រតនគិរី៖ នៅថ្ងៃទី២០ ខែមីនា ឆ្នាំ២០២៣ស្អែកនេះ តាមបណ្តាគណៈកម្មការរៀបចំការបោះឆ្នោតទាំង ២៥ រាជធានី-ខេត្ត នឹងចាប់ផ្តើមដំណើរការប្រឡងជ្រើសរើសមន្រ្តីលេខាធិការដ្ឋាននៃគណៈកម្មការរៀបចំការបោះឆ្នោតខេត្តរបស់ខ្លួន ដើម្បីបម្រើដល់ការបោះឆ្នោតជ្រើសរើសតំណាងរាស្រ្ត នីតិកាលទី៧។ 

ជារៀងរាល់ដំណើរការបោះឆ្នោត គណៈកម្មាធិការជាតិរៀបចំការបោះឆ្នោត (គ.ជ.ប) ដែលជាស្ថាប័នទទួលខុសត្រូវក្នុងការចាត់ចែងស្របតាមច្បាប់ គ.ជ.ប បានជ្រើសរើសគណៈកម្មការខេត្តរៀបចំការបោះឆ្នោត ហើយជាក់ស្ដែងនៅថ្ងៃទី១៩ ខែមីនានេះ គណៈកម្មការរៀបចំការបោះឆ្នោតខេត្តរតនគិរី បានរៀបចំមណ្ឌលប្រលងនៅសាលាបឋមសិក្សា ប៊ូ ថង ទេសអន្លង់ ក្នុងក្រុងបានលុង ដើម្បីជ្រើសរើសមន្ត្រីលេខាធិការដ្ឋានរៀបចំការបោះឆ្នោតសម្រាប់បម្រើដល់ការបោះឆ្នោតជ្រើសតាំងតំណាងរាស្រ្ត នីតិកាលទី៧ ឆ្នាំ២០២៣។ 

លោក ប៉ែន ឈុនឌី ប្រធានគណៈកម្មការរៀបចំការបោះឆ្នោតខេត្តរតនគិរី បានឲ្យដឹងថា ដើម្បីអនុវត្តតាមប្រតិទិន និងការរៀបចំនៃដំណើរការឆ្ពោះទៅរកការបោះឆ្នោតជ្រើសរើសតំណាងរាស្រ្ត គណៈកម្មការរៀបចំការបោះឆ្នោតខេត្ត នឹងធ្វើការប្រឡងជ្រើសរើសមន្រ្តីលេខាធិការដ្ឋាន ដូចជា មន្រ្តីបច្ចេកទេស និងមន្រ្តីគណនេយ្យករជាដើម។ 

លោក ប៉ែន ឈុនឌី បញ្ជាក់ថា ក្នុងដំណាក់កាលប្រឡងជ្រើសរើសមន្រ្តីលេខាធិការដ្ឋាននៃគណៈកម្មការរៀបចំការបោះឆ្នោត មិនត្រឹមមានតែការប្រលងដោយវិញ្ញាសារប៉ុណ្ណោះទេ ប៉ុន្តែត្រូវឆ្លងកាត់ការសម្ភាសន៍ដោយផ្ទាល់ជាមួយគណៈកម្មការប្រឡង ដើម្បីធានាអំពីសមត្ថភាពរបស់មន្រ្តីគ្រប់រូប។ 

លោក ប៉ែន ឈុនឌី បញ្ជាក់ទៀតថា ការជ្រើសរើសមន្រ្តីលេខាធិការដ្ឋាននៃគណៈកម្មការរៀបចំការបោះឆ្នោតខេត្ត នឹងរៀបចំប្រកបទៅដោយភាពត្រឹមត្រូវ និងតម្លាភាព។ 

គួរបញ្ជាក់ថា ការបោះឆ្នោតជ្រើសរើសតំណាងរាស្រ្ត នីតិកាលទី៧ គ.ជ.ប រៀបចំការជ្រើសរើសមន្រ្តីជិត ១៥ម៉ឺននាក់ ដែលជាតម្រូវការចំពោះមុខ ដើម្បីធានាដល់ដំណើរទាំងមូលនៃការបោះឆ្នោតជ្រើសរើសតាំងតំណាងរាស្រ្ត ក៏ដូចជាការិយាល័យបោះឆ្នោតនៅទូទាំងប្រទេសជាង ២ម៉ឺនការិយាល័យផងដែរ។ 

ការបោះឆ្នោតជ្រើសរើសតំណាងរាស្រ្ត នីតិកាលទី៧ នឹងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣ ខណៈប្រជាពលរដ្ឋមានឈ្មោះក្នុងបញ្ជីចំនួនជាង៩លាន៧សែននាក់៕