ភ្នំពេញ៖ កញ្ញាបណ្ឌិត ស៊ូវណ្ណា ហ្គោនឡែត នាយិកាប្រតិបត្តិអង្គការសម្ព័ន្ធមិត្តសត្វព្រៃ (WA) បានឲ្យដឹងថា ព្រៃឈើនៅតំបន់ជួរភ្នំក្រវាញ ដែលគ្របទៅដោយព្រៃស្រោងក្រាស់ មានពណ៌ បៃតងគ្រប់រដូវកាល ជាជួរព្រៃឈើធំជាងគេនៅតំបន់អាស៊ីអាគ្នេយ៍ ដែលបានផ្តល់សារសំខាន់ ចំពោះការរក្សាតុល្យភាពអាកាសធាតុ របស់សកលលោកទាំងមូល និងជាប្រភពទាញនូវទឹក ភ្លៀង និងថាមពលអគ្គិសនី ដ៏សំខាន់សម្រាប់កម្ពុជា។

ក្នុងកម្មវិធីនៃដំណើរទស្សនាចរសត្វព្រៃ ធ្វើឡើងនៅផ្សារទំនើបអ៊ីអនសែនសុខ កាលពីល្ងាចថ្ងៃទី១៩ ខែមីនា ឆ្នាំ២០២៣ កញ្ញាបណ្ឌិត ស៊ូវណ្ណា បានថ្លែងថា ព្រៃឈើនៃភ្នំក្រវាញ ប្រៀបដូចជាម៉ូទ័របូមទឹក​ដ៏ធំមួយសម្រាប់កម្ពុជា ដែលបានទាញយកពពក ពីតំបន់មហាសាគរចូលមកស្រោចស្រពលើផ្ទៃដី ព្រមទាំងជាឆ្នាំងសាកធុងអាគុយរបស់កម្ពុជា​ ដោយសារនៅតំបន់ជួរភ្នំក្រវាញមានស្ទឹងធំៗ​រហូតដល់២២ ។

នាយិការអង្គការ WA បានបន្ថែមថា ជួរភ្នំក្រវាញនេះ មានអូរបឹងបួរតូចៗ ជាច្រើនរយទៀត ដែល​ជាប្រភពទឹក និងបានបង្កើតនូវទំនប់វារីអគ្គិសនីដ៏ច្រើន ​ជាមួយសមត្ថភាពផលិត ថាមពល​អគ្គិសនី​សរុបប្រមាណ ២០ភាគរយ នៃបរិមាណសរុបនៅទូទាំងប្រទេស ។

ឯកឧត្តម សុខខេង នវិន្ទ អនុរដ្ឋលេខាធិការក្រសួងបរិស្ថាន មានប្រសាសន៍ថា បច្ចុប្បន្ននេះ នៅ​តំបន់ជួរភ្នំក្រវាញ ត្រូវបានការពារដោយការបោះបង្គោលព្រំ ​ការពង្រឹកកិច្ចការល្បាត លើកទឹកចិត្ត​ការចូលរួម ​កិច្ចការពារពីប្រជាសហគមន៍នៅតំបន់ក្បែរនោះជាដើម ។

ឯកឧត្តមបានបន្តថា​ គម្របព្រៃឈើនៅតំបន់ជួរភ្នំក្រវាញ​ ភាគច្រើនគ្របដណ្តប់ដោយព្រៃស្រោង ព្រៃពាក់​កណ្តាលស្រោង ដែលជាឃ្លាំងដ៏សំខាន់សម្រាប់ផ្ទុកកាបូន ​និងជាព្រៃល្បោះ ដែល​អំណោយ​ផល ​ដល់ពពួកប្រភេទសត្វកម្រ ​សម្រាប់ផ្តល់​តម្លៃ​ដល់ការអភិរក្ស ​និង​ការ​អភិវឌ្ឍ​សេដ្ឋកិច្ចជាតិ ​តាមរយៈការអភិវឌ្ឍវិស័យថាមពល​ ការលក់ឥណទានកាបូន ​និងវិស័យ​ទេសចរណ៍​ធម្មជាតិ ។

កាលពីឆ្នាំ២០១៦ ​រាជរដ្ឋាភិបាល ​បានសម្រេចបង្កើតឧទ្យានជាតិជួរភ្នំក្រវាញកណ្តាល ដោយ​មានខេត្តចំនួន៣ គឺខេត្តកោះកុង​ ខេត្តកំពង់ស្ពឺ និងខេត្តពោធិ៍សាត់ ដើម្បីជាទីជម្រក​នៃ​ពពួកប្រភេទ​សត្វទទួលរងការ​គំរាមកំហែង​ និង​ប្រភេទសត្វមានដោយកម្រជាសកល ​ដែល​មាន​រហូតជាង ៥០ប្រភេទ ​ដូចជា ដំរីអាស៊ី ខ្លាពពក ក្រពើភ្នំ ខ្លាឃ្មុំធំ ខ្លាឃ្មុំតូច កែះ ទោចម្កុដ អណ្តើកភ្នំ មាន់ក្រិច ក្ងោកជាដើម និងប្រភេទឈើកម្រផ្សេងទៀត ​ខណៈបានប្រភពទឹកដ៏សំខាន់ និង​ជា​ផ្ទៃរងទឹកភ្លៀង​សម្រាប់​បន្តនិរន្តរភាព​ទឹកបឹងទន្លេសាប ។

គួរបញ្ជាក់ថា ដំណើរទស្សនាចរសត្វព្រៃ​ បន្ទាប់ពីបានរៀបចំនៅតាមតំបន់ជួរភ្នំក្រវាញ ​មានដូចជា នៅ​ឃុំអូរសោម ស្រុកវាលវែង ខេត្តពោធិ៍សាត់ ​នៅក្រុងខេមរភូមិន្ទ ​ខេត្តកោះកុង ​និងនៅស្រុកថ្មបាំង ខេត្តកោះកុង ​ដើម្បីលើកកម្ពស់ការយល់ដឹងអំពីសារប្រយោជន៍នៃព្រៃឈើតំបន់ជួរភ្នំក្រវាញ ដោយ​ផ្សារភ្ជាប់យុទ្ធនាការការពារព្រៃឈើឱ្យមាននិរន្តរភាព​ ការបញ្ឈប់ការដាក់អន្ទាក់ចាប់សត្វព្រៃ (អន្ទាក់សូន្យ) ​និងការស្តារសត្វខ្លាធំឡើងវិញ ៕អត្ថបទ បាន សុខរិទ្ធិ