្ថបទ៖ បាន ចក់