ភ្នំពេញ៖ នៅថ្ងៃទី១៨ ខែមីនា ធនាគារកាណាឌីយ៉ា បានបន្តបើកសម្ពោធប្រើប្រាស់ផ្លូវការធនាគារកាណាឌីយ៉ាឆ្លាតវៃ SMART Branch ទីពីរសាខា IFL ទល់មុខសកលវិទ្យាល័យភូមិន្ទភ្នំពេញ ដើម្បីផ្តល់ឱកាសឲ្យបណ្តាសិស្សនិស្សិត និងអតិថិជនទូទៅ ប្រើប្រាស់សេវាធនាគារបំពាក់ម៉ាស៊ីនឌីជីថលទំនើបៗ បង្កើនភាពងាយស្រួលកាន់តែប្រសើរឡើងក្នុងការប្រើប្រាស់ផលិតផល និងសេវាកម្មធនាគារ។
លោកស្រី សុង ខេងឡាយ អគ្គនាយិការង និងនាយិកាប្រតិបត្តិការ ប្រតិបត្តិការ នៃធនាគារកាណាឌីយ៉ាថ្លែងថា ជាមួយនឹងការមានបទពិសោធន៍ជាង៣២ឆ្នាំមកនេះ ធនាគារកាណាឌីយ៉ាបានបើកសាខាបានចំនួនទី៦៧ ក្នុងនោះសាខា SMART BRANCHចំនួន២ រួមមានៈ សាខាធនាគារឆ្លាតវៃទីមួយសែនសុខ និងសាខាធនាគារឆ្លាតវៃទីពីរ IFLនេះ ដោយមានបំពាក់ម៉ាស៊ីនស្វ័យសេវាធនាគា ដូចជា ម៉ាស៊ីនឌីជីថល VTM ដែលអាចបង្កើតគណនីដោយខ្លួនឯង ហើយអាចដាក់/ដកប្រាក់ ក៏ដូចជាម៉ាស៊ីនបោះពុម្ភកាតធនាគារ ហើយអតិថិជនក៏អាចបង្កើតកាតឥណពន្ធឬឥណទានពីធនាគារកាណាឌីយ៉ា ក្នុងរយៈពេលខ្លី និងមានបំពាក់ម៉ាស៊ីនទូរ ATMដែលអតិថិជនអាចចូលប្រើប្រាស់ ២៤ម៉ោងក្នុងមួយសប្តាហ៍ផងដែរ។
លោកស្រី សុង ខេងឡាយ ថ្លែងថា បន្ថែមពីលើនេះ អតិថិជនក៏អាចប្រើប្រាស់សេវាកម្មធនាគារកាណាឌីយ៉ា សាខាIFLផងដែរ ដែលមានបុគ្គលិករង់ចាំជួយលោកអ្នកស្វែងរកការប្រើប្រាស់សេវាកម្មនានាទៀតមាន ការបង្កើតគណនីសន្សំ ស្នើសុំកម្ចីផ្ទាល់ខ្លួន ឥណទានអាជីវកម្ម ស្នើសុំកាតឥណទាន ចុះឈ្មោះសម្រាប់ប្រើប្រាស់សេវាកម្មទូទាត់ឌីជីថល ដូចជាម៉ាស៊ីន POS ឬKHQR និងសេវាកម្មផ្សេងៗជាច្រើនទៀត។
បើតាមអតិថិជន ដែលស្នើសុំបង្កើតកាត ATM បានថ្លែងថា យើងពិតជាចង់ឲ្យធនាគារកាណាឌីយ៉ាបង្កើតសាខាធនាគារSMART Branchនេះឲ្យបានច្រើន ដើម្បីបង្កើនភាពងាយស្រួលក្នុងការគ្រប់គ្រងសាច់ប្រាក់ និងមានសុវត្ថិភាព។
តាមរយៈការបើកសាខាធនាគារឆ្លាតវៃសាខា IFL នេះដែរ ធនាការកាណាឌីយ៉ា ក៏សូមលើកទឹកចិត្តដល់សិស្សនិស្សិត បុគ្គលិកសកលវិទ្យាល័យ និងអតិថិជនទាំងអស់ អញ្ជើញទទួលបទពិសោធន៍ថ្មីជាមួយនឹងសេវាធនាគាឌីជីថលដែលមានបំពាក់សំភារៈម៉ាស៊ីនឌីជីថលទំនើបៗ នៅក្នុង សាខា អាយអេហ្វអិល៕ អត្ថបទ៖ ស៊ុមសុខជា