កូរ៉េខាងជើង៖ សារព័ត៌មានរដ្ឋ KCNA បានរាយការណ៍នៅថ្ងៃចន្ទនេះថា មេដឹកនាំប្រទេសកូរ៉េខាងជើងលោក គីម ជុងអ៊ុន បានអំពាវនាវឱ្យប្រទេសរបស់លោកត្រៀមវាយប្រហារនុយក្លេអ៊ែរ នៅពេលណាមួយដើម្បីរារាំងសង្គ្រាម ដោយចោទប្រកាន់សហរដ្ឋអាមេរិក និងកូរ៉េខាងត្បូងពីការពង្រីកសមយុទ្ធយោធារួមគ្នា ដោយមាននុយក្លេអ៊ែររបស់សហរដ្ឋអាមេរិក។
ការធ្វើអត្ថាធិប្បាយរបស់លោក Kim បានមានឡើង ខណៈប្រទេសឯកោមួយនេះបានធ្វើនូវអ្វីដែលសារព័ត៌មាន KCNA ហៅថា ជាសមយុទ្ធក្នុងបំណងពង្រឹងការទប់ស្កាត់សង្គ្រាម និងសមត្ថភាពវាយប្រហារនុយក្លេអ៊ែររបស់ខ្លួនកាលពីថ្ងៃសៅរ៍ និងថ្ងៃអាទិត្យ និងដើម្បីផ្ញើការព្រមានខ្លាំងៗប្រឆាំងសម្ព័ន្ធមិត្ត។ សារព័ត៌មាន KCNA រាយការណ៍ថា នៅក្នុងសមយុទ្ធនោះ មីស៊ីលបាលីស្ទីកដែលត្រូវបានបំពាក់ដោយក្បាលគ្រាប់នុយក្លេអ៊ែរក្លែងក្លាយ បានហោះហើរក្នុងចម្ងាយ ៨០០គីឡូម៉ែត្រ មុនពេលធ្លាក់គោលដៅនៅរយៈកម្ពស់ ៨០០ម៉ែត្រ ក្រោមសេណារីយោនៃការវាយប្រហារនុយក្លេអ៊ែរយុទ្ធសាស្ត្រ។
លោក Kim ដែលពិនិត្យមើលលើការសាកល្បងនេះបាននិយាយថា សមយុទ្ធនេះបានធ្វើឱ្យប្រសើរឡើងនូវសមត្ថភាពសង្គ្រាមជាក់ស្តែងរបស់យោធា និងបានបញ្ជាក់ពីតម្រូវការដើម្បីធានាបាននូវជំហរត្រៀមខ្លួន សម្រាប់ការវាយប្រហារនុយក្លេអ៊ែរភ្លាមៗ និងយ៉ាងខ្លាំងអស្ចារ្យតាមរយៈសមយុទ្ធបែបនេះ។ សារព័ត៌មាន KCNA បានដកស្រង់សម្តីរបស់លោកដែលនិយាយថា ស្ថានភាពបច្ចុប្បន្នដែលសត្រូវកំពុងបង្កើនសកម្មភាពរបស់ពួកគេកាន់តែខ្លាំងឡើង សម្រាប់ការឈ្លានពានមកលើប្រទេសកូរ៉េខាងជើង ដែលតម្រូវឲ្យកូរ៉េខាងជើងធ្វើការបន្ទាន់ដើម្បីពង្រឹងការទប់ស្កាត់សង្គ្រាមនុយក្លេអ៊ែររបស់ខ្លួន៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
