បាត់ដំបង៖ ទីលានទុកដាក់សំរាមដ៏ទំនើប ​និងមានលទ្ធភាពផ្ទុកសំរាមបានច្រើន ដែលជាគម្រោង​កែលម្អគ្រប់គ្រងបរិស្ថានក្រុងជុំវិញបឹងទន្លេសាបជំហាន២ ត្រូវបានសម្ពោធដាក់ឱ្យប្រើប្រាស់​សម្រាប់​ក្រុងបាត់ដំបង និងស្រុកក្បែរៗតំបន់ទីលាន។

ទីលានទុកដាក់សំរាមក្រុងបាត់ដំបង ដែលជាគម្រោងកែលម្អគ្រប់គ្រងបរិស្ថានក្រុងជុំវិញបឹង​ទន្លេសាប​ជំហាន២ ក្រោមកម្ចីឥណទានសម្បទានរបស់ធនាគារអភិវឌ្ឍន៍អាស៊ី ត្រូវបាន​ធ្វើពិធីប្រគល់-ទទួល​ និងសម្ពោធដាក់ឱ្យប្រើប្រាស់ នាថ្ងៃទី២០​ ខែមីនា ឆ្នាំ២០២៣ ក្រោម​អធិបតីភាពឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន។

ឯកឧត្តមទេសរដ្ឋមន្ត្រី ស៊ុន ចាន់ថុល បានថ្លែងនូវការកោតសរសើរ និងថ្លែងអំណរគុណ​យ៉ាង​ជ្រាលជ្រៅ​ចំពោះធនាគារអភិវឌ្ឍន៍អាស៊ី ​ដែលជាដៃគូរសហការយូរអង្វែងសំខាន់មួយរបស់​រាជរដ្ឋាភិបាលកម្ពុជា ដោយបានចូលរួមយ៉ាងសកម្មក្នុងការគាំទ្រក្នុងការផ្តល់​ហិរញ្ញប្បទាន​សម្រាប់ការអភិវឌ្ឍ​លើវិស័យអនាម័យក្នុងខេត្តបាត់ដំបង និងបណ្តាខេត្តអាទិភាព​ស្ទើរទូទាំង​ប្រទេស។

ឯកឧត្តម ស៊ុន ចាន់ថុល បន្ថែមថា ក្រោមការដឹកនាំ​ប្រកបដោយភាពវៃឆ្លាត និងទស្សន:វិស័យ​វែងឆ្ងាយ ​នៃរាជរដ្ឋាភិបាល ​ដែលមានសម្តេចតេជោ ហ៊ុន សែន ​ជាប្រមុខដឹកនាំ ក្នុងការលើកកម្ពស់​វិស័យអនាម័យ ដើម្បីធានាប្រយោជន៍សុខភាពសាធារណៈជាអតិបរមាពីការវិនិយោគ​អនាម័យ​នៅក្នុងទីក្រុង គោលនយោបាយ ​និងយុទ្ធសាស្ត្រសំខាន់ៗជាច្រើនត្រូវបានដាក់ចេញ ដើម្បី​ពន្លឿនការអភិវឌ្ឍប្រកបដោយចីរភាព​ វិស័យទឹកកខ្វក់ត្រូវបានរាជរដ្ឋាភិបាល ចាត់ទុកជាអាទិភាពខ្ពស់។

សូមជម្រាបថា ទីលានទុកដាក់សំរាមក្រុងបាត់ដំបងចំណាយថវិកាសាងសង់ប្រមាណជាង ៦លាន ២៨ម៉ឺនដុល្លារអាមេរិក ​មានទីតាំងស្ថិតនៅក្នុងភូមិប៉ោយស្វាយ ​ឃុំតាគ្រាម​ ស្រុកបាណន់ ខេត្តបាត់ដំបង។ ​រណ្ដៅដែលបានសាងសង់មានមួយរណ្ដៅក្នុងចំណោមរណ្ដៅទាំងបួន ដែល​មានលទ្ធភាពអាចផ្ទុកសំរាមបានជាង​ ៣១ម៉ឺនម៉ែត្រគូប។

គម្រោងទាំងមូលត្រូវបានសាងសង់ឡើងនៅលើផ្ទៃដីសរុបទំហំជាង​ ២០ហិកតា ដែលនិង​គ្រោង​ឱ្យប្រើប្រាស់ដំណាក់កាលដំបូង​ សម្រាប់រណ្ដៅទី១ ក្នុងរយៈពេល ១០ ឆ្នាំ៕អត្ថបទ ៖ ប្រាក់ វ៉ាន់ដា