ភ្នំពេញ៖ ក្រសួងសុខាភិបាល បានប្រកាសនៅថ្ងៃនេះថា ពលរដ្ឋខ្មែរ ០៣នាក់បន្ថែមទៀត បានស្លាប់ដោយសារជំងឺកូវីដ-១៩ ដែលនាំឱ្យតួលេខអ្នកស្លាប់សរុបឡើងដល់ ៩១នាក់ហើយគិតត្រឹមថ្ងៃនេះ។
ក្នុងសេចក្ដីប្រកាសព័ត៌មាននៅថ្ងៃនេះ ក្រសួងសុខាភិបាលបបញ្ជាក់ថា ពលរដ្ឋខ្មែរទាំង ០៣នាក់នោះ មានស្ត្រី ២នាក់ និងបុរសម្នាក់។
ក្រសួងសុខាភិបាលបញ្ជាក់បន្ថែមថា ស្ត្រីម្នាក់អាយុ ២៣ឆ្នាំ ដែលរស់នៅសង្កាត់កាកាប ក្នុងខណ្ឌពោធិ៍សែនជ័យ បានស្លាប់កាលពីថ្ងៃចន្ទកន្លងមកនេះ នៅមុនពេលបញ្ជូនទៅដល់មន្ទីរពេទ្យមិត្តភាពកម្ពុជា-ចិនព្រះកុសមៈ។
ចំណែកឯស្ត្រីម្នាក់ទៀតអាយុ ៤៦ឆ្នាំរស់នៅក្នុងស្រុកត្បូងឃ្មុំ ខេត្តត្បូងឃ្មុំ ក្រសួងសុខាភិបាលបានបញ្ជាក់ថា បានស្លាប់កាលពីថ្ងៃអង្គារកន្លងមកនេះ នៅឯមន្ទីរពេទ្យបង្អែកព្រះបាទនរោត្ដម សីហនុ ត្បូងឃ្មុំ ហើយលទ្ធផលពិនិត្យសំណាករបស់ស្ត្រីរូបនេះ បង្ហាញថា គាត់បានឆ្លងមេរោគកូវីដ-១៩។
មរណភាព និងមូលហេតុនៃមរណភាពរបស់ស្ត្រីរូបនេះ ត្រូវបានរដ្ឋបាលខេត្តត្បូងឃ្មុំ បញ្ជាក់នៅក្នុងសេចក្ដីប្រកាសព័ត៌មានកាលពីថ្ងៃម្សិលមិញផងដែរ។
ក្រសួងសុខាភិបាលបានឱ្យដឹងទៀតថា បុរសម្នាក់ទៀតអាយុ ៦៤ឆ្នាំ ដែលរស់នៅក្នុងសង្កាត់ផ្សារថ្មី៣ ខណ្ឌដូនពេញ បានស្លាប់នៅឯមន្ទីរពេទ្យមិត្តភាពខ្មែរ-សូវៀតនៅទាបភ្លឺថ្ងៃនេះ។
គិតត្រឹមថ្ងៃនេះ តួលេខអ្នកស្លាប់ដែលក្រសួងសុខាភិបាលប្រកាសជាផ្លូវការ បានកើនឡើងដល់ ៩១នាក់ហើយនៅក្នុងរយៈពេល ៤៨ថ្ងៃចុងក្រោយនេះ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
